الظاهر كده انى دمرت النوبيرا خلاص!!!!

**badr20590** · 23-05-2008 10:43 PM

علشان ما اطولش اللى حصل انى كنت ماشى بالنوبيرا على 120 و كان الطريق ضلمه بس فاضى اذ فجاة انى الاقى حجره على الارض فحاولت افاديها بصيت على ىشمالى لاقيت ميكروباص بيعدينى فما كانش نافع ابعد عن قدرى المحتوم حاولت اهد على قد ما اقدر المهم ما عرفتش اتفاداها و دست عليها انا قلت ان العربيه اتخرشمت خلاص نزلت بصيت لاقيت الجنط اتنى و العجله هوت فغيرتها و كملت طريقى و انا مرعوب بلعن الغباء اللى جاب الحجره دى هنا و التخلف اللى احنا فيه
ركنت العربيه و طلعت ما عرفتش انام و ما جاليش قلب اسيب العربيه كده ..........
بصيت الصبح على العربيه لاقيت الجنب اليمين متدمر و خراطيم نازله و متنينه رحت مكلم المكيانيكى علشان يشوف حايعمل ايه قالى انه حايعملها بس الانبوبه بتاعت البنزين مش حايغيرها علشان اللحام وكده

و عملها و مشيت بيها بس كان الجنب اليمين بيحك فى المطبات لما اكون محمل والانابيب نازله سنه مش زى الطبيعى ......انا عاوز اعرف دلوقتى:
1-اسيب العربيه كده و هل ده حيأثر على العربيه
2-اوديها التوكيل و هم يتصرفوا و العمليه دى ممكن تكلف كام
3-السبب اللى خلى الحجره دى موجوده فى الطريق
معلش طولت عليكم بس من حزنى.........

**mohamed ibiza** · 23-05-2008 11:00 PM

اولا الف سلامه عليك
طبعا لا لازم تكشف على العربيه كويس و لازم تشوف الخبطه اثرت على ايه لازم يستعدل
الخراطيم ماشي فيها سوايل و السوايل دي ليها واظايف يعني انها نازله شويه دي بتعوق و ظيفه السوايل دي يعني وظايف زي الفرامل التبريد الباور و ده مش صح لازم ترجع مكانها
لو رحت التوكيل مش مكلف اوي
الحكه دي ممكن يكون زوايا العربيه اختلفت او بطاحه المساعد اكشف عليها و شوف ايه ده ممكن تكون عاوزة زرجينه
اما سبب الطوبه دي ممكن يكون سواق حمار بتاع نص نقل كبير كان بيغير كاوتش و كسل يشيلها او محطوطه قدر علشان تيجي سعاتك و تخبط فيها او واحد ماسمعش الحديث بتاع الرسول عليه الصلاة والسلام اماطه الازى عن الطريق صدقه

**badr20590** · 24-05-2008 12:06 AM

والله يا محمد انا خايف اروح التوكيل ده ما بستريحلهوش كده و خايف يكبروا الموضوع على الفاضى و يدخلوا حاجات مالهاش لزمه فى الموضوع بس حاعمل ايه امرى لله ....
هى ممكن تدخلها فى كام باكو؟؟؟؟:d:d

**Santino** · 24-05-2008 12:31 AM

لا حول ولا قوة إلا بالله , يعني الكائن اللي ساب الحجر في عرض الطريق بالمنظر ده إتسبب في أذي غيره و هو ولا علي باله .
مش ممكن الإستهتار يوصل للدرجة دي , يعني يسيب حجر في وسط الطريق و يمشي كده و خلاص !!!!

أنا رأيي إنك تروح التوكيل تكشف علي العربية وتعرف هي عايزه إيه بالضبط علي أساس إنهم ح يكشفوا عليها كويس و بعدين تشوف ح تعملها عندهم وللا بره علي حسب فرق الفلوس .

**اوان الورد** · 24-05-2008 01:16 AM

معلش اخي الكريم .. قدر الله وما شاء فعل والحمد لله انها جت على قد كدة فداك كل شيء مدامه مكنش في الانفس .. وربنا يرحمنا برحمته بقى من المصايب اللي مالية شوارعنا دي والله العظيم الناس دي حتتحاسب .. ده سيدنا عمر بن الخطاب رضي الله عنه كان مش بيجيله نوم علشان لو نعجة في العراق عثرت فهوه كان شايف انه حيكون مسئوول عنها علشان لم يمهد لها الطريق .. نعجة مش بني ادمين .. شفتم بقى الفرق؟؟؟ يبقى الناس دي حتتحاسب ولا مش حتتحاسب ( كلكم راع وكلكم مسئوول عن رعيته .. الإمام راع ومسئوول عن رعيته .. الخ الحديث)

وحسبنا الله ونعم الوكيل

**sss** · 24-05-2008 02:20 AM

قدر الله و ما شاء فعل
الف سلامة ليك اهم حاجة

**eldeplomasy** · 24-05-2008 02:23 AM

قدر الله وما شاء فعل فاللى حصلك ده اخف الاقدار لان القدر بيخفف وهو نازل فاحمد ربنا على كل حال

عموما ان شاء الله يبقى الموضوع بسيط بس الافضل وديها التوكيل وشوف هتتكلف كام وممكن متصلحش غير لما ظروفك تسمح واعرف في نفس الوقت هل في خطر لو سبتها كده على الاقل بالك هيرتاح وهتبقى في خطر منها كده ولا لأ وتكلفة التصليح كام

بس نصيحتي ليك اوعى تعمل او تغير حاجه بغير الاصلي السوق كله مغشوش دلوقتي حتى الميكانيكيه ولما تروح التوكيل صلح المهم والباقي ممكن تعمله وقت ما ربنا يفرجها عليك

واهم حاجه انك الحمد لله سليم ده انا اعرف واحد بسبب حجز زي ما بتقول العربية اتقلبت بيه وهو بيتفادى الحجر وتخيل بقى قلبة عربية فهدلتها بس الحمد لله برده هو سليم بس شوية كسور بسيطه فاحمد ربنا انها جت على قد خراطيم وجنط

اسف طولت عليك وربنا يستر طريقنا ويهدى اللى ساب الحجر بالمنظر ده