الموضوع: صيانة 15000 كم ونداء الى السبع

السلام عليكم ورحمة الله

في البداية أنا بصراحة محرج جدا من جميع الصقور لتقصيري في القسم لدرجة إني حاسس إن الإعتذار عن التقصير هو كمان بقى محرجلي

المهم أنا بصراحة تقليدي جدا وصعب إني أغير من عاداتي بسهولة وعلى الرغم من إني كنت عارف إن فريق من الصقور كان رايح يعمل صيانة في إوتواجيبت بقيادة كبير القسم استاذنا احمد مصطفي وكنت خلاص قررت إني أروح معاهم (علشان أتعرف عليهم بالأخص) إلا إن عادتي غلبتني وقولت أروح السبع.

وعلى الرغم إني شايف معظم الصقور بدأ يغير للزيوت الجديدة "فولفولين وليكوي مول و..." وكنت خلاص قررت أجيب ليكوي مول إلا إن برده عادتي غلبتني وقلت الشل ألترا أهو مننا وعلينا وبلاش كل الناس تهجره مرة واحدة وخليني أنا أخر واحد.
المهم وعلشان مطولش عليكم أنا روحت النهاردة صيانة 15000 كم في السبع والحمد لله مكنش عندي شكاوى تذكر بس في نداء حابب إني أوجه لمركز السبع توكيلي المفضل من خلال نايل موتورز مش من باب النقد ولكن من باب إن الواحد نفسه المركز دا يحافظ على مكانته وسمعته اللي كلنا عارفينها خاصة في ظل وجود منافس قوي جديد وهو اوتو اجيبت ونبدأ في الملاحظات:

• ما شاء الله الناس في الاستقبال زوق جدا وبيستمعوا لكل ملاحظاتك أثناء استلام العربية ويأكدوا لك إن كل حاجة هتتعمل زي ما الكتاب بيقول وأكتر لكن للأسف المقابلة دي والنقاش اللي بيتم فيها لا يتم نقله للفني اللي بيقوم بعمل الصيانة ولكن أعتقد إن اللي بيتم نقله للفني هو فقط اللي اقتنع به مهندس الاستقبال وكتبه في أمر الشغل لكن أي حاجة تانية قالك هعملها ومكتبهاش في الأمر فلا يتم فيها شيء يعني مثلا أن كنت كاتب ملاحظاتي في ورقة واتناقشت فيها مع المهندس والراجل مشكورا أرفقها بأمر الشغل بس لما دخلت للفني أسأله عن الحاجات اتعملت ولا لأ الراجل برده وبمنتهي الزوق قالي أمر الشغل مش مكتوب فيه حاجة وراح سأل المهندس وبصراحة عمل حاجات وحاجات مش عارف أتعملت ولا لأ

• حاجة صغيرة مش عارف ليه المركز مصمم على أنهم يزودودا 3 لتر زيت مش 2.7 لتر (مش بقولك ان انا تقليدي) مع إني كاتب دا في الورقه الا ان المهندس لقيته بيسألني باستغراب ليه فقلتلله المنوال بيقول كدا دا غير ان اول مرة لما وضعت 3 لتر كان فيه ترشيح زيت على جسم الماتور والحمد له اختفى لما وضعت بعد كدا 2.7 لتر وعلى الرغم من إني كاتب في الورقة واتناقشت مع المهندس الا إني الحمد لله لحقت الفني في آخر لحظه وهو كان هيحط ال3 لتر كلهم وكنت حاسس ان الفني مستغرب من اللي انا بعمله
  

• بصراحة المركز عاملين نظام كويس إن مفيش حد يستلم عربيته الا لما ياخد تصريح خروج من الكاشير ويسلمه لفرد الأمن واعتقد دا لضمان حاجتين إن يتأكدوا ان العميل دفع الفاتورة والتاني ودا أهم إن يتأكدوا إن العميل استلم عربيته بنفسه خاصة في أيامنا دي وربنا يسترها معانا جميعا أحسن حد يروح يستلم عربية عميل وياخدها ويمشي والعميل مش داري ولكن للأسف اللي حصل إني روحت أخذت العربية بعد غسيلها ومحدش سألني عن التصريح ولا حتى اتأكد إن دي عربيتي بمعنى إن لو لا قدر الله واحد راح عند الغسيل وقالهم دي عربيتي الناس مشكورين هيسلموه العربية

لو في حد من السبع اهتم وطلب أي بيانات ممكن أرسلها لأحمد مصطفى فقط على الخاص وبشرط إن ميبقاش في ضررعلى حد.


أنا اسف طولت عليكم جدا بس انا كل فين وفين على ما بكتب حاجة يمكن من السنة للسنة ، المهم أرجوا اني مكنش عملت إزعاج لحد أو حد زعل مني


وأخيرا بأكد إن ملاحظاتي دي مش نقد لمركز السبع بقدر ما هي رغبة مني إن المركز يبقى دايما في المقدمة زي ما عودنا دايما