الموضوع: مشكلة فنية فى البيتلز

المشكلة دى لها اسباب كتير جدا:

1-ممكن يكون البنزين مش واصل للكربراتير ، ودى ممكن مراجعتها بسهولة عن طريق فك خرطوم البنزين الداخل للكاربراتير والتدورير صباحا ومراجعة ما اذا كان البنزين يصل لحظيا او متآخر، لو متآخر يبقى حلها مراجعة مسارات البنزين والطلمبة

2- ممكن تكون البوجيهات بايظة ودى بتكتشف بمراجعة البوجيهات بالنظر، فيه موضوع فى المنتدى التعليمى عن اشكال البوجيهات بعدالإستعمال، لكن عموما لو البوجيه الخزفة بتاعته لونها بنى يبقى عمره خلص ومحتاج بوجيهات جديدة، ولو البوجيه مهبب خالص وكل الجزء المعرض منه لونه اسود غير لامع يبقى الكاربراتير بيرمى بنزين زيادة ويشرق العربية ولو الجزء المعرض من البوجيه لونه اسود لامع (مزيت) يبقى الموتور خفيف ومحتاج عمرة وفى كل الأحوال البوجيه محتاج يتغير

3- ممكن يكون الكاربراتير بيرمى بنزين زيادة ويبوظ البوجيهات ودى تكتشف من البوجيهات كما اوضحت فى (2) ، وفى هذه الحالة نغير البوجيهات ، ونكشف عليها بعد يوم استعمال، لو البوجيهات هببت تانى يبقى الكاربراتير محتاج اصلاح

4- ممكن يكون وش الأسبراتير مش محكوم وبيلم رطوبة الصبح تعوق الدوارة، ودى تكتشف بالأسلوب الآتى، قبل ما ندور الصبح نفك وش الإسبراتير ونجيب قطنة مبلولة سبرتو ونحطها جوة الوش ونولع فيها ونسيبها لما تخلص، ننفض الوش ونضفه بفوطة ناشفة ونركبه وندور ، لو دارت على طول يبقى كدة المشكلة من وش الإسبراتير ومحتاج يتغير

5- ممكن يكون الموتور خفيف وبالتالى وجود الزيت فى حيز الإحتراق بيعوق الدوراة صباحا بسهولة، ودى بتبان لو فيه دخنة بيضاء بتخرج ساعة الدوارة، وكذلك لو فيه زيت على البوجيهات ،ممكن يكون كاوتش صباب فقط وممكن يكون الموتور محتاج عمرة كاملة،