صباح الخير ..... يا اهلا بيكم .... منورين المنتدي
من غير رغى كتير .... انا تقريبا كده من سنتين جاءئى عقد عمل فى احدى الدول العربية الشقيقه فى وظيفه سكرتير تنفيذى و مترجم و بالفعل سافرت .....و قعدت هناك 10 شهور و رجعت ... فى الفترة ده اللى هى ال10 شهور حصلى 3 مواقف شنيعه بحكم قله الخبرة فى التعامل فى عادات تلك البلاد و اختلاف المفاهيم بينا و بينهم ... المهم ... انا هحكى موقفين بس و التالت ده عاوزله موضوع لوحده علشان ده طويل اوي ....
و بطبيعه علمى كنت اقوم بالاتصل بالتليفون بناس كتير ة اوي و ارتب مواعيد لرئيس مجلس الادارة و هكذا ...... و اترجم فاكسات و .......... الخ
و عرفت ان الشركه لسه مستأجرة مقر جديد لها و تركت المقر القديم لاصحابة و للاسف ما زلت تدفع فواتير التليفونات هناك لبضعه شهور .... فقالى الشيخ فلان ... ابن صاحب المؤسسه كلم الارقام الاتيه و شوفها حد بيستعملها ولا لأ و اعرف اذا كانت شغاله ولا لأ فقولته اوكية ماشى و فعلا اخذت الارقام و مع اول اتصال كان الحوار التالى :-
انا : السلام عليكم .... الخط ده بتاع شركه كذا كذا
ياتينى صوت من الطرف الاخر على السماعه اعتقدت فى البدايه انه صوت طفل يقول : كيف .... كيف ... كيف ؟
قمت قفلت الخط و اتصلت تاني و قولتلوا يا حبيبى خلى حد كبير يكمنى !!!!!!!
تأتينى نفس الاجابة بصوت اقرب الى الاطفال ... كيف ...... كيف ...كيف ....
بصراحقه زهقت و حطيت السماعه و اول ما حطيتها ... لاقيت التليفون بيرن ....
انا برد لاقيت واحد بيصرخ فى التليفون و بيقول : اش تكون انت ؟؟؟
انا : احنا شركه كذا كذا .... لاقيته بنفس النبرة ... اش تكون شركه كذا كذا
لسه هرد لاقيته بيقولى : ليش تدق على الحرمه ؟؟ و يكررها بصريخ ليييييييييش تدق على الحرمه
انا طبعا انفعلت و رديت عليه : حرمه مين يا عم ... انا اعرف حرم
لاقيته برضه معلق على الجملة : و عمال يحزق ... لييييييييييييش تدققققققققق على الحرمة ؟؟؟؟؟؟
انا بأنفعال اكتر : يا عم حرمت عليك عيشتك .... انا معرفش حرمه و لا دياولو ... تاني
هو : انا بحكاكمك محاكمه شرعية .... انا بقفلك المؤسسه
انا : يا بنى ادم افهم ... هو انا سايب بلدى ....و احلفله و حياة امى اللى سايبها على لحم بطنها فى مصر ..مدقتش على حرم خالص ...
المهم رزعت السماعه و طرت على صاحب الشركه علشان اقوله بقى اللى حصل ....
قالى يا ولدى لما تلاقى حرمه على الطرف الثانى تقول غلطان و تجفل الخط .... انا .. يا شيخ انا بحسبه طفل صغير و الله معرفش .... قالى خلاص خلاص .. يصير خير ان شاء الله
و من ساعتها اول ما اتصل بحد و صوته مش عاجبنى اقوله غلطان ........................


تانى موقف بقى :-


كنت مع واحد مصري صاحبى بنتفرج على ماتش مهم بين مصر و الجزائر تقريبا و مصر كسبت و خرجنا من القهوة و طرنا بالعربية كان معاه هيوانداى مستعمله و كان ماشى تقريبا 100 و الطريق قفل مرة واحدة و هدى هو طبيعى بالراحه و فجاءة اسمع صوت من ورا كانه انفجار .... طاااااااااااااااااااااااا ااااااااااااااااااااااااا خ
و الاقى ازاز مكسر بيطير فى قفايا و على التابلو .... نزلت من العربية اشوف فى ايه ؟؟
نزلت لاقيت العربية بقت هاتش باك !!!!!!! مفيش شنطه خالص الشنطه بقت فى الكنبة اللى ورا...
و لاقيت مدمرة دخلت فينا .. عربية امريكانى من بتوع اواخر التمانينات و نزل صاحبها لابس التوب الابيض .. شاب من سننا كده عمال ينظر على عربيته بزهو و غرور و اعجاب و خيلاء ....
نزل صاحبى و بيوقله شوفت حضرتك عملت ايه؟؟
تخيلوا الراجل يرد يقول ايه ؟؟؟؟!!!!!!
اول كلمه نطقها : و الله متينه ها السيارة... متينه مررررررررررره !!!!!!
طبعا صاحبى اول ما سمع كده قعد يتشال و يتهبد فى الارض و التانى بكل برود يرد : تبغى تعمل تقرير فى الشرطه
نعمل تقرير فى الشرطه ..... و فى ثوانى كانت عربية الشرطه ورانا و لا اخدنه منه لا ابيض ولا اسود
الغريبه ان العربية وصلتنا للبيت و بعدها بشهر باعها للتشليح بكلام فارغ ......
انا بقى قولتله احمد ربنا انه مقلقش : ليش تدق فى سيارة الحرمه ............