دي حكايتي مع الابيزا 2010
تفكير عميق وتردد في الإختيار بين cerato أو scoda fabia أو نيسان أو ابيزا DSG 2010
سبتمبر 2010 تم الشراء ب 119900 جنيه ، سياره أكثر من رائعة ، سرعة إنطلاق جبارة وفتيس ذو أداء رياضي مميز
سبتمبر 2010 صوت جلبه من الموتور على السرعات الواطية يزداد مع تشغيل التكييف . تم الكشف في التوكيل ، العريبة زي الفل يا باشا ده بس صوت المروحة عشان كبيرة
نوفمبر 2010 أصوات غريبة من الفتيس عند السير في طرق غير ممهدة ، صوت تكة مع وضعه على ال-N أو نقله الي ال-D ، تم الشرح للتوكيل ، أيوة يا باشا ، هو ده عيب الفتيس ال-DSG عشان مافيهوش زيوت ، لو مش عايز تسمع الصوت ، اقفل شباكك أو علي صوت الكاسيت
زيارة أخرى بعد قراءة خبر نزول software جديد للفتيس على المنتدى هنا ، ساعتين إنتظار ، بعد إستلام العربية مغسولة وزي الفل تمت التجربة بحماسة منقطعه النظير اسفرت عن إغلاق الشباك وتعليه صوت الكاسيت نظراً لأني مش هنكد على نفسي ونا شاري عربية جديدة بسبب أصوات غريبة من تحت
ديسمبر 2010 وركزوا معايا هنا ، صوت غريب الصبح ينتهي مع التسخين أو نقل الفتيس ، الصوت بيزيد والعيال فالشارع بئو عارفين إن عربيتي هي إلي بتعمل الصوت الغريب ده، لا قفل الشباك ولا تعلية الكاسيت مؤثرة فيهم، رحت التوكيل و فهمت المدير اني هعملهم مصيبة وهفضحهم على النت لو سمعت الحلول الغير تقليدية بتاعتهم دي، الرجل إهتم جداً و نزل معايا و طلبوا أسيب العربية عشان يدوروها الصبح ، سبتها و ركبت التوكتوك للمزلقان بجنيه وروحت في تاكسي
يوم يومين ، اتصلت، أيوة يا باشا . احنا بنبص على الرشاشات ووحدة الحقن ، يومين كمان ، رحت ، استلمت العربية بدون إصلاح لأن القطعة "اللي أنا مش عارف هي إيه " لسة هتيجي من أسبانيا
يناير 2011 القطعة وصلت ، سبت العربية عشرة أيام ، ومادونيش عريبة بديلة ، ركبوا القطعة اللي هي طلعت وش سليندر ، أيوة وش سليندر و مش عايز أسمع صوت
شوية والثورة قامت
إلى ابريل 2011 كان استخدامي ليها نادر أوي لأني ساكن في نص البلد
مايو 2011 كنت عامل حوالي 12000KM ، رجرجه عند التحرك من الثبات ، مع ملاحظة إستمرار صوت جلبة من الموتور "راجع الصوت الأول " بجانب أصوات الفتيس اللتي لم يتم التخلص منها حتى بإغلاق الشباك وتعليه الكاسيت
الرجرجة بتزيد لما العربية بتسخن أو الجو حر وابتديت أحس اني لو مرجرجرتش العريبة يبقى أنا سايق غلط ، ما علينا ، عظيمة يا مصر و على أرض اللوا رحت للمدير ، و سبتها يومين بعدها إتصل بيا استلم العريبة واشوف الدنيا عاملة إيه!
تاني يوم بشغل التكييف ، مشتغلش، اتصلت بهم واصدرت جميع الأصوات اللازمة ، اسفرت عن تغيير سربنتينة التكييف لأني عملت حادثة خرمت السربنتينة بس دوناً عن العربية كلها محصلهاش حاجة حسب تفسير محمود بتاع التكييف
أغسطس 2011 رجعت من السفر ، زهقان من العربية ، نفس الأصوات و زاد عليها الرجرجة
ابتديت أعرف من المنتدى هنا إن الرجرجة دي علامة إن الفتيس ال-DSG باظ و كنت كاره العربية تماماً ، قافل الشباك ، معلي الكاسيت و بستني الرجرجة في الغيار الاول و بحاول معملش حوادث بالسربنتينة
سبتمبر 2011 رحت التوكيل ، و مع بدايه قلعي للبنطلون في غرفه المدير كحركه هجومية وليست دفاعية ، الراجل سمع مني و- بابتسامة عريضة طمني إن التوكتوك في إنتظاري لأني حسيب العربية يشوفوها
بعدها بأسبوع إتصل عشان أخد العريبة لحد ما الفتيس يجي من برة
متابعة مستمرة ، وصل الفتيس بعدها بشهر و نص ، ركبوه في أربع أيام ، استلمت العربية ، كانت الطاره معووجة ، رجعت تاني هم عدلتها ، و إطمنت على الواد بتاع التوكتوك و بعت العريبة بخسارة 27 ألف جنيه
شكراً لمروركم
