الموضوع: أول تقرير عن مركز خدمة أوتو إيجيبت

[mark=#f5ffa6]

بسم الله الرحمن الرحيم

ما يلي تقريري عن زيارة قامت بها مجموعة من شباب قسم نيسان بقيادة الإنسان الجميل أحمد مصطفى، إلى مركز خدمة أوتو إيجيبت الذي الذي تم افتتاحه مؤخراً في أبو رواش.. . وذلك أمس الأول الخميس 8 ديسمبر 2011.
دي كانت أول زيارة بالنسبة لي لمركز خدمة أوتوإيجيبت والحقيقة لولا وجود المجموعة الجميلة دي ما كنتش هاروح.. لكن لقيتها فرصة للقاء معهم وبالمرة عمل صيانة الـ 20 ألف والبحث عن حل لمشكلتي المزمنة مع العربية وهي استهلاك البنزين

تحية قلبية:
قبل كل شيء لازم أوجه تحية حب وأخوة للصحبة الرائعة اللي كانت معنا في تلك الزيارة الجميلة لمركز خدمة أوتو إيجيبت..أحمد مصطفى وبسام وحسين ووليد وحسين وأحمد..

المكان والاستقبال:
اتجمعنا في المركز حوالي الساعة 12 ظهراً تقريباً.. المكان قريب قوي من المحور (300 متر بعد ما تدخل أول يمين من نزلة الصحراوي) ودي ميزة مهمة..صحيح الطريق كان فيه شغل وكله تراب لكن ده مؤقتاً وبعد كدة ها يبقى سلس ومريح..المكان واسع ومساحته كبيرة.. ساحة الاستقبال بها مكان للانتظار مؤقتا حتى يأتي دورك مع أحد مهندسي الاستقبال.. توجد خمسة مكاتب للمهندسين لكن وقتها كان اللي شغال ثلاثة ومش طول الوقت.. لما دخلنا ما كانش فيه عملاء منتظرين.. ورغم ذلك انتظرنا حوالي ربع ساعة قبل أن يبدأ القائد أحمد مصطفى في تسليم سيارته ثم واحد واحد لمدة ساعة تقريباً.. انا اتأخرت عنهم كتير لأني ما كنتش حاجز فدخلت سيارتي حوالي الساعة 2 بعد إلحاح مني بدون فائدة ثم تدخل أحمد مصطفى فجه دوري بعد دقيقتين من تدخله!..

عملية تسليم السيارة للمهندس بتستغرق حوالي ربع ساعة لكل واحد.. وده وقت طويل نسبياً لأن المهندسين بيعملوا كل خطوة بهدوء وبيحاولوا يكونوا لطفاء جدا مع العملاء فده بيطول الوقت.. لكن في نفس الوقت بيهتموا بكل شيء في العربية وأي حاجة عاوز تقولها وبيجرب بنفسه وهو بيستلمها من حاجات معينة غير اللي انت بتقولها (مثلاً الأنوار والكلاكس والكاسيت)

الورشة والصيانة:
بعد كدة بتتفضل سيادتك في استراحة الانتظار اللي من خلالها تقدر تشوف الورشة وعربيتك لحظة بلحظة لأن الفاصل بينها وبين الورشة عبارة عن حائط كامل زجاج.. والاستراحة واسعة ومريحة وهادئة ومزودة بتليفزيون وشاشة عرض لمراحل الصيانة لكل عربية بالتفصيل وبالتوقيت.. وخلال فترة الافتتاح بتاخد مشروبات ومخبوزات مجاناً..أخونا أحمد مصطفى أخدنا في جولة تفقدية للورشة، واتكلمنا مع المهندس المسؤول وكان الشغل في عربية أحمد وعربيتي وشفنا إزاي بيتم التعامل مع الطنابير وقياس حالتها وشاهدنا ذراع لربط المسامير الحقيقة أول مرة أشوفه في أي مكان.. بيربط المسامير بقوة ضغط معيارية.. يعني محددة مسبقاً حسب كل مسمار أو صامولة وفقاً لتعليمات المصنع.ز مش حسب تقدير العامل أو هو وقوة ذراعه أو لغاية ما الصامولة تقوله كفاية!لما بدأو يشتغلوا في عربيتي لاحظت سرعة العمال وكأنهم حافظين تماما الخطوات والمطلوب بدقة.. لكن مش عارف ليه قلت اأكد عليهم إني طالب زيت 5000 بس مش 10 آلاف اللي هما بيغيروه.. فوجئت إنهم كانوا بالفعل هايحطو 10 آلاف.. واضطريت أرجع أدور على مهندس الاستقبال اللي كان نسي يكتب ده في أمر الشغل.. يعني لما الواحد يطلب تغيير شيء عن الطبيعي بتاعهم يبقى لازم يتابعه ويتأكد علشان هما بينفذوا بسرعة قوي وبشكل آلي خطوات الصيانة والتغيير بنفس نوعية وكمية المواد اللي متعودين عليها. وانا واقف داخل الورشة وفي خلال 15 دقيقة لقيتهم كشفوا على العربية ميكانيكيا وانتهوا من تغيير الزيت والفلتر وفلتر الهوا وفكوا العجل وفلتر التكييف.. وطلبوا تغيير فلتر التكييف لأن حالته كانت صعبة.. بس رفضت وقلت أخليه لغاية الشتا ما يخلص.. وبعدين فوجئت بإن التيل محتاج تغيير.. برغم إنه لم يتجاوز 20 ألف كم!!! والظاهر كدة إن رجلي تقيييلة قوي على الفرامل.. مع إني باسوق من 12 سنة وآخر عربية معايا اشتريتها بالتيل اللي فيها قعدت معايا 4 سنين وبعتها وهو فيها!.. المهم سبتهم وهما بيغيروا التيل.
ولما عرفت من مهندس الورشة إن عندهم جهاز جديد بيقيس الأنوار أوتوماتيكيا مش بطريقة النور في الحيطة وواحد يقف يبص والكلام ده.. قلت جميل يبقى أكشف على الأنوار علشان حاسس إن عندي كشاف أقوى من التاني.. خرجنا كلنا من الورشة علشان كان فيه وفد رسمي من الإدارة والمصنع جاي في زيارة وما ينفعش يلاقوا عملاء داخل الورشة.

المفك.. الجريمة الغامضة:
عربياتنا كانت طلعت واحدة ورا التانية.. ما عدا بسام عربيته كانت مستخبية منه ومش عاوزة تطلع له.. وكنا بندور له على تكتك ليموزين يرجع بيه..
انا عربيتي فضلت أكتر من ساعة قدام جهاز الأنوار وشفت فني ماسك مفك وعمال بيلف بيه داخل الكبوت خلف الكشاف الشمال كتييير قوي.. وقعدت أقول لنفسي هو عمال بيبرم في إيه طول الوقت ده مش الجهاز اللي بيعاير الأنوار ولا إيه؟.. بس الحقيقة أحرجت أدخل الورشة تاني لوحدي.. هو الحقيقة ما كانش إحراج وبس.. كان جزء منه خوف بشري طبيعي.. أصل العمر مش بعزقة.. ما هو انا لو كبست على الفني وظبطته متلبسا بجريمة الحفر في الكشاف بالمفك هاتبقى معركة غير متكافئة بالمرة.. هو في إيده سلاح فتاك وهو المفك السحري اللي بيلف بالساعة وبرضه بيفضل في مكانه! وأنا كل سلاحي قطعة باتيه بالجبنة.. وكمان جبنة بيضا مش رومي. وزي ما بيقولو الجماعة بتوع العربي (آثرت السلامة) وقلت أعمل نفسي مش واخد بالي لغاية ما العربية تطلع وساعتها لو فيه حاجة مش عاجباني أبقى أعمل حمش وبرم وأزعق وأعلي صوتي ولا وحش البراري.المهم بعد المفك ما أنهى مهمته السرية فيما وراء الكشاف. كشفوا على العربية بجهاز القراءات الإلكتروني.. وقالوا لي كله تمام.. سألت هي العملية نجحت؟ يعني الكشاف هايعيش؟ يعني الأنوار تمام؟ قالوا آي نعم..
طيب يا جماعة ولو فيها رزالة يعني ولو السؤال مش هايزعل سيادة المفك هو كان فيه إيه بالظبط؟
قالوا لي كان فيه كشاف أقوى من التاني والاثنين كانوا عاليين.. وظبطناهم.. وحمدا لله على سلامة كشافك
طلع مهندس الورشة بالعربية غاب 5 دقائق ورجع تاني.. تقريبا كان بيجربها بعد تغيير التيل وتبديل أوضاع العجل وبعد الصيانة كلها.. ودي خطوة عجبتني جدا لأن دي أول مرة حد يجرب العربية بدون طلب.. وأتمنى مع زيادة العملاء والزحام ما يبطلوش هما كمان المسألة دي..

التكاليف:
دفعت 774 جنيه وذلك بعد خصومات نايل موتورز والعرض الخاص بافتتاح مركز الخدمة
والتفاصيل كالآتي:
ثمن تيل الفرامل الأمامي 473 جنيه
مصنعية تركيب التيل= 05 جنيه
إجمالي صيانة 20 ألف = حوالي 400 جنيه
موزعة كما يلي:
مصنعية صيانة = صفر (عرض المركز حتى نهاية ديسمبر)
زيت توتال 5000 = 132
فلتر هواء = 137
مياه المساحات = 5
فيوز ولاعة الصالون = 15
الضريبة على قطع الغيار = 53
الضريبة على الفاتورة كلها= 71
المجموع = 775 (بعد خصم 15 % الخاص بنايل موتورز)


كلاكسي على قدي:
قبل ما أروح أدفع مهندس الاستقبال سلمني تقرير عن العربية واللي اتعمل فيها.. مكتوب فيه كل حاجة وملاحظاتهم.. وفوجئت إن مطلوب الكشف على الكلاكس.. سألت المهندس هو ماله الكلاكس؟ قال لي صوته تعبان شوية.. قلت طيب ما كشفوش عليه ليه؟ فكر ثانية وقال لي يعني علشان ها ياخد شوية وقت! الحقيقة استغربت.. الكلاكس ها ياخد وقت؟ ووقت أطول من كدة؟ ده انا باعمل صيانة 20 ألف.. وبعدين ما قالوش ليه أثناء الشغل فيها زي ما قالوا على التيل وفلتر التكييف؟ مش عارف ليه حسيت إنهم ما اكتشفوش المسألة دي إلا في آخر لحظة.. مع إن مهندس الاستقبال كان جرب الكلاكس وهو بيستلم مني لكن ما كتبش حاجة عنه في أمر الشغل..
قلت مش مشكلة الكلاكس.. كدة كدة ما بيفرقش مع الميكروباص ولا التاكسي ولا الأوتوبيس ولا الكارو ولا التكتك ولا الملاكي ولا اللي ماشيين على رجليهم.. يعني انا بس اللي باسمعه.. يبقى خلي صوته على قدي كفاية!


المفاجأة.. آدي آخرة المفك:
معلش أنا طولت شوية لكن لأنها أول مرة هناك وكمان دافع 775 جنيه يعني أقعد أحكي بيهم ساعتين على الأقل..
المهم دفعت الـ 775 جنيه وأخدت باقي الـ 800 وأخدت كلاكسي معايا وباتحرك كانت الساعة عدت 5:30 فشغلت الأنوار وفي طريقي للشباب عند بنزينة الإمارات فوجئت إن الأنوار بقت أضعف.. وكمان قصيرة.. يعني مكفية على الأرض.. واضطريت أشغل العالي علشان أعرف أشوف قدامي! ده غير إني لقيت الكشافين برضه واحد مسافته أبعد قليلاً من التاني! ولما حصلت الشباب عند بنزينة الإمارات قارنا الأنوار مع عربية بسام وشفنا الكلام ده مع بعض..
الحقيقة انطباعي الممتاز عن المكان اتهز شوية بسبب الحركة دي.. لأن المفروض إن الأنوار اتظبطت بجهاز مش يدوي.. إزاي تطلع كدة؟ وإذا كنت أنا بمجرد النظر ومع أول حركة بيها اكتشفت ده.. إزاي المهندس اللي جربها ما لاحظهاش؟ ولا ما جربش الأنوار وفي الحالة دي برضه يؤاخذ على كدة لأن ده موجود في أمر الشغل وبالتالي في التقرير اللي هو بيكتبه قبل ما يسلم العربية. وانا عن نفسي كنت هاسامحه لو كان اعترف لي إن هو كمان خاف من مواجهة سيادة المفك.
مش عارف هاقدر أرجع لهم إمتى علشان يظبطوا المسألة دي.. لكن لازم ألاقي وقت علشان ما كنتش عارف أمشي وأنا راجع.. النور العادي مكفي في الأرض قوي وعلشان أعرف أمشي بالليل لازم أشغل العالي اللي هو طبعاً مزعج ومستفز لمن أمامك..

رجلي تقيلة؟:
أخيراً.. مشكلتي الكبرى والأزلية.. استهلاك البنزين.. كالمعتاد وكما فعل السبع 5 مرات من قبل.. قاموا بقراءة عدادات العربية والسينسورز بتاعتها وكلها سليمة وفي الطبيعي بل مثالية.. وأنا كنت سلمت للمهندس الذوق المحترم أحمد الرزاز مدير الصيانة كشف باستهلاك البنزين الخاص بعربيتي لمدة سنة كاملة بالتفاصيل.. الكيلومتر والاستهلاك والمعدل والظروف المحيطة (تكييف وجو وحمولة ومكان القيادة وحالة الكاوتش) وكل شيء.. وفي نهاية اليوم وأنا باسلم عليه وباسأله إيه اللي ممكن نعمله في موضوع البنزين.. فوجئت إنه سلم الكشف العجيب بتاعي ده للوفد الزائر من المصنع والإدارة.. وكانوا مستغربين جدا ومعجبين في نفس الوقت بإن فيه حد كاتب كل التفاصيل بالشكل ده.. وقال لي إنه ها يتابع معاهم ومعايا اللي ممكن يتعمل. ده غير فكرة تانية سحرية لولبية مهلبية ومية مية (مش هاقولها..غلاسة بس مش أكتر) ممكن من خلالها نتأكد من إن العربية بتستهلك بنزين زيادة فعلا وإن العيب مش في السائق.. خصوصا إن تغيير تيل الفرامل بعد 20 ألف فقط مسألة غريبة شوية برضه.. وده ممكن يكون بسبب ثقل دم قصدي ثقل قدم السائق.. وبصراحة كدة الواحد يحمد ربنا قوي لو رجله تقيلة أو حتى طلع أبو رجل مسلوخة بس المهم يفضل فيروس الثقل ده في الرجلين بس وما يوصلش للدم.. ألا ساعتها تبقى مش رجل تقيلة دي تبقى مصيبة تقيلة.

انطباعي العام:
المركز ممتاز ويستحق فعلاً يحمل اسم نيسان.. الناس كلهم في منتهى الذوق وعايزين يخدموا العميل بجد.. التجهيزات معقولة جدا كبداية.. لكن مطلوب زيادة العاملين سواء الفنيين أو المهندسين خصوصاً لو عدد العملاء زاد.. ونتمنى أن يستمر مستوى الخدمة بمرور الوقت وزيادة الإقبال.. واللي سمعته من مدير الصيانة وناس تانيين هناك يطمئن جدا إن المستوى مش هاينزل إن شاء الله.. خصوصاً إنهم طلبوا مننا (موقع نايل موتورز وقسم نيسان) نتابعهم دايما ونبلغ بأي ملاحظات أو طلبات.. وده في حد ذاته شيء رائع ودليل على الجدية والاستمرارية
شيء مهم لا يمكن أنساه.. الشباب اللي في الورشة شباب زي الورد.. سن صغير.. سرعة ونشاط.. زي ما قلت في الأول بيتحركوا زي الإنسان الآلي من كتر ما هما حافظين وفاهمين هما بيعملوا إيه.. لكن لاحظت إن سنهم صغير.. وكان أفضل لو فيهم واحد أو اثنين كبار يبقى عندهم خبرة. ولما لفت نظرهم هناك لمسألة صغر سن الفنيين دي قالوا لي علشان دي ورشة الصيانات السريعة.. لكن الصالة اللي بعدها فيها ناس أكبر وأكثر خبرة للأعمال الأصعب.. الحقيقة أنا استغربت لكن لم أعلق.. وقلت في نفسي صيانات 20 ألف و40 ألف تبقى سريعة؟ أمال أنهي صيانات اللي مش سريعة؟
المهم اليوم كان طويل وانتهى بعد الساعة 5 وده علشان الوقت اللي أخدناه في الجولة والحوارات لكن الصيانات نفسها ما أخدتش ساعتين زي ما قالوا فعلاً.. ودي ميزة كبيرة.. وده طبعا علشان عدد العملاء كان قليل.. لكن أتوقع لو عدد العملاء زاد أو لو يوم فيه زحام المسألة هاتبقى صعبة عليهم لو فضلوا يشتغلوا بنفس عدد المهندسين ونفس عدد الفنيين.. خصوصاً زي ما قلت إن مهندسين الاستقبال بيتحركوا بهدوووء جدا.. مش بس في استلام العربية.. وفي متابعتها أيضاً والسؤال عما تم فيها أو لتنبيه الورشة إلى أي شيء.. بمنتهى الهدوء والتأني.. بس في منتهى الذوق والود والصبر على العميل أيضاً..
معلش على الإطالة.. . عارف إن التقرير طويل وممل.. لكن إن شاء الله تقارير بقية الشباب تبقى أحسن وأسرع ومن غير مفكات ولا كلاكسات ..

[/mark]