الحقووونييي: بعت العربية بتوكيل

**Richman** · 07-12-2011 04:09 PM

انا بعت عربية في 2008 بتوكيل بيع (مكتوب فيه يحق له البيع لنفسه وللغير والتعامل مع المرور والتجديد والترخيص)، ولدي سيارة أخرى وعند قيامي بتجديد سيارتي الأخرى اليوم فوجئت بأنه يجب أن أدفع ضريبة رفاهية لأنه مازال عندي عربية أخرى مسجلة بالكمبيوتر وقالوا عايزين عقد بيع مسجل حتى يتم إزالتها من ملفي وعندما قمت بالاتصال بالتاجر اتصل بالمشتري ووجد أنه مسافر منذ سنتين ولا نعرف ما إذا كان نقل ملكية أم لا فما هو الحل حتى أقوم بالتأكد ما إذا كان هذا الرجل قد جدد الرخصة باسمي أم نقل الملكية؟؟وكيف أثبت ذلك حتى يتم رفع هذه السيارة من ملفي ولا أدفع الضريبة كل سنة؟

ولكم الشكر الجزيل،

**aboomar22** · 07-12-2011 04:50 PM

لو مانقلش الملكية هتدفع الضريبة مالهاش حل لو نقل الملكية يبقة انت محتاج عقد بيع مسجل او شهادة بيانات باسم المالك الجديد وبما انه مسافر يبقى هتدفع هتدفع الا لو حد من اهله معاه توكيل وراح جابلك شهادة بيانات

**أبو صلاح** · 07-12-2011 04:55 PM

بص ياباشا
بداية المشكلة عندك في الجملة دي

والتجديد والترخيص

انا بشك ان التاجر ده نصاب
لسبب
هو انت عملت التوكيل باسم مين باسم المشتري مباشرة ؟ ولا باسم التاجر؟
لو عملته باسم المشتري مباشرة يبقى اكيد هو اللي بيجدد العرببية وممكن يفضل يجددها مدى الحياة
لو انت عملت التوكيل باسم التاجر يبقى هو بنفسه اللي بيروح ويجدد العربية وبياخد من المشتري اللي فيه النصيب

اللي خلاني اشك في ده ان التاجر ما شاء الله عليه ذاكرته لولبية قدر يفتكر زبون عنده من 2008 وكلف نفسه انه يسال عليه

بس هوة عمة دي حركة مقصودة من التاجر لانه فاهم ايه المقصود كويس بالكلمة دي

على فكرة هو مجرد ما ينقل الملكية باسمه هتظهر على الكمبيوتر بدون تدخل منك او تقديم مستندات
يعني لما تيجي تجدد لو طلبوا منك ضريبة الرفاهية يبقى هي مازالت باسمك ولو مطلبوش يبقى اتنقلت باسم حد تاني

**Richman** · 07-12-2011 05:19 PM

انا مشكلتي مش في ضريبة الرفاهية مشكلتي الأكبر في انه يعمل بيها جريمة هل ساعتها هابقى انا المسؤول؟؟؟؟ انا عملت توكيل البيع واخدت ثمن العربية في 2008 وماعرفش عنها حاجة من وقتها يعني هو بيجدد باسمي من ساعتها؟ ارجو الإفادة انا ممكن اعمل ايه عشان يبطل يجدد باسمي؟؟ هل ممكن ألغي التوكيل دة؟

ولكم الشكر،

**أبو صلاح** · 07-12-2011 05:22 PM

المشاركة الأصلية كتبت بواسطة richman

انا مشكلتي مش في ضريبة الرفاهية مشكلتي الأكبر في انه يعمل بيها جريمة هل ساعتها هابقى انا المسؤول؟؟؟؟ انا عملت توكيل البيع واخدت ثمن العربية في 2008 وماعرفش عنها حاجة من وقتها يعني هو بيجدد باسمي من ساعتها؟ ارجو الإفادة انا ممكن اعمل ايه عشان يبطل يجدد باسمي؟؟ هل ممكن ألغي التوكيل دة؟

ولكم الشكر،

كلنا مشكلتنا نفس مشكلتك
انا كان عندي مشكلة قريبة زيك وهي ان كنت عامل رخصة 3 سنين وبعتها بعد التجديد ب 3 شهور

هو انت هتعرف تبرأ نفسك من الجريمة بعقد البيع اللي بينكم
والتوكيل ما ينفعش يتلغي الا في حضور الطرفين

بس انت مجاوبتنيش انت عامل التوكيل باسم مين ؟

بسام المشتري مباشرة ولا باسم التاجر؟

**Richman** · 07-12-2011 05:25 PM

التوكيل باسم شخص غير التاجر
مفيش عقد بيع كل اللي معايا صورة من توكيل بيع لشخص غالبا هو المشتري

**Richman** · 07-12-2011 05:27 PM

ممكن افهم قصد حضرتك بالجملة دي:

"بس هوة عمة دي حركة مقصودة من التاجر لانه فاهم ايه المقصود كويس بالكلمة دي"

**أبو صلاح** · 07-12-2011 05:31 PM

المشاركة الأصلية كتبت بواسطة richman

التوكيل باسم شخص غير التاجر
مفيش عقد بيع كل اللي معايا صورة من توكيل بيع لشخص غالبا هو المشتري

للاسف ياباشا انت مش هتقدر تعمل حاجة
موقفك ضعيف

حط نفسك مكان المشتري علشان تنقل العربية باسمك محتاج لفة وشهر عقاري ومصاريف لا تقل عن 2000ج

ممكن تعمل حركة تانية
انت هتروح المرور وتحاول بأي طريقة انك تطلع ملف العربية وتشوف صورة بطاقة آخر واحد مجددها وتشوف آخر استمارة تجديد (على ما اتذكر بيتكتب فيها رقم التليفون)
تاخد العنوان ورقم التليفون وتروح للشخص ده

وساعتها سيادتك لازم تكون متكفل بمصاريف النقل واعادة الترخيص اللي قلتلك عليها لن تقل عن 2000ج

وعامة ما تقلقش كده لو حصل حاجة لا قدر الله الورقة اللي معاك ان شاء الله هتحميك وتثبت انك بعت العربية لواحد تاني في تاريخه (معلومة غير مؤكدة - تقدر تتأكد من محامي)

**mido** · 07-12-2011 05:37 PM

لازم يكون مكتوب فى التوكيل او اى ورقه معاك ان اى مسئوليه جنائيه تبقى على اللى اشترى منك وده بيقى مكتوب فى العقد المسجل

**أبو صلاح** · 07-12-2011 05:41 PM

المشاركة الأصلية كتبت بواسطة richman

ممكن افهم قصد حضرتك بالجملة دي:

"بس هوة عمة دي حركة مقصودة من التاجر لانه فاهم ايه المقصود كويس بالكلمة دي"

اقصد ان التاجر ده فاهم كويس هو بيعمل ايه
لانه عارف ان المقصود بالاضافة دي انه يثبت للمشتري انه يجدد العربية ويرخصها في عدم وجودك
وده علشان يعرف ياخد قرشين زيادة في العمولة من المشتري