السلام عليكم يا احلي اعضاء
معادنا النهارده مع تغطيه وصول الكيا ريو 2012 للكويت و تست دريف سريع للسبورتاج

نبتدي بالريو
بصراحه و بدون مقدمات انبهرت
العربيه حجمها كويس جدا و تصميمها جديد و مميز و مش عارف ليه بيفكرني بالجيتا و الصالون منها عجبتني اكتر من الهاتش خصوصا من الخلف بالفوانيس المقتبسه من الاودي
من الداخل بقي كانت الصدمه الاكبر
طبلوها شيك جدا جدا جدا و بتاع السيراتو جنبه فقير خصوصا باللونين اللي فيه
و كله كوووووم و زراير التكيف كووووم تاني اول مره اشوف حاجه كده في الكاتيجوري دي
بيتر شرايدر عامل شغل هااااايل بصراحه
و مش عايز اقولكم الانريور بتاعها انظف من الاكسبلولر الجديده اللي سعرها 3 اضعاف الريو
بل للاسف المعرض فيه تجديدات و الناس كانت لايصه و زحححححمه و معرفتش اسال علي سعرها
و بصراحه العربيه خيار هاااايل و انا متوقعلها لو اتسعرت كويس في مصر هتنتشر اكتر من السيراتو كمان
طبعا راي ده يتمحور بشكل كلي حوالين التصميم و الشكل و الخامات لكن كسواقه مقدرش افتي لغايه لما اجربها
و لو حصل هبقي اوافيكم بانطباعي ان شاء الله

اسيبكم مع الصور و بعتذر عن عدم تصوير الهاتش باك لاني نسيت















بعد ما اتفرجت و تفحصت الريو توجهت للسبورتاج
و للاسف مكانش فيه و لا واحده معروضه في المعرض
فتوجهت لاقرب مندوب و سالته عنها قالي خلصوا و مفيش الا بتاعت التست دريف
قلتله بسسسسس عايز اعمل تست دريف و قد كان
و حصل حاجه اول مره تحصلي في اي توكيل و هي اني لما اديت البطاقه بتاعتي للموظفه اللي بتملي الابلكيشن بتاع التست دريف لقيتها مدياني المفاتيح و بتقولي العربيه بره
مفهمتش اللي حصل و توقعت انهم هيسيبوني اعمل اللي انا عايزه في العربيه
لكن هيهات طلع ان و كالعاده فيه موظف لازم يطلع معاط بس لحسن الحظ اتاخر فكانت فرضه كويسه اتفحص العربيه

مبدايا عربيه التجربه كانت 2400 سي سي 177 حصان و دفع رباعي و مقدرتش احدد هي انهي كاتيجوري لان مواصفاتها كانت عجيبه
بدون بصمه و العداد العادي و تكيف بكر و كراسي قماش لكن سقف بانوراما
فمبقتش فاهم ايه اللي بيحصل و العربيه كانت عامله 20 الف كيلو و باين عليها الاهانه بحكم انها عربيه تست و كفايه عبق السجاير اللي مليها
كشكل الطبلون بسيط و سهل و بدون علامات تصميمه و كذلك العدادات و بالمقارنه بالهيونداي ال ix35 مثلا الهيونداي فضائيه بالمقارنه مع الكيا
و معجنيش شكل الفتيس و حسيته واطي حبتين و كذلك الكاسيت مبوظ شكل الطبلون كده و يديك احساس بالرخص كده
مساحات التخزين لا باس بيها و كوسع العربيه كويسه لكن بحكم اني اختي معاها اوتلاندر فالقارنه ما بينهم كانت حتميه و هنا تتفوق الاوتلاندر بصراحه
وضعيه القياده كويسه و متوسطه يعني لا تحس انك عالي و لا واطي و اول حاجه تاخد بالك منها صغر حجم الزجاج الخلفي و حتميه وجود سنسور و كاميرا خلفيه في العربيه دي

هنا بقي جه الموظف و ابتدي التست و كان مختصر لان الموظف ده كان مطلوب منه يجيب الفطار لزمايله

المهم ابتديت التست و اول حاجه لاحظتها ان العربيه طلعتها تقيله و شكيت انها 2400 سي سي بصراحه بس الموظف اكدلي ده
و بصراحه مبقتش عارف هل هي طلعتها تقيله فعلا و لا انا اللي اتعودت علي ال 8 سلندر و مش عارف ال 1600 هيبقي ايه بالنسبه ليا
الدريكسيون متوسط النعومه الدقه بيديك احساس لا باس بيه بالطريق
العفشه كذلك متوسطه لا بنعومه الصالون و لا ناشقه زي عربيتي مثلا
كلاكس العربيه عرررررره و لا يليق بعربيه بالحجم ده
طبعا حاولت العب شويتين كده بس الموظف قلق و قلقني
العربيه ثباتها كويس مع وجود body roll جانبي خفيف لما تتنقل بين حارتين فجاه و بالنسبه ليا شخصيا بعتبره تحت الجيد بحاجه بسيطه لكن مع الاخد بعين الاعتبار مستوي العربيه فهو مناسب ليها

للاسف معرفتش اجيب بيها فوق ال 120 عشان احكم عليه احسن و هبقي احاول اروح مره تانيه

و ده كان تقريري البسيط عنها و انطباعي عن العربيه انها مناسبه لسعرها و امكانيتها كويسه لكنها تصلح اكتر كعربيه عائليه او لشخص ملوش في السواقه الرياضيه و اعتقد انها مناسبه للطرق المصريه
و بعتذر ان مفيش صور ليها لان الموظف نزلنا عند التوكيل و راح يجيب الفطار