الموضوع: وقفتني لجنة مرور عجيبة و كانت المفاجأة 2

بسم الله الرحمن الرحيم

السلام عليكم و رحمة الله و بركاته

اقدم لكم انا بقي الجزء التاني من لجنة عجيبة اللي نزله استاذ شهدي و بعد اذن استاذ شهدي استخدمت نفس العنوان

كنت عند جامع جمال عبد الناصر و لقيت امناء و ظباط و ليلة ملونة يفكرك لما كان بيكون فيه شخصية مهمة معدية
و انا الحمد الله العربية و لا متفييمة و لا ستيكر كده و لا كده يعني العربية نضيفة و محدش يقول حاجة

و ماشي عادي و الاقي اللي بيوقفني فجأة انا ذهلت لأنه مش هيلاقي حاجة يتكلم عليها و الاشارة مفتوحة وقفت و انا مترقب يا تري هيقولي ايه جايز يقولي أصل فيه تراب ع الازاز

المهم بيقولي الرخص

طلعت الرخص

بيبص و يقولي الرخصة منتهية !!!!!!!

انا بصيتله و بلمت ده انا لسه مجددها و هتنتهي في شهر 11 - 2012
ازاي منتهية ؟؟ ايه في المرور ضحكوا عليا و كتبوها غلط

بقوله رخص ايه اللي منتهية انا لسه مجددها نهاية الترخيص مكتوب اهو 11- 2012
يقولي لأ احنا في شهر 12 الرخص انتهت من شهر

بقول في بالي انت بتتلكك و لا ايه و لا مش لاقي حاجة في العربية

بقوله مكتوب قدامك 11-2012
يقولي يا استاذ الرخص منتهية

و اللي معايا يقوله الرخص ازاي منتهية مهي مكتوبة قدامك اهي السنة الجاية
برده هو ماسك الرخص منتهية الرخص منتهية

جالي العصبي و نزلت و رزعت الباب بقوله بص كويس في الرخصة احنا في 2011 و الرخصة هتنتهي في 2012

ساعتها هو بص كويس في الرخص و بلم و هو واقف و اعتذر و مشيت
و كانت كل الناس ع المحطة واقفين بيتفرجوا و العربيات واقفة بتتفرج ع الموقف

انا كان ناقصلي ثواني بس و انده و اقول فين الظابط المسئول

هو فيه ايه بالظبط
اينعم فرحانين ان المرور شادد و شم عاتق دبانة و يا ريت يفضل كده لكن مش لدرجة الرخص منتهية لأ و هي لسه متجددة