الموضوع: اول تقـرير بالصور عن مركز أوتـو ايـجـيبت الجـديد وصيانة ال90000

السلام عليكم و رحمة الله و بركاته

تم حجز صيانة 90000 كيلو لعربيتى النيسان يوم السبت 10-12 و كان الميعاد 10 صباحاً و كالعادة كنت هناك على الساعة 11 صباحاً "و ده لآنى كييف توهان " و دخلت ساحة الانتظار

و تم ازالة المتعلقات الشخصية و وضعها فى شنطة شيك جداً مكتوب عليها أوتو ايجبت و دخلت الاستقبال علشان اقابل المهندس اللى حيستقبال العربية وطبعاً لقيت احمد تى فى مستنى حسب الميعاد وكان منتظرنى فى المركز و طبعاً هرانى تليفونات بس تليفونى مكانش معايا لآنه بايظ.

المهم دخلت على موظف الاستقبال موظف محترم جداً و أدانى رقم و قعدت فى الاستراحة دقيقة لقيت الشاشة مكتوب عليها شباك رقم 3 "المهندس أحمد"

قعدت مع مهندس الاستقبال أحمد عند العزيز و سمع منى كل مشاكلى و حدد ميعاد الاستلام و اللى حيتم فى العربية و حدد كمان ان فى ساعة راحة من 12 لحد 1 الضهر و ادانى كوبون مجانى لعدد 2 مشروب ساخن و وجبة خفيفة "باتيه ، ...."


المهم تم استلام العربية و دخلت الورشة رقم (1) للصيانة علشان ورشة رقم (2) للأعمال الثقيلة "سمكرة و دوكو و خلافه "




دخلت أنا وأحمد تى فى صالة الانتظار و ضربنا القهوة و الباتيه فى صالة واسعة و فيها شاشة بتحدد اللى اتعمل فى العربية و لوحين زجاج علشان تتفرج على اللى بيحصل فى العربية و انترنت مجانى و طبعاً جرايد

و طبعاً بالإضافة لحجرة المدخنين و صالة لعب للأطفال

و بعد القهوة و الباتيه خدنى احمد تى فى الورشة علشان نتفرج على المعدات و النظام و بعد الجولة ما خلصت وقفنا نتكلم مع مهندس شاب و محترم جداً و فاهم جداً و بيتحاور معانا بكل بساطة عن العربية النيسان و بعد ما مشى بسأل الأستاذ أحمد مين المهندس ده رد بكل بساطة ده العضو المنتدب لشركة أوتو ايجبت!!! فتخيلو قمة البساطة والذوق اللى فيه

المهم .. للأمانة انا كان عندى المقصات قدام عايزة تتغير و نسيت أقول لمهندس الاستقبال أحمد عبد العزيزعليهم لقيت المهندس أحمد جاى بيقولى المقصات قدام عايزة تتغير و الطنابير اللى ورا كمان فيها ريجة و عايزة تتغير بس المقصات ممكن تستنى بس الطنابير ما ينفعش تتغير. قلت له على البركة غيرهم هما و التيل الخلفى

علشان ما أطولش عليكم
جه ميعاد التسليم و الحساب كان الحساب كالتالى :

المصنعيات

صيانة 90000 0.75 جنيه

مصنعية تركيب الطنابير 105.00 جنيه

مصنعية تركيب التيل 30.00 جنيه

مصنعية الكشف على ترموستات الكوع 15.00 جنيه

خصم نايل موتورز على المصنعيات 22.57 جنيه

إجمالى المصنعيات 128.18 جنيه

ضريبة المصنعيات 12.80 جنيه

قطع الغيار

الطنابير ×2 946.00 جنيه

التيل الخلفى ×2 357.00 جنيه

تشحيمات 15.00 جنيه

ماء ريداتير 14.00 جنيه "باقى الكيلو فى شنطة العربية"

خصم نايل موتورز على قطع الغيار 195.45 جنيه

إجمالى قطع الغيار 1136.55 جنيه

ضريبة قطع الغيار 113.65 جنيه

إجمالى المصنعية + قطع الغيار 1264.73 جنيه

إجمالى الفاتور +الضريبة 1391.18 جنيه

بعد دفع الحساب قمت بحجز صيانة يوم 11-12 لتثبيت التابلوه " لو حد فاكر مشكلة السخونة فى احد مراكز الخدمة الاخرى كنت غيرت سربنتينة التكييف اللى فى صالون العربية و كان لازم يتفك التابلوه فالما اتفك محدش قفلة مظبوط .. فقولت فرصة اقولهم عليها فى اتو ايجيبت عشان اعملها بالمرة "

شكل التابلوه قبل التثبيت

بعد التثبيت

وقت التثبيت حوالى ساعة و نصف

الحساب

المصنعيات

مصنعية تثبيت التابلوه 150.00 جنيه

ضريبة المصنعيات 15.00 جنيه

إجمالى المصنعيات بالضريبة 165.00 جنيه

لقيت مهندس الاستقبال بيقولى مش حتدفع حاجة بمناسبة الافتتاح و علشان خاطر Nile Motors و فعلاً رحت للكاشير خد الفاتورة و أدانى تصريح خروج.

أرجو مكنش طولت عليكم