تقرير عن الاكسبلولر 2012 بناء علي رغبه eng f3lix

**horas3000** · 12-12-2011 06:30 PM

السلام عليكم جميعا

اولا اسف علي التاخير بس المنتدي كان تحت الصيانه و الموضوع مش عايز يترفع

بناء علي رغبه زميلنا
eng f3lix

جايبلكم النهارده تقرير سريع عن الاكسبلولر 2012

اول ما دخلت المعرض كان في 5 عربيات اكسبلولر مرصوصين يمثلوا كل الفئات الموجوده

اول انطباع عن العربيه هو برافو فورد
الشكل يعتبر نقله حضاريه بالمقارنه مع الشكل القديم الصندوقي

و للاسف هنا تنتهي المميزات

اول ما فتحت الباب فاجئني خفه وزنه مع انه شكله لا يوحي بذلك ابدا
و اول ما دخلت لفت نظري جمال الطبلون لكن اللي نفرني هو كميه البلاستيك المستخدمه
الانتريور كله بلاستيك و لا يوحي بالفخامه
و احلي حاجه فيه الكاسيت و اللي في منه 3 انواع 2 منهم تاتش بس
و كنت لسه شايف الريو الجديده و اقدر اقول طبلوها يوحي بالجوده و الفخامه اكتر من بتاع الاكسبلولر
الكراسي كبيره لكن مش مريحه اوي و استغربت من ده لان التورس مثلا فيها كراسي مرييييحه جدا و ناعمه بشكل لا يوصف لكن الاكسبلولر مش قوي
القماش منها عادي لكن الجلد و علي الرغم انه لونين لكن مش عارف ليه لا يوحي بالفخامه
نيجي بقي للقعده في الصف التاني
مش عارف ازاي عربيه بالحجم ده و تبقي ضيقه كده
طبعا الصف التالت ده للاطفال بس و شايف انه ملوش لازمه
بصراحه العربيه خيبت امالي
مع انها في الاعلانات عاملين يقولوا هتبهرك هتبهرك لكن مشوفتش حاحه
و الاسعار بقي هبل رسمي الفئه الاولي بحوالي 9000 دينار و الاعلي ب 15 الف
و المبالغ دي تجيبلك طوارق او اكس 3 او انفنتي مستريح
ده غير ان المنافسين الامريكان زي التاهو و اليوكن ارخص من كده

و لما جيت اسال عن التست دريف اتقالي ان العربيه مش موجوده و اتحور في الكلام
و بصراحه مكنتش متوقع كتير
و لما رجعت و شفت ريفيوهاتها علي النت اتاكدت
بيشتكوا من الثبات و ضعف المتور
يعني كده كملت

بصراحه كنت حاطط توقعات عاليه للعربيه دي لكن للاسف و كعاده الامريكاني معايا كلها ذهبت هباء

و في الاخر و بكل خيبه امل اسيبكم مع الصور

**horas3000** · 12-12-2011 07:35 PM

المشاركة الأصلية كتبت بواسطة eng f3lix

بشكرك جدا يااستاذي العزيزشريف على التقرير الجميل ده
العربية بصراحة مشدنيش حاجة فيها غير شكلها الخارجي ومكنتش لاقي على النت صور ليها من جوا

وطبعا بثق في راي حضرتك جدا وللاسف انا هقول لوالدي يصرف نظر عنها لانه بيحب ال 4 wheel اكتر من السيدان وبيحب الفورد لدرجة ان دي تالت فورد اكسبلورر هيجيبها
انا نصحته طبعا يجيب حاجة تانية زي اللاند كروزر او الباترول بس هو غاوي امريكي من زمان
ونصحته كمان يشوف الدودج دورانجو الجديدة بصراحة عربية وهمية جدا
ياريت لو وصلت الكويت تدينا تقرير صغير كدة عنها ومقارنة سريعة بينها وبين الاكسبلورر ... معلش هتعب حضرتك مرة كمان بس ده لاني بثق في كلامك وزوقك يااستاذ شريف
وشكرا مرة كمان على التقرير

العفو يا باشا
و هي بصراحه شكل بس

بص لو والدك متعود عليها و معاه الشكل القديم فدي هتبقي طفره بالنسبه للي معاه
بس انا اكمني متعود علي الالماني فالمعاير عندي عاليا شويه
فهو لو عاجباه وعاجبه سعرها الخزعبلي ده يبقي مبروك عليه

الدوانجو هي كمان نزلت من زمان
و رحت شفتها و راي فيها ميختلفش كتير عن الاكسبلولر
نفس الكلام بالظبط
البلاستيك الكتير و حجم كبير و مساحه عاديه
يميزها بس ان الطبلون بتاعها احسن من الاكسبلولر سنه لانه هو هو بتاع الجراند شيروكي

و في الخليج الفورد احسن من الدودج
و الجمس و الشفورليه احسن منهم هما الاتنين

و بص الامريكاني ده اصله ادمان اللي بيتعود عليه مبيعرفش يسيبه
فمهما قولتله باترول او كرزور مش هيعجبوه لان الكونسيبت بينهم مختلف
العربيات الامريكاني عفيه و ناااااااعمه جدا و ده مش موجود في الياباني قوي
و عشان تلاقيه في الالماني او الاوروبي لازم تشخشخ جيوبك كتييير

فزي ما قلتلك طالما والدك متعود عليه مش هيعرف يغيره ابدا

**m_elkhishin** · 12-12-2011 07:54 PM

المشاركة الأصلية كتبت بواسطة horas3000

العربيات الامريكاني عفيه و ناااااااعمه جدا و ده مش موجود في الياباني قوي
و عشان تلاقيه في الالماني او الاوروبي لازم تشخشخ جيوبك كتييير

**egytamer** · 12-12-2011 11:49 PM

الله ينور هي دي الريفيوهات الي مستنينها الواحد زهق من ال 1600 سي سي خلينا نخش علي التقيل وياريت الاستاذ حورس3000 يعملنا ريفيو للكاين ربنا يباركلو فيها.
وشكرا مقدما.

**horas3000** · 13-12-2011 08:41 AM

المشاركة الأصلية كتبت بواسطة egytamer

الله ينور هي دي الريفيوهات الي مستنينها الواحد زهق من ال 1600 سي سي خلينا نخش علي التقيل وياريت الاستاذ حورس3000 يعملنا ريفيو للكاين ربنا يباركلو فيها.
وشكرا مقدما.

يا زعيم في من ده كتييير
انت بس فر في مواضيعي كده و ستجد ما يسرك

اما التقرير عن الكايين بقي
فطبقا لاستفتاء عملته قبل كده اغلب الاعضاء مش عايزه مواضيع زي دي
فبصراحه كبرت دماغي
كمان و الحق يقال راي مش هيبقي حيادي فيها لانها عربيتي

**horas3000** · 13-12-2011 08:02 PM

المشاركة الأصلية كتبت بواسطة eng f3lix

استاذ شريف بشكر حضرتك مرة كمان على المجهود الجميل ده
وبصراحة انا كدة احترت اكتر
يعني من الاكسبلورر للدورانجو ياقلبي لا تحزن والجراند شيروكي نفس الكلام طبعا
هو كل الامريكي ال suv كدة في الخامات ولا في حاجة احسن
اعتقد احسنهم هيبقى ال لينكولن نافيجاتور بس دي غاليا تيييييييييييييييييييت في قطر
والفكرة بقى ان والدي مش بيحب الشيروكي خالص كاجديد وقديم والمقارنة كلها بين الدورانجو والاكسبلورر
والموديلات اللي كانت معاه قبل كدة هيا 97 و 2006 وطبعا بيحب يغير كتير العربية
يبقى هقوله اتكل على الله واحجز الاكسبلورر مع انه كان قال على المرسيدس ال glk وقولتله تحفة طبعا بس للاسف مش كتير هناك علشان كدة صرف نظر عليها والعربية متعتبرش عربية off road زي الباقي دول

العفو يا باشا
و للاسف كل الامريكي خاماته كده
العدل اللي فيهم هي الاسكاليد و دي طبعا سعرها معدي
و زي ما قلتلك طالما معاه ال 2006 الجديده تعتير طفره
بس انا بصراحه مستغلي سعرها قوي بس لو عاجباه خلاص
و الدوارنجو انظف سنه و ارخص بس ملهاش سوق في الخليج و سمعتها مش هايله بس برضه لو عجبته اكتر من الاكسبلولر يبقي ليه لا
و نصيجه خليه يبص علي الطوارق
بسعر الاكسبلولر و احلي و افخم و انظف منها بمرااااااحل
و امان و اداء و كللللللل حاااااجه بس طبعا مش براحه الامريكاني
لانه انت عارف عشان الثبات العالي لازم عافشه ناشفه بس عموما هي مش حطب

-

-

-

الموضوع: تقرير عن الاكسبلولر 2012 بناء علي رغبه eng f3lix

LinkBack

أدوات الموضوع

عرض

تقرير عن الاكسبلولر 2012 بناء علي رغبه eng f3lix - انشر الموضوع فى :

-

-

-

-

-

المواضيع المتشابهه

أرباح الوكلاء بناء على تقرير مصلحه الجمارك المنشور بالاخبار

الكلمات الدلالية لهذا الموضوع

المفضلات

المفضلات

ضوابط المشاركة