هل أبتدى أقلق أن ده مش دور برد عادى؟

السلام عليكم, لو حد من ألأخوة ألأفاضل الدكاترة فى المنتدى يدينى رأيه هل أبتدى أقلق ولا لأ:
أنا عندى دور برد غريب عمرى ما جالى زيه فى حياتى بدأ معايا من يوم السبت يعنى النهاردة خامس يوم . أبتدى بسخونة و بعدين كحه خفيفة والسخونة مستمرة لغاية اللحظة ديه.. رحت لدكتور كتبلى(Cetafen plus-Hibiotic 1gm-Bronchophanen) أبتديت كورس العلاج بس من تانى يوم علاج و راحة فى البيت بدأ معايا ألتهاب بشع بالزور و الكحة زادت و الحرارة مستمرة, بتنزل 37 فقط لما باخد مخفض الحرارة(عندى ترمومتر فى البيت و بقيسها و بتتراوح ما بين 38- 39 ) و السخونة لما بتيجى بتيجى بطريقة غريبة..أن أيدى بتتلج بمعنى بتتلج و راسى تبقى زى النار. للأسف الدكتور بتاعى نزل أجازة و مش عارف هل أبتدى أتجه لمستشفى أشوف ايه الحكايه ولا أيه رأى حضراتكم. مع العلم أنى ممكن فى خلال اليوم أحس انى معنديش أى حاجة و أحس أنى خلاص خفيت و بعدين فجأة السخونة تقلب عليا تانى بصداع شديد و شعور بالبرد و عدم القدرة حتى على الحركة
مع العلم أنى سابقا عمرى ما باخد أدوية لو جالى دور برد عادى, عادة باعتمد على الحاجات الطبيعية من ليمون و عسل و خلافه.
و جزاكم الله خيرا

+1 مع التهاب في الشعب الهوائية وبقالي اكتر من 21 يوم

عمري ما جالي دور برد زي ده

بالاضافة للاولاد 4 و5 سنوات واولاد اخواتي واخوتي

في حاجه مش طبيعية ياريت اللي عنده معلومة يطمنا

بتاخد المضاد بقالك قد ايه؟
المفروض بعد 3-4 ايام السخونه تروح ... اللى بيحصل ان فيروس الانفلونزا السنادهى مختلف و بيدى اعراض كتير ... تبدأ بعطس و تقلب كحه و شويه زور و ممكن بطن و اسهال ... و طبعا ده بيدى فرصه للبكتيريا تشتغل فالواحد بيسخن و يحتاج مضاد حيوى ... بعد كام يوم من المضاد المفروض البكتريا تموت و السخونه تروح ... بس اعراض الفيروس ممكن تكون لسه موجوده شويه بس هتروح ...
السنادى الدور طول و ممكن يقعد عشر ايام و يا مزاجه مع الاطفال بيسلمو بعض الدور و بتبقى حاجه سيئه جدا ... الولاد عندى علا فى شهر اخدو الدور مرتين من بعض ...
ربنا يستر على الجميع

جزاكم الله خيرا على الردود. أنا بقالى 3أيام باخد المضاد الحيوى(الكورس اللى الدكتور كاتبه 8أيام) فعلا يبدو أن المضاد أبتدى يشتغل(على الحرارة فقط انما بقية ألأعراض فى ازدياد من كحة و ألم فى الصدر مع الكحة و التهاب زور ), النهاردة بفضل الله أول يوم أقيس الحرارة و أللاقيها شبه طبيعيه 37.5 بدون خافض الحرارة بس برضه لسه قلقان منها تعلى تانى باليل . يارب يشفى الجميع و مايكتبش الدور ده على حد .

كمل كورس المضاد و ان شاء الله الحراره على بكره هتكون طبيعيه و باقى الاعراض عليك و على البانادول و الكونجستال و ادوية تهدئة الكحه (البرونشيكم ممتاز) ربنا معاك و يشفيك

شفاك الله و عافاك
الطبيعى لو تم استجابة الميكروب للمضاد الحيوى تنزل الحرارة بعد 48 ساعة من بداية اول جرعة
و اذا لم يحدث نزول فى الحرارة يبقى المضاد غير مؤثر و يجب تغييره !!

اقتباس:

---

المشاركة الأصلية كتبت بواسطة د.أحمد السعيد

شفاك الله و عافاك
الطبيعى لو تم استجابة الميكروب للمضاد الحيوى تنزل الحرارة بعد 48 ساعة من بداية اول جرعة
و اذا لم يحدث نزول فى الحرارة يبقى المضاد غير مؤثر و يجب تغييره !!

---

جزاك الله خيرا يا دكتور...للأسف زى كل يوم .. بالنهار النهاردة حسيت بتحسن و قرب الليل الحرارة ترجع تانى 38....هاتجه للمستشفى لمراجعة العلاج . شكرا لكل من تفضل بالرد و المشاركة.

لو تحب اوصف لك علاج آخر ... بس تقولى على الاعراض بالتفصيل
انا عارف شارم خميس و جمعة الدكاترة مش متواجدين !!

الشتاء الماضى جالى نفس الدور من الوقوف فى الشارع ليلا خلال اللجان الشعبية و إستمر معى 17 يوما بدون تحسن لدرجة أننى كنت أصلى و انا نائم فى اسرير و كنت اتناول المضادات المعتاد عليها فى كل نزلة برد و لكن دون جدوى
و تحاملت على نفس و نزلت مع إبنى لمستشفى قريب من المنزل و كتب لى الدكتور حقن جارامايسين كل يوم حقنة فى العضل 500 مج
فى اليوم الثالث بدأت أشعر بتحسن
لاحظ أن إرتفاع الحرارة المستمر لا يمكن السكوت عليه بالإضافة للأدوية أنصحك بعمل كمادات مياه باردة على الجبهة
ربما تلاحظ ان إرتفاع الحرارة يكون مصحوب بكوابيس أثناء النوم و أحلام مفزعة .

اقتباس:

---

المشاركة الأصلية كتبت بواسطة د.أحمد السعيد

لو تحب اوصف لك علاج آخر ... بس تقولى على الاعراض بالتفصيل
انا عارف شارم خميس و جمعة الدكاترة مش متواجدين !!

---

جزاك الله خيرا يا دكتور ربنا يجعله فى ميزان حسناتك, أنا بعد أخر مشاركة لما رديت على رد حضرتك فى الموضوع و بأن المضاد لازم يتغير طلعت مباشرة على مستشفى جنوب سيناء كشف عليا الدكتور هناك كشف دقيق فعلا و سألنى أسئلة كتير و قاللى عندك "انتكاسة " و كتبلى كورس علاج جديد فيه مضاد حيوى تلات أقراص فقط على تلات جرعات حتى مش فاكر أسمة دلوقتى لأن العلبة فى البيت . بفضل الله اتحسنت من امبارح كتير و الحرارة أنتهت و بطلت أخد مخفض الحرارة"دانا خدت كتير أوى منه". الصحة نعمة كبيرة . الحمد لله

انا كنت داخل اكتب فى الموضوع ده انا كمان عندى التعب ده تعب غريب اوى
بدأ من خمس ايام بشكه فى الصدر فى الشمال وانا صاحى من النوم و اتكررت تانى يوم
من 3 ايام بالظبط وانا راجع بالليل السخونيه زادت اوى و بقيت برتعش والحراره كانت 39
اخدت سيبروسين 500 و ابيدروكسيل 1 جم و فوار كاتافاست 50 صحيت تانى يوم الى حد ما كويس
طبعا فيه كحه غريبه جايه من الاعماق بس مش مستمره ورشح
امبارح الصبح مش قادر وكنت بالليل كويس وحرارتى كويس
النهارده نزلت الشغل و راجع مش قادر والحراره رفعت تانى 38 وباخد مضادات حيويه 1 ونص جرام و بروفين و اخدت قرصين سيتامول وكونجستال و فلورسيت من الصبح ولحد دلوقتى ولا اى تحسن
حراره بتروح وتيجى و جسمى مكسر
الواحد مش عارف يعمل ايه اكتر من الى بياخده وبيعمله
لسه ما جربتش حقنه الاسباجيك ربنا يسهل لما اشوف بالليل

يا نهاااار انا عندى الدور دا بقالى كام يوم وروحت لدكتور كتبلى مضاد سيبروفار 500 وابيمول و سيتراك للحساسية ودرجة حرارتى بقالها كام يوم عالية مابتنزلش عن 37.5 فى احسن الظروف مع تكسير العضم والجسم ياريت اللى جاله الدور دا يقوللى خف منه ولا لا وخد ايه وبيقعد اد ايه لان ورايا شغل ؟؟

بص يا باشا من الاخر انا ما رتحتش غير بالراحه يومين فى السرير وتاخد قرصين باراسيتامول كل 8 ساعات او كوميتركس بتاع البرد فيه بارسيتامول مع اى مضاد حيوى كوقايه ولو السخونيه زايده و تعباك ممكن تزود قرص بروفين او اولفين اى حاجه من الحاجات دى و تشرب سوايل كتير على اد ما تقدر وبلاش تاكل لحوم او فراخ كله سوائل وربنا يشفيك انا ما كنتش مصدق انى هعدى منه

الف شكر لحضرتك بس بجد حاجة غريبة الدور دا انا \ول عمرى بيجيلى برد عمره ماجالى بسخونية وتكسير جسم كان بس شوية احتقان وكحة ورشح وشكرا بس واضح انه منتشر اوى اليومين دول لانى لاقطه من واحد معايا فى الشغل

زوجتي تعاني الأن من نفس الأعراض ونفس دور البرد

ابتدت الأعراض يوم الخميس الماضي 9-2-2012 (اليوم الأثنين 13-2-2012)
اول حاجة دوخة وترجيع وهبوط شديد ادي الي شبه فقدان في الوعي
بعدها سخونة بشكل مبالغ فيه
اخدت ديوروسيف كبسول و ابيمول اكسترا
مفيش تحسن

الحالة تزداد سوء

اصبح الأن سخونية رهيبة وتكسير في عظام الجسم والأطراف
مفيش رشح
كحة خفيفة
صداع لا يحتمل

اتصلت بالدكتور وجه كشف في البيت
كتب سيبروباي 500
دوا للكحة
ابيمول اكسترا - كمسكن وخافض للحرارة

الحالة ازدادت سوء
اتصلت بالدكتور وغير المضاد الحيوي بأخر
كتب راماتيكس 1 جم امبول كل 12 ساعة
حقن فولتارين للسخونية بردو كل 12 ساعة

انا بنفسي بديها الحقن بأنتظام
لحد دلوقتي اخدت الحقن 3 مرات فقط من اصل 10 حقن علي 5 ايام

ارجو الأفادة

هل دة فعلا دور ماشي زي ما الدكتورة بتاعة الصيدلية طمنتني ؟؟ ولا دي حاجة تانية ؟؟؟

برجاء الأفادة الله يخليكم

والله المستعان
،
،

ربنا يشفيها ان شاء الله يا باشا
بص كمل بالسيبرو ال500 مع الراميتاكس الى هو السيفوتاكس
و الراحه وسوايل كتير طبعا
مع بارامول قرصين كل 12 او 8 ساعات وممكن تدى كومتركس او كونجستال مرتين كل 12 او 8 بس

اقتباس:

---

المشاركة الأصلية كتبت بواسطة medicalist

ربنا يشفيها ان شاء الله يا باشا
بص كمل بالسيبرو ال500 مع الراميتاكس الى هو السيفوتاكس
و الراحه وسوايل كتير طبعا
مع بارامول قرصين كل 12 او 8 ساعات وممكن تدى كومتركس او كونجستال مرتين كل 12 او 8 بس

---

ربنا يخليك يا دكتور

وشكرا علي الرد

والله المستعان
،
،

الف سلامة للجميع وربنا يجيب الشفا
والصحة تاج علي رؤوس الاصحاء لا يراه الا المرضي
افتكاره رحمة