الموضوع: وقفت بس معرفش ازاي !

في مؤتمر طبي من الصبح
دماغي صدعت من النقاش مع الدكاترة وما شابه
اتغديت بعد ما خلصت وكله تمام وخلاص
خدت الدائري من طريق السويس
الطريق ماشي كويس جدا لحد نفق السلام الزحمة المعتادة لحد مؤسسة الزكاة
انطلقت مرة تانية والطريق ماشي كويس
السرعة المتوسطة 90 لا بتزيد ولا بتقل عشان مش بحب اجري على الدائري
نقترب من نزلة المرج
سوبرجيت جاي ورايا بينورلي العالي بتاعه قلت اتقي شره قمت موسعله عدا بسرعة اكبر مني يعني تقريبا ماشي 110
عدا قدامي وادا اشارة ونزل قدامي
فجأة يفرمل بقوة
انا على 90
ورايا عربية نقل !
المشكلة مشكلتين ازاي هقف دا اولا والنقل اللي ورايا دا هعمل فيه ايه لأن المسافة بيني وبينه انا واثق انها عمرها ما هتوقفه وكمان المسافة اللي بيني وبين السوبر جيت مستحيل توقفني
اتخذت القرار اني هفرمل بأقوى ما عندي بس الكاوتش ميكسحش معايا عشان مافقدش السيطرة على العربية
شمالي انا بالظبط فاضي بس شمال السوبرجيت مشغول
فرملت ونزلت من 90 ل 20 في زمن غريب
والعجيب ان العربية وقفت !
انا حقيقي معرفش هي وقفت ازاي !
متوقعتش انها هتقف انا قلت ههدي قدر الامكان عشان اهدي من قوة التصادم والخساير بس انما متوقعتش انها هتقف خالص !
النقل ورايا بحرفية عالية جدا قام مفاديني وجاي على شمالي !
انا طبعا بفرمل ومتابعه في المرايا ومركز معاه عشان برده احاول اخليه ميخبطنيش!
ربنا أراد اني اقدر اتوقف وان النقل يفاديني بشيء من الاعجاز البشري اللي تدخلت فيه العناية الإلهية !
طبعا شاورت للراجل واعتذرتله رغم ان اللي غلطان في كل دا سواق السوبر جيت اساسا !
طبعا بعد ما وقفت شميت ريحة شياط جامدة جدااااااااااااااااااااااا ا
عرفت انه تيل الفرامل طبعا لأن الكاوتش مكسحش معايا فمش ريحة الكاوتش دي ريحة التيل
يا ترى ايه وضع التيل كده ممكن يكون حصله حاجة؟!
هو كدة كدة انا متوقعله يمشي في حدود 3000 كم عشان قرب يخلص !
متجروش يا شباب الله يكرمكم وخليكم 90 كويس في حدود الامكان والتفادي !