الموضوع: عيال اخر زمن...... قال ساحرة شرير قال ............

صباحكم ... حمادة بالجنزبيل .... على رأى مكي ...
بصوا بقى .....انا هحكيلكم من الاول .... اللى كنا بنعمله فى اهالينا هيطلع علينا .....
ظبت منبه الموبايل على ارخم و اغلس نغمه فيه الساعه 7.30 صباحا و دخلت تحت البطانية الساعه 1 بليل و بمجرد ما حطيت راسى على المخدة غطست فى نوم عميق من اثر الشقاء اليومى ....
يرن المخروب ده على النغمه الغلسه الساعه 7.30 و انا نايم دفيان و كتيان و عمال اقنع نفسى انى بحلم و الساعه لسه 12 بليل ... و يسكت طيب كويس مفيش 5 دقايق و ترن النغمه تاني ... الله بقى و بعدين ... افرك عينى و ابص فى ساعه الحائط اللى قدام السرير .. لافاجأ ان المنبه صح .. فعلا الساعه 7.35 .. اتخيل بقى المدير المالى .. صاحبنا ده واقف و حاطط النضارة على طرطوفه مناخير و عمال يرقص حواجبه ... و ماسك القلم الاحمر و دفتر الحضور و الانصراف ..ايه الكابوس ده ...انا لازم انفد بجلدى علشان العلاج ببلاش .. المهم قمت طرت على التواليت السيراميك متلج .. فين الشبشب ...قتحت ( المدش ) على رأى الواد سيف ابنى .... و قعدت اضبط الميه لا لالالالا يحححح سخنه شوية .... لالالالا كده سقعت .. ايوة كده مظبوط ..اخت الدش التمام و اتوضيت و خرجت صليت الصبح ... و قولت بقى اصحى العيال علشان المدرسه ...
دخلت اوضه العيال ... لقيت الولد الكبير لافف نفسه بالبطانيه زى صباع المحشى مش عارف راسه من رجلية ..... و الصغير عرقان و عمال يتنفض شكله كان عندة كابوس هو كمان .... المهم .. صحيت الكبير بهدوء و قام معايا و جيت على الصغير .....اللى هو مشرف على يمينكم فى الشاشه ده
قوم يا سيف ... يا حبيبى .. المدرسه .... اصحابك مستنينك هناك ...
يقوم مزعور : لالالالا مش رايح المدرسة .... الساحرة الشريرة ....
انا : يا بنى ساحرة ايه على الصبح؟؟؟.... ايه الجنان ده ؟؟؟... و موجه كلامى لامهم اللى فى المطبخ ... انتى اكلتيهم ايه امبارح....؟؟
انا : ايه يا سيف فى ايه ..... مالك ..هو بعياط او يعنى بيمثل انه بيعيط : اةةةةةةةةةةةة ... الساحرة الشريرة راكبه المقشه و طايرة فوق المدرسه ....
ساحرة ... و كمان شريرة .... و بضحك ... الله يخرب بيت كده ... يابنى مفيش الكلام ده ... قوم يابنى مفيش وقت .....
الواد الكبير بقى فطسان على نفسه من الضحك .... قوم يا سيف بقى مش عاوز دلع ...
الصغير : لالالالالالالالا مش هروح المدرسه ... ان شفتها ... الشريرة ... انا : يا عم بطل هطل ... ده انت كنت بتحلم يلا يا ماما تعالى لبسيه ...
و هو راسه و الف صرمه انه ميرحش المدرسه .... و علشان متأخرش انا كمان سبته و نزلت على الشغل ....
من كام يوم يوم بقى ... بقول للصغير ... عملت الواجب ... يرد المسفوخ و بيقولى : انت هثكت ولا اجيب الحزام ؟؟؟؟
المفارقة الساخرة بقى ... ان الكوبيس ده بتيجى بالوراثه ........ فى كده بزمتكم ؟؟؟؟

ربنا يباركلك فيهم و يحفظهم , بس احتياطى خلى بالك من الساحرة الشريرة