الموضوع: وجهه نظر !

وجهة نظر

انا مش هافرح بحملة اشتري مصرى اللي هتزود مكاسب رجال أعمال إللى أصلا مش بيدوا للعمال حقوقهم

.. أنا باشتري مصري بطريقتي اللي أنا مقتنع بيها ...
اركن عربيتي و اركب تاكسي .. أكل فريسكا ، درة مشوي أو بطاطا من بياع سريح عالكورنيش هيروح لعيلته بالفلوس ... اشتري كل الخضار و الفاكهة من حد واقف في الشارع مش من السوبر ماركت ..

لو هتجيب هدايا لزمايلك أو لصحابك او لحد بتحبه .. انزل خان الخليلي و اشتري نحاس أو ازاز معشق معمول في الخان مش حاجات صيني

.. جرب تلبس جزمة معمولة في مصر ..
جرب مرة تشرب عرقسوس من الشارع ( سمي و اتكل على الله مش هتموت .. كانوا ال 50 مليون ماتوا) ..
افطر مرة من على عربية فول .. و اسمع الراجل اللي على العربية و هو بيدعيلك بصباح نادي و زي الورد ...

اشتري باكو منديل من واد غلبان في اشارة مرور .. حتى لو شكله مش عاجبك ما تبقاش انت و الناس عليه ....
الفلوس إللى بتدفعها بتروح فعلا للناس إللى قامت عشانهم الثوره
بتروح مباشرة للغلابه ...

دول وزيهم كتير هما إللى يستحقو المساعده ....
مش رجال الاعمال إللى اصلا معاهم ميارات من البلد ...

ومفكروش يعملو حاجه بجد للبلد ... مصانعهم معموله عشان هما يكسبو وبس ميعرفوش حاجه تانيه وده إحدى اسباب الغلاء إللى حارق البلد .... محدش فيهم حاول يعمل مشروع قومى يساعد الاقتصاد المصرى بجد ... ويرخص الاسعار بجد

لو عايز فعلا تساعد مصر .... ساعد العامل الشقيان... ساعد البياع الغلبان... ساعد بتاع المناديل ... ساعد المنتجات المصريه الصغيره ... وساعد وساعد ... ساعد المحتاج المساعده فعلا .... ومتديش صدقه لحد مبيبعش حاجه ... ساعد إللى بيكافع بجد

متساعدش إللى خلو كيلو اللحمه ب 70 جنيه
متساعدش إللى خلو كيلو اللبن ب 7 فى علبه
متساعدش إللى خلو متر سلك الكهربا ب 8 جنيه
متساعدش إللى خلو السندوتش ب 30 جنيه
متساعدش إللى خلو متر السيراميك 100 جنيه
متساعدش إللى خلو كيس المكرونه ب 5 جنيه
متساعدش متساعدش متساعدش ... كتير اوى اوى

ممكن تكون الاسعار دى تافهه بالنسبالك ... لكن 60 % من الشعب المصرى ميعرفش يشتريها .... وعشان كدا الاقتصاد المصرى خارب لأنه غالى جدا وفئه قليله هى إللى قادره عليه

دا بسبب رجال الاعمال اللى عمالين يدفعو ملاين من ارباحهم المهوله على حملات إعلانيه ويلمو فلوسها من الشعب

وسايبين الغلابه مش لاقين ياكلو ولا يسكنو ولا يتعلمو ولا قادرين على مصريف حاجه ... بيتمنو الموت عشان يوفرو لقمه لإخواتهم... والاسعار بتزيد عليهم يوم ورا التانى

عايز تساعد .... ساعد الصناعات الصغيره بجد .. ولو تعرف شغل اى حد ... خلى فلوسك رايحه للى فعلا محتاج ... ومتخليش رجال الاعمال يضحكو عليك

اما الاقتصاد المصرى عالميا ... فلا يستطيع احد إصلاحه إلا الحكومه
بوضع حد اعلى للأجور وتخفيض الجمارك والضرائب على المواد الخام الغير موجوده فى مصر ... والماكينات والصناعات الثقيله إلى ان توجد هذه الصناعه مره اخرى حتى يستطيعو إدخال مواد خام رخيصه وتصنيع منتجات مصريه تنافسيه حقيقيه
تساعد على زياده وتنوع المصانع والمنتجات
ومن ثم خفض الاسعار وزياده الجوده

الموضوع مش إختراع ... لكن إحنا بيتنصب علينا

المشاركة الأصلية كتبت بواسطة نينو

استاذ و الله العظيم انت قلت كل حاجة جوايا
مفيش كلمة تاني تتقال بس ياريت بجد كلنا نعمل كدة

متشكر يا باشا :)

المشاركة الأصلية كتبت بواسطة minicooper20

معاك
بس فى نقطه
ماهو المصانع ديه شغال فيها مصرين و فتحين بيوت
اما انا و انتا نشترى هنزود الانتاج فبالتالى الناس هتشتغل و كمان هيطلب ناس للشغل تانى علشان الانتاج يزيد اكتر
و الناس دى مهندسين و محسبين و عمال و سواقين و و و و و و و و و و و
و لما المصنع الاولانى يشتغل هيفتح مصنع تانى و يجيب ناس تشتغل
مش بيتاع العرقسوس ولا بيتاع الفول و خان الخليلى الهيرفعو البلد
البلد هتبتدى تنهض الاو زراعيا بعدين صنعيان بعجين نبطل بيتوع العرقسوس يمشو فى الشارع اصلن و نفتح لهم محلات و نبطل عربيات الفول تقف و نفتحلهم محلات
الولد بيتاع المناديل ده انا لما اشترى منو المناديل انا كده بشجعو يكمل
لاكن لو انا بصنع و باكول مما انتج هيبقا عندى فلوس اقدر بيها اعلم الولد بيتاع المناديل ده و اطلعو مهندس
او اعلمو صنعه يكسب بيها قوت حلال غير الشحاته تحت ستاره بيع المناديل
لما النتاج يزيد هيفتح مصنع و اتنين و 10 و بالتالى هيكون فى منافسه على جوده المنتج و سعرو وانا و انتا الهنستفيد
فكر كده فى كل سلعه فى بيتك و لو مسحت من عليها made in chine
و كتبت made in egypt و اجمع بقا كل الفولس الدفعتها فى الصينى دى و احسبها و اضرب فى 70 مليون
و طلع رقم تخيل الرقم ده لو انتى مشترى بيه منتجات مصريه كان سعتها هيكون ايه الحال
انهاردا انتا بتشترى مصر يمكن الجوده مش قد كده بكره هيحسن من جودتو
ماهو راجل الاعمال ده لازم يكسب ماهو ماقاش الفلوس دى
يبقا انتا بقا تكسب راجل اعمال مصرى و لا راجل اعمال صينى بيعملك بضاعه من الزباله
لو بلدنا فيها صناعه و زراعه هننهض
فابلتالى لما نشترى مصرى اكيد احنا خدنا خطوه صح

يا باشا العمال اللى فى المصانع دول سواء اشتريت منتجهم النهارده او لا فهم كده كده هيقبضوا مرتباتهم ... سواء كان المنتج حلو وحش و الاسف معظم المنتجات المصريه جودتها اقل بكتير من تمنها .. علشان كده الناس بطلت تشترى المصرى و بدات تدور على المنتجات الصينى لانك و انت بتشترى الصينى عارف ان ممكن تكون جودته قليله لكن فى نفس الوقت سعره كمان قليل ... و النقطه دى نحط تحتها مليوووون خط لان هى دى السبب فى دمار الاقتصاد المصرى .... لو كل واحد مصرى بيحب البلد دى و خايف عليها سواء كان ملياردير او بياع مناديل راعاا ضميره و لو بجزء ضغير البلد دى هتتغير 180 درجه و هتبقى من اهم الدول فى العالم
و بالنسبه للجزء بتاع بياع العرقسوس او بتاع المناديل اللى اقصده منه انك لو اشتريت منه .. هيبقى الدخل مباشر له و لاسرته .. و هتساعده فعلا .. لكن الاستاذ صاحب المصنع المليونير .. لو اشتريت منه يبقى خير و بركه .. مشتريتش .. مش هتفرق معاه لانه معاه ملايين و مش هيحس بالافاده المباشره زى بتاع المناديل .او هيباات اليله من غير غداء و عشاء
انا كل اللى اقصده من الموضوع انك تحاول بقدر المستطاع انك تفيد الناس المحتاجه فعلا و شغاله بشرف افاده ملموسه و مباشره و بجانب ده تشترى المنتجات المعبئه و المصنعه لكن انا عندى رقم 1 انى اساعد الناس التعبانه و احاول ارفع من مستواهم المعيشى على قد م اقدر و بعد كده ابقى افكر فى صاحب الملايين ..

المشاركة الأصلية كتبت بواسطة human12

انت بتشترى اسوأ منتج لأعلى سعر عشان الطماعين يزدادوا غنى

ممكن لو سمحت حضرتك توضحلى تقصد ايه اكتر لانى مش فاهم !

المشاركة الأصلية كتبت بواسطة honda4ever

رأيي من رأي أ. عمر فكري وأحييك على شجاعتك الأدبية وتفكيرك
وبالنسبة لموضوع البلد هتنهض لما إحنا نحط فلوسنا فيها، أقول الآتي: إحنا بينضحك علينا ونتمنى إن صاحب المصنع وصاحب الشركة ورجل الأعمال يعمل اللي اللي انت متخيله بس أبدا
ده هو شايف السوق نايم ومكسبه مش أد كدة فبيحاول يدخل فلوس لنفسه تاني
لو الناس أصحاب رؤوس الأموال دول كان قلبهم على البلد من الأول مكناش احتجنا لثورة يا أساتذة

+1

المشاركة الأصلية كتبت بواسطة saberman

أحييكك يا أستاذ عمر


اللي عايز يضحك على نفسه و يخدر ضميره و يقنع نفسه إنه شارك في شراء منتج بلده هايروح يدور على العروض بتاعت أحمد بهجت و أبو العينين و السلاب و باقي المليارديرات اللي عاملين العروض للمشاركة يوم الجمعة. طبعا ده مش وحش و لكنه مش الأولى. لو حقيقي عايزين تدعموا الاقتصاد يبقى لازم تشوفوا المستحق الحقيقي لهذا الدعم و بالطبع مش همه رجال الأعمال و المليارديرات!!!!
سيبوكوا من الهلس بتاع عمرو وعماد أديب ده. متش...تروش من المحلات الكبيرة ولا الماركات الجامدة.
اشتري من البقال اللي على أول الشارع وجيب قلم سنون من الخردواتي اللي في العمارة اللي جنبك واشتري جرجير من الست اللي فارشة على الناصية ومناديل وبسكوت لوكس من الراجل اللي قاعد متكتك على أول النفق.
روحوا كلوا عند المحلات العادية اللي طول الوقت سامعين انها جامدة بس عمركم ما روحتوها. فصل قميص و هدوم وجزم عند الترزي اللي في النصية و اللي مالوش مهنة تانية يسترزق منها (أيوة في ناس لسة بيفصلوا جزم!).
اتصلوا بنجار وسباك وكهربائي يصلحلكوا الحاجات اللي بايظة في شقة المصيف ومكسلين تعملوها. اركنوا عربياتكم وخدوا تاكسي وميكروباس ومشروع.
ادوا للناس بقشيش (عامل البنزينة- جرسون المطعم- عامل الدليفري...) بس لو الخدمة كويسة والمعاملة لطيفة مش تلاكيك عشان يطلع منكوا اللي يقدر عليه.

كارفور ومترو وألفا وماري لوي و موبيكا و كونكريت مش هيفلسوا لو مرحتش تشتري من عندهم يوم الجمعة- لكن كل واحد من الناس دول ممكن ينام من غير عشا، ده لو كان اتغدى أصلا.. إنشرها إذا إقتنعت بها.

منقول

+1

المشاركة الأصلية كتبت بواسطة تامر.محمد

الله ينور عليك
نفس رأيي بالظبط و استأذنك في نقل كلماتك !

اكيد طبعا :)