مشكلة فى فتيس هوندا 2011

**amgaddodda** · 15-12-2011 02:18 AM

من غير ما أطول عليكم بس فعلا ارجو الافادة من اصحاب الخبرة
انا معايا هوندا 2011 مش عاملة حتى 4500كم
المهم نصيبها عملت حادثة فى الوش وغيرت سرابنتينة التكييف والريداتير والاكصدام والصدر المهم بعد ما خلصت السمكرة وجربت اورد لقيت قبل ما ادور ان زيت الفتيس ناقص حوالى كيلو ونصف وبصيت على العربية من تحت التسريب من فين موصلتش لحل
رحت دورت وجربت امشى بيها لقيت النقلات بتخرف فى الفتيس بالذات على اول غيار بتنتش او تفرمل مرة واحدة عند سرعة 4 او 5 كيلو
او rpm يعلى عالفاضى كأنى على n
جربت امشى على D3 مشيت كويس رحت لميكانيكى عندة جهاز تحديد العطل لقى اللمبة الصفراء منورة شيك انجين قام طفاها بالجهاز وقاللى بلوف الكلاتش وفرق الضغوط فى مشكلة فى الفتيس
واما طفيت ودورت اللمبة الصفراء نورت تانى قدامى والفتيس عمل نفس المشكلة تانى
وقالى دى جابت كنترول فتيس
كلمت التوكيل بالموبايل برقم 19811 سالتة على الكنترول دة سعرة كام قالى مفيش حاجة اسمها كدة دى كلمة عامة وممكن الجهاز دة ميكونش بتاع هوندا بس لتحديد الاعطال قولتلة هو اختار الماركة والفئة عشان دة بيشتغل على كذا ماركة قالى هاتها التوكيل بس دى خرجت من الضمان عشان حضرتك صلحت الحادثة برة الشركة
طبعا اتصدمت عشان لو كنت صلحتها فى الشركة هتكلف ولا 30000 جنية وانا للاسف مش مأمن عليها
مش عارف الحل اية بجد تعبت وهل أغير الفتيس ولا الكنترول ولا اعمل اية
الفتيس سألت علية فى التوكيل ب45000 غالى جدا جدا وحرام اساسا
وقالى كمان ممشيش بالعربية وهاتها التوكيل بالكساحة
آسف للاطالة بس لو حد يقدر يفيدنى بالحل كتر خيره

**abd_el_7amid** · 15-12-2011 02:32 AM

رائى تطلع التوكيل ... تشوف فيها ايه و يتصلح بكام... مش مهم تصلح هناك بس المهم تعرف التشخيص الصح
وبعد كده نشوف ممكن تعمل ايه؟؟؟؟؟
ومتقلقش ... كل حاجة بتتصلح.... والحمد لله على سلامتك ومش مهم اى حاجة تانية

**ahmedaglan** · 15-12-2011 11:07 AM

صح يامعالي الباشا الكلام ان حضرتك تروح تفحصها كويس ف التوكيل وتعرف اية الي يلزمها وبعد كدة ربنا يكرم واكيد ان شاء الله ليها حل برة
وربنا يكتبلك الخير ومتقلقش ودة تأثير عين مركزة ربنا يكفينا ويكفيك شر العين

**ahmedabeed** · 15-12-2011 12:27 PM

الكشف فى التوكيل هيكلقك 250 جنيه وبعد كده هتحدد الاعطال وايه اللى مفروض يتغير او يتصلح و هنشوف معاك نقدر تروح لمين بره التوكيل يظبطهالك
وانشاء الله يكون خير وحاجة بسيطة

**haythamkmal** · 15-12-2011 01:07 PM

زيت الفتيس علية عامل كبير جدا فى ظبط النقلات ، حضرتك بتقول ان الزيت كان ناقص كيلو ونص ، ده معناة انك زودت الزيت مغيرتوش ، جرب غير الزيت بتاع الفتيس كله بزيت موبيل او زيت هوندا الاصلى (من عند مجدى الدسوقى او التوكيل) وان شاء الله المشكلة هتتحل .

**Kareem.ElAraby** · 18-12-2011 08:02 AM

متابع

**MuhamedNabil** · 19-12-2011 02:07 AM

افضل حاجة توديها التوكيل تكشف عليها هنالك و صدقنى تكلفة الكشف و شيل العربية مش حتيجى حاجة جنب ان حد يعملك حاجة غلط يبوظ الجير و ترجع تانى تدفع مصنعية تانى خدها على طول هنالك و قلهم على موضوع التسريب و متكشفش على العربية بجهاز مش بتعها.
التوكيل بيقدر يشوف ضغوط الزيت فى الجير و بيكون عندهم فكرة كويسة عن المشاكل دى.
شخص و اعرف تكلفة الاصلاح و لو معقولة توكل على الله فى التوكيل و لو غالية اسأل كويس و متخليش اى حد يلعب فى العربية.