انا عندي فور

**TaoTao** · 24-05-2008 10:22 AM

الولد عنده فور :d

بعيداً عن الموضوع لأن ماعنديش إضافات اكثر مما قاله الزملاء افتكرت حاجة ظريفة من عنوان الموضوع

الولد قال انا عندي اربعة، وأمه لم تعلق على هذه المقولة، وتلاقيها ابتسمت في فخر على الرطانة الممتازة لنجلها العزيز.

كان دايما والدي لما اقول اي رقم يقولي "يا حبيبي الرقم له تمييز" وانا طبعا اتنح مش فاهم، يقولي اربعة دي يعني اربع ايه؟ تفاحات؟ برتقانات؟ رجول؟ سنين؟

واتعودت اني دايما مانساش التمييز، اعتقد ان جزء كبير من المشكلة ان الأهالي مش فاضية تعلم اولادها ، بالإضافة طبعا إن بعض الأهالي يتفشخروا إن عيالهم بيرطنوا انجليزي -سوري إينجلِش- والنتيحة زي ماحنا شايفين

**sab3aawy** · 24-05-2008 10:33 AM

خلال سنوات عملى اعتدت ان اتعامل مع المراكز الإقليمية للشركات العالمية فى الخليج وتحديدا الإمارات والبحرين

ومن خلال هذة الفرصة اكتشفت ان الخليجيين قد سبقونا بسنوات ضوئية فى مسألة ضياع الهوية اللغوية

فلو انك تجيد العربية ولا تجيد الإنجليزية فلن تستطيع ان تطفو وسط امواج بحرالحياه والعمل فى الخليج، اما لو انك تجيدالإنجليزية ولا تجيد العربية فلن تجد ادنى مشكلة فى العمل والحياه ، يكفى ان اقول لكم اننى وانا المتحدث بالعربية، لكى اكلم بالتليفون الرجل المصرى المتحدث بالعربية الذى يعمل فى المركز الإقليمى لاحدى الشركات الأجنبية فلابد ان امر اولا على عامل الهاتف الهندى الذى لا يتحدث من العربية حرفا واحد، وهذا الموقف مررت به فى اكثر من شركة، تخيلوا ان الشركات فى هذة الدول لا تهتم بأن يكون عامل التليفون الذى يتلقى كل مكالمات الشركة يعرف من العربية حرفا واحد، فيما يقوم دليلا على انه لا لزوم للعربية مطلقا، ناهيك طبعا عن سائق التاكسى الهندى الذى لا يعرف من العربية حرفا، ومثله بائع محل البقالة وغيرة وغيره

مرة واحدة فى البحرين قررت ليوم عمل واحد ان امتنع عن التحدث بالأنجليزية مع ممارسة كامل انشطة يومى من عمل وركوب تاكسى وشراء الخ

تقريبا قضيت معظم يوم اتفاهم بالإشارة وبلغة الأيدى والأقدام الدولية،

وقررت فى اليوم التالى اننى لن انطق كلمة عربية واحدة وسأتعامل طوال اليوم بالأنجليزية

لم اجد من لم يفهمنى من اول بواب البناية وحتى مدير الشركة التى كنت اؤدى لها عملا ما، مرورا بكل من قابلتهم طوال اليوم من سائقين وبائعين وموظفين، كل الناس يفهمون الأنجليزية

وهكذا نستطيع ان نضيف ضياع الهوية الى كل الجوانب المشرقة الأخرى التى يتباهى علينا اهل الخليج بأنهم سبقونا فيها بجيل كامل

**bee** · 24-05-2008 11:00 AM

لو بصينا كلنا هنلاقي المشكلة فينا احنا
بمعنى ايه .. ؟؟

ان انجح الشركات أجنبية ... وإن كان ملاكها عرب أو مصريين
فطبيعي الشركة الناجحة الاجنبية هيكون موظفيها بيتكلموا إنجليزي .. ومش بعيد فرنساوي عادي
لكن لما تيجي تتقدم لوظيفة زي ما سبق واتكلمتوا في الموضوع ده وقالك لغاتك ايه قلتله عربي
هيبصلك بسخرية .. وابتسامه صفراء معناها ((( جبت التايهه يا أخويا)))
عشان كده اللغة بقت أساسسسسسسسسسسسسسسسسسسسسسس سسسسسي دلوقتي
للأسف مع ضياع حق اللغة العربية

طب بصوا لحياتنا اليومية

- ماما بلاش ناكل النهارده من البيت ... تعالي نطلب (ديليفري)
- في نادراً ما نسمع كلمة شكرا ... دلوقتي (ميرسي) أو (ثانكس) :)
- الشباب بيقولك وانا منهم وانتوا منهم عملنا (دريفت ) ... (كووول) كلمتين ورا بعض أهو
- ازيك يا (مان) .. :)
- و(بييس ) يا مان ..
وهكذا دواليك ... عشان كده بقول العيب مننا ..
انا مش بدافع عن كده
بس لازم نفتكر
"حاسبوا أنفسكم .. قبل أن تحاسبوا"
وأنا أولكم

في انتظار مناقشاتكم
تحياتي

**polo61** · 24-05-2008 11:09 AM

ههههههههه
موضوعك جميل ياعلا احييكى على جراة الطرح وجديته
لن اضيف اكتر مماقيل ولكن كلامك فكرنى بواقعة حدثت فىالحرم المكى وقت الحج من فترة طويلة كنا نجلس فى انتظار اقامة الصلاة وجدت بجوارى سيدة مغاربية كبيرة بالسن نسبيا تبكى وبشكل ملفت المهم حاولت اساعدها وسالتها كنت انا اقرا بمصحفى افادت بأنها تريد قراءة القران ولاتستطيع المهم مظهرها لايدل على انها امية مطلقا حيث انها علمت منها فيما بعد انها تقيم بنيس فى فرنسا قالت انها لاتعرف ان تقرا او تكتب بالعربية مطلقا وكان من والدها ان استفزه ايام الاستعمار الفرنسى لبلاد المغرب ان ان يتم فرض الفرنسية فى التعليم كلغة اولى ولذلك فقد قام الاب بالتوقف عن ارسال بناته للمدارس وفضل عدم تعليمهم والله كده زى ماقالت لى وطلبت منى ان ارفع صوتى بالقراة لكى تستمع وتستمتع بالقران معى
كل ما اود قوله انه بقت موضة عجيبة بين الشباب خاصة حكاية التباهى بالتحدث بالانجليزية بطلاقة وبالعربية مكسر بشكل مخزى ومثير للشفقة
اشكركم جميعا على جدية المناقشات
سعيدة بأنضمامى ل ( نايل موتورز )
تحيتى واحترامى للجميع

**OlaOsman** · 24-05-2008 11:20 AM

المشاركة الأصلية كتبت بواسطة elpasha009

أحكيلك على موقف غريب جدااااااااااااا.
مرة كنت في التجنيد بخلص ورق الجيش وفجأة لقيت اللي جمبي بيقولي ممكن تساعدني في كتابة الإستمارة؟؟؟فقولتله ماشي المهم فوجئت بيه مش عارف يقرأ ولا كلمة عربي من المكتوب وطبعا مليت مكانه الورق وعرفت إنه خريج مدارس لغات وهو حاليا بيدرس في الجامعة الأمريكية وأهله عايشين في الكويت وعمرة مراح حته غير مصر والكويت ومع ذالك مش عارف يقرأ ولا كلمة عربي وطبعا مش بيعرف يكتب كمان.
شوفتي المهزلة اللي إحنا فيها؟؟؟؟؟؟؟ظطيب أبسط حاجة ده المفروض إنه مسلم دلوقتي (إسمه أحمد)بيقرأ القرأن إزاي؟؟؟؟؟؟

أهو ده السؤال اللي فعلا وجع قلبي.. بيقرا القرآن ازاي؟

بجد إحنا في وقت صعب جداااااااااااااااا.أنا ليا خالي في الإمارات وولاده كلهم في مدارس لغات وعلشان الموضوع ده بيجبلهم شيخ البيت كل إسبوع علشان يعلمهم القرأن وفي نفس الوقت عربي.علشان يمسك العصاية من النص

و كإنك بتتكلم عن حد عايش في دولة أوروبية مش عربية.

**elpasha009** · 24-05-2008 12:00 PM

المشاركة الأصلية كتبت بواسطة OlaOsman

أهو ده السؤال اللي فعلا وجع قلبي.. بيقرا القرآن ازاي؟

و كإنك بتتكلم عن حد عايش في دولة أوروبية مش عربية.

مهة يا أستاذة علا على رأي البشمهندس سبعاوي الخليج كله بلا إستثناء وخصوصا الإمارات ضايعين في موضوع العربي ده.لدرجة إن الإمارات السنه ده عملوا مؤتمر قومي للهوية الإماراتية علشان فعلا هما ضايعين في الموضوع ده.تخيلي لما تبقى الإمارات عدد سكانها أكتر من 5 مليون وعدد سكانها الأصليين لا يتعدى المليون يبقى مين اللي لغته وهويته هي اللي هتسيطر على الحياة؟؟؟

**OlaOsman** · 24-05-2008 12:08 PM

المشاركة الأصلية كتبت بواسطة hero

للاسف.....ترك العربية واهمالها ....الاتجاة للفرنجة....هو مفهوم التقدمية والعصرية وعلو المكانة الاجتماعية....
يعني الاب والام لما يعلموا ولادهم انجليزي وفرنساوي والماني وايطالي واسباني وهندي حتي...دة مش وحش وكويس قوي واستثمار جميل في التعليم....لكن انة يبقي فرحان قوي ان ابنة مش بيتكلم عربي وبيعرف لغات ...دي تبقي خيبة كبيرة...

دة انسان عندة عقدة نقص....وبيحاول يعوضها في اظهار القدرات التعليمية الفائقة في امكانيات التحدث باللغة الاجنبية....

.لكل مقام مقال...يعني اية ايلي يخليني اتكلم انجليزي في بلد الناس فيها بتتكلم عربي....غير اني عايز اتمنظر...واعرف ايلي حوليا اني راجل متعلم ...واحسن من الباقي حالا....

ربنا يشفي ويهدي....

صح يا هيرو.. ليه التباهي بالتحدث بلغة غير لغتي الأصلية؟ و مين بيعمل كده غيرنا؟ روح ألمانيا كده مثلا و حاول تتكلم مع حد بالانجليزي.. هتلاقيه حس كإنك بتشتمه

امال احنا مالنا كده بنتبرى من لغة القرآن.. لغة أهل الجنة

**KarimAbulEla** · 24-05-2008 12:16 PM

هناك نوع ايضا منتشر اليومين دول الشباب اللى لا يتقن اللغة العربية او الانجليزية
بمعنى انه لم يتلقى تعليم جيد ف لم يتكتسب مهارات اللغة العربية جيدا
و ايضا لم يتعلم اللغة الانجليزية او يتدريب عليها او حاول تنمية مهاراته بها و هذا النوعية منتشرة جدا اليومين دول ، يعنى حاقتبس كلمة قالها احد الزملاء فى المشاركة هنا و هى كلمة " مسخ " بكل معانيها

**OlaOsman** · 24-05-2008 12:17 PM

تعقيبا على ردي على هيرو كنت عايزة أضيف ان أحيانا الناس بتضطر الناس انها تتكلم انجليزي عشان يحسوا انهم ليهم وزن.. للأسف. على سبيل المثال انا أول ما اشتغلت في الشركة اللي انا فيها دي كنت سكرتيرة و بارد على التليفون، اكتر من مرة تحصل اني أرد على المتصل عادي بالعربي.. ابص ألاقي طريقة كلامه ما معناه امشي انجري يا بت انتي هاتي لي مديرتك اتكلم معاها.. و ساعتها بأه باقلب على الوش التاني.. أقوم مكلماه بالانجليزي بلكنة أهل البلد و عوجة اللسان المعروفة إياها.. و نفس اللي قلته من شوية بالعربي هو هو اللي باقوله دلوقتي بالانجليزي و هو ان المديرة مش هاتقدر تكلمك دلوقتي و لو سمحت سيب رسالة و هي هاتبقى تكلمك.. انما لما أقول البقين دول بالانجليزي كنت بالاقيه اتعدل و بدأ يتكلم باحترام و بيسيب رسالة و يأكد علية اني أوصلها لها و انا طبعا sureeeeeeeeeee

طيب ماهو كان من الأول.. ليه الكلام باللغة الانجليزية بيكسب الناس احترام المتحدث بها؟

**CryptonX** · 24-05-2008 12:19 PM

Ola !

خطيبتي بتشغتل في مدرسة من مدارس " الصفوة " ذي مابيقولوا .

بتدرس 3 ابتدائي - مصاريفهم 16 الف جنيه في السنة .

قواعد المدرسة : ممنوع منع بات علي المدرسين و الطلبة استخدام اللغة العربية داخل حدود المدرسة الا في حصة اللغة العربية و الدين يعني مش عايز اقلك اني لما بكلمها علي الموبايل .. بنتكلم انجليزي !

طبعا مقدرش اقلها غيري المدرسة .. لانها لسة اول سنة ليها و مرتب كويس .. طب اعمل ايه ؟

-- نيجي بقى للمشكلة نفسها .

مصر الدولة الوحيدة في العالم الي فيها حاجة مع احترامي لكل الناس يعني " مدارس لغات "
.و IGSCE و وو و ...

و الي بقت مجرد " منظرة " مش اكتر .. اه في ناس لازم ابقى صريح برده .. بيخشوا المدارس دي فعلا علشان يتعلموا ( بما ان مفيش تعليم في مصر اصلا) و يشتغلوا برة او في شركات Multinational الخ الخ .. بس عايز اقول ان 90% من الباقي .. للمنظرة !

انا ابني بيقول صباح الخير بسبع لغات .. و الناس محدثين النعمة الي بقوا اكتر من الهم علي القلب ..