الموضوع: انا عندي فور

واحدة صحبتي ما شفتهاش بقالي فترة، قابلتها صدفة و معاها ابنها.. بالاعبه و اسأله انت عندك كام سنة قام قاللي انا عندي فور و رفع لي أربع صوابع من إيده.

باسألها طيب هو يعرف الأرقام بالعربي؟ قالت لي لأ.. قلت لها طيب و افرضي محتاج مثلا يقول رقم تليفون البيت لحد ما بيعرفش انجليزي.. يعني لا قدر الله تايه مثلا او حاجة و انتي كنتي محفظاه رقم البيت كويس بس بالانجليزي عشان هو ما يعرفش أرقام غير الانجليزي هايكون ايه الوضع؟

هل صح ان الأطفال أول ما يتعلموا الأرقام يتعلموها بالانجليزي؟

هل صح انهم يفضلوا فترة كبيرة من حياتهم الدراسية ما يعرفوش يعدوا الأرقام بالعربي؟ و في أسماء حاجات معينة بتتقال لهم في المدرسة و البيت بالانجليزي؟ طيب فين اللغة العربية من ده كله؟

بالرغم من ان الموضوع ده سبب لي صعوبات كتيرة أثناء دراستي في الكلية و بعد التخرج، إلا اني في أحيان كتيرة باحمد ربنا اني خريجة مدارس عربي مش لغات.. يمكن ده قوى اللغة العربية عندي شوية.

انما سيبنا من اللغة العربية الفصحى عشان ده يعتبر طموح ان الجيل الجديد يعرف لغته الأم و خلينا في اللغة اللي احنا و أهلنا بنتكلم بيها.. ليه لما اكون في محل لعب بادور على لعبة لابن اختي اسمع حوار بين ام و ابنها معظمه بالانجليزي.. مافيش كلام عربي بيدخل غير "يعني" و "برضه" و شوية أسماء مصرية.. يمكن هو ده اللي أكد لي انهم مصريين.

طبعا مهم جدا ان الوالدين يدخلوا ولادهم مدارس لغات، بل إنهم دلوقتي لازم يدخلوهم مدارس لغات و يعلموهم اللغات من صغرهم عشان لما يكبروا يبقى لهم مستقبل في البلد دي.. انما هو يعني مافيش حل وسط بين اني اعلم ولادي لغات كويس و اخليهم يتكلموا انجليزي كويس و بين اني ما انسيهمش لغتهم الأصلية و لغة أهلهم و أحولهم إلى كائنات محتارة بين لغتين مش عارفة يستعملوا انهي و يركنوا انهي؟

يمكن انا اكون مكبرة الموضوع شوية، بس الصراحة مش بالعة فكرة اني أكلم طفل مصري عربي بالعربي يقوم يرد علية بالانجليزي

المشاركة الأصلية كتبت بواسطة KarimAbulEla

الفكرة لازم تنظريها من كل الاوجه

يعنى فكرتك فى حد ذاتها سليمة و لازم يتعمل حسابها و انا بصراحة اول مرة انظر لمسألة تقوية جانب اللغة الانجليزية عند الاطفال على حساب اللغة العربية من الناحية ديه

لكن يجب ان تتذكرى يا علا ايضا ان احنا محتاجين نوفر لولادنا كل الفرص اللى ممكن يحصلوا عليها
و ده لن يتحقق الا اذا كنت بتحاولى تدربى ولادك على التواصل باللغة الانجليزية منذ نعومة الاظافر
وطبعا لو قدرنا اننا نغرس فيه كلاَ من حب اللغة العربية و الانجليزية سوا يبقى شىء جميل بس حيبقى صعب شوية ، و ان تيسر يبقى خير

زمان كنت دايما باسمع مقولة ليه الاجانب ميتعلموش لغتنا العربية بدلا ان نتسابق نحن لنتعلم لغتهم
هذا حدث فعلا ، اجانب كثير جدا بيروحى دبى و بلاد عربية كتيرة و بيتعلموا اللغة العربية علشان يعرفوا يحققوا نجاح ومكاسب فى مجالهم

لكن ايضا احنا محتاجين نتقن اللغة الانجليزية اتقان تام حتى نستطيع ايضا اننا نحقق نجاح فى مجال العمل و على الصعيد الشخصى كمان.
يوجد مهارات كثيرة لن يستطيع الشخص العادى تعلمها الا باتقان اللغة الانجليزية حتى يستطيع الاستفادة من كم المعلومات الهائل الموجود فى الانتاج الفكرى باللغة الانجليزية

انا عن نفسى دائما بقول لابنى معنى الشىء باللغتين حتى يستوعب الاثنين مع بعض

كلامك مظبوط يا كريم و انا من خلال شغلي في شركة توظيف لقيت انه فعلا إتقان اللغة الانجليزية خصوصا تحدثا من أهم العوامل اللي بتنجح اي مرشح للوظيفة عندنا و لو مثلا تقنيا مش هاينفع في الوظيفة دي دلوقتي فبنخلي ورقه عندنا مع ملاحظات يتكتب فيها انه بيعرف يتكلم انجليزي كويس و بنتصل بيه بعدين لما حاجة تانية مناسبة ليه تظهر له. ده طبعا بعكس اللي الانجليزي بتاعه مستواه مش كويس فده للأسف بنكتب عليه الملاحظات دي و صعب الصراحة اننا نكلمه تاني على أي حاجة تانية - إلا لو عدى مش أقل من سنيتن تلاتة ساعتها ممكن يكون فيه فرصة ان الانجليزي بتاعه يكون اتحسن.

زي ما باقول لك هو الانجليزي مهم و ضروري و أساسي.. انما اللي انا عايزة أوصل له هو حل وسط بين اني أعلم ولادي انجليزي كويس و يطلع يتكلم انجليزي حلو و بين اني أخليه برضه يتكلم لغة بلده و أهله.