النعجه ..... و الخروووووووووف .... قصه واقعية ..
صباح او مساء الجمال .... حسب التوقيت المحلى لقراءة الموضوع ...
ييجى كده من 25 سنه او اكتر ... فى ايام بارده زى اليومين دول .... كان فى عيد كبير و قبل الوقفه كده بكام يوم طلبت من والدتى و انا كنت لسه حوالى عشر سنين ..- انها تشترى خروف علشان العب معاه زى صحابى فى الشارع و كان ليه واحد زميلى عندهم خروف مربوط تحت البيت و كل ما انزل القاه بيلعب معاه .. اقوله عاوز العب معاة انا كمان يقولى لا ده بتاعنا روح خلى ابوك يشتريلك واحد .... كان عيل رخم اوي .....
المهم ..... طلعت انعر لامى ... انا عاوز خروف ... و نزولا على رغبتى امى نزلت تشترى واحد و افتكر انها باعت حاجه دهب من عندها علشان الموضوع ده و روحت معاها .......... و للاسف علشان كان الوقت ضيق و ده موسم ملقناش خرفان كويسه و المهم وقعت عينيه على نعجه جملية
و فروتها غزيرة و بيضه يعنى نعجه لولوة من الاخر ..... و شبطت فيها .... والحاجه اشترتهالى و قالتلى علشان متزعلش يا عم يلا بقى اربطها و جرها على البيت ... يقوم الواد الرخم ده يشوفنى .... يحاول يضايقنى اكتر و ياخد الخروف بتاعه لمكان بعيد شوية فى واحد علاف علشان يشتريله علف و برسيم و يجرجرة وارة .... مش اتنيل انا بقى على عينى و اسكت ... لا عاوز اعمل زية ....... المهم طلبت منها انى اخد النعجه و اروح بيها عند العلاف علشان اشتريلها درة و برسيم و بصراحه كانت نعجه مطعيه و مؤدبة مطرح ما تجرها تمشى معاك ... و ده اللى شجعنى بصراحه .. المهم امى قلقت فى البدايه و قالتلى هتجرى منك ... خلى بالك .. ده كبيرة ... فرديت عليها و قولتلها لا متخافيش ... و حلفتلها بأغلظ الايمان انى مش هسيب الحبل خالص من ايدى ..........
لغايد كده حلو ......... جميل .. للاسف ان محل الراجل العلاف ده كان على منحدر اسفلتى و كان عندة برضه شوية خرفان مربوطين تقريبا بتوع ناس سايبنهم عندة لغاية ما ييجى وقت الدبح ... و كان من ضمن الخرفان دول .. كبش اسود زنجى افتكرته تور فى البدايه ... ليه قرنين كده ... من الاخر متوحش ... المهم الكبش الاسود ده كان حاطط دماغه جوة صندوق العلف و هاتك يا اكل ... بياكل فى اخر زاده .. زى الجاموسه ...
انا وصلت العلاف و معايا النعجه و اشتريت العلف و البرسيم و تقوم النعجه تقول بصوت انثوى مثير : ماااااااااااااااااء
يتنبه بقى الحمار قصدى الكبش الاسود ده لمصدر الصوت و يتفاجأ بالنعجه .... طبعا انا كنت صغير و مش فاهم حاجه و معرفش ان الموقف هيطور بسرعه كده و انا اصلا كنت خايف منه و هو بعيد عنى ... المهم لاقيت بيضرب رجلية فى الارض و بيعمل حركات غريبة .....
و فجأءة و بدون سابق انذار ... قام صاحبنا ده و شد الحبل و قطعه و طار زى التور الهايج بأتجاهى .... تقوم بقى النعجه بتاعتنا الهادية ده و تسلم الاربع سيقان بتوعها للرياح و انا ماسك الحبل و مش مدى اي خوانه خالص ....
الاقى نفسى انا نايم على ضهرى و مسحول على الاسفلت ... و رجليها الخلفيتين بيضربوا فى دماغى و يدوبك متر بينى و بين الكبش الاكسبرس ده و شايفه رافع شفته العليا لفوق .... الله يخرب بيت ابو ك و خلاص هيدوس عليه.... افتكر لو سبت الحبل هاخد علقه سخنه و هتروح النعجه .. المهم.......كنت لابس بلوفر صوف لم كل زباله الشارع ... و الناس كلها ماتت من الضحك .... و يا عينى كان فى واحد شايله بستله ميه الخروف رزعها و طارت وقعت على الارض ... و انا على الحال ده عمال اطلع شرار على الاسفلت تقريبا 200 متر لغايه ما واحد نجدنى و مسك التور ده ... و انا مش عارف فى ايه ؟؟
روحت لامى ودراعى مجلوط و الست النعجه كان عندها انهيار عصبى علشان الانفلات الامنى .... اللى حاصل ده و طبعا العلف كله اتشعتر على الارض هو و البرسيم .....
و طلعت قولت لامى بقى .... انا مش عاوز نعجه ... انا عاوز خرووووووووووووف .....
