اصلاح سيارتي بعد الحادث في مودرن ابو رواش
السلام عليكم و رحمه الله
طبعا انتوا فاكرين اني عملت الحادثه يوم (8/8/2011) يوم 8 رمضان يعني.. و الحكايه بالتفصيل كالأتي
في اليوم ده انا خرجت الصبح بدري بعد السحور و الصلاه و مع اول النور كان عندي مشوار ..
الكلام كان حوالي 6.30 الصبح و انا راجع من طريقي العادي بعدي على مطب على قمه مطلع و المطب ده من الاتجاهه الطبيعي بتاعي ممسوح نوعا ما و من الناحيه التانيه للي رايح المطب فيه عالي و مش ممسوح فلازم طبعا يهدي جدا .. المهم الاخ صاحب العربيه اللي خبطتني كان جاي سريع جدا و طالع المطلع في اتجاهي عشان يتفادى التهديه للمطب طبعا هو مكنش مركز في اللحظه دي اعتقادا منه ان مفيش حد هيكون ماشي في الوقت ده و هو كان متأخر فماشي سريع جدا المهم فوجئ بيا في وشه مباشره فتلخبط و بدل ما يهدي و يمسك طريقه العادي دخل في طريقي اكتر
انا شفت العربيه داخله فيا و مفيش مفر من الاصطدام فلت يبى بلاش الوش في الوش و حاولت افادي وش العربيه و اهرب انا في طريقه هو .. بس الوت كان فات فأصطدم بيا من الناحيه اليمين.. و ده لنك الصور للحادثه
Facebook
المهم الراجل طلع مش معاه رخصه و العربيه ساقطه قيد كمان و الراجل كان عاوز يهرب بس الناس مسكت فيه و اتصل بأهله عشان ييجو المهم و الناس قالت احنا مستعدين نصلح العربيه بس بلاش التوكيل عشان غالي و بلاش محاضر عشان العربيه متتحجزش و الراجل يدخل السجن .. و بعد حوارات طوييله انا صممت اني هصلح في التوكيل و عشان استفيد من التأمين .. واضمن ان العربيه تطلع مضبوطه نوعا ما
المهم رحت عملت محضر و قيدته ضد مجهول (ربنا يسامحنا ) و الناس كتبولي وصل امانه و بدأت رحلتي مع مودرن ابو رواش و قناه السويس للتأمين
معلش انا هضطر اخرج دلوقتي و اكمل لكم بالليل ان شاء الله و معاها صور فواتير التصليح .. لو معرفتش ارفع الصور هبعتها ايميل لاي عضو و يرفعها هو بعد اذنه
السلام عليكم