نصيحة في شراء موبايل من شارع عبدالعزيز

**ahmad--ezzat** · 16-12-2011 03:30 PM

فى حد يشترى الكاتل !!!!!!!!

**materna** · 16-12-2011 04:38 PM

galaxy fit العادى مش الايت ب 1150

**البرنس** · 17-12-2011 02:52 AM

أولا أحب أشكر كل اللي شارك في الموضوع .... رحت فعلا عبدالعزيز بعد الصلاة و لفيت كتير بس ما لقيتش الموبايل اللي كنت عايزة ... الدنيا هناك متغرقة نوكيا و سامسونج و بلاك بيري دي أكتر ماركات هناك أي حاجة تانية بتبقي قليلة قوي و الصيني طبعا مغرق الدنيا أشكال و ألوان و في الاخر خدت واحد صاحبي و طلعنا علي التميمي اللي في وسط البلد لقيت الموبايل هناك و جيبتة ب 550 جندي

المشاركة الأصلية كتبت بواسطة MaZaGAngeE

يا باشا كلك ذوق
لو ممكن تشوف موتورولا Defy < <<< Defy +
و البطارية الاحتياطي بتاعتهم

Defy سعره 2000 في موبايل شوب
Defy+ مش عارف سعره ايه

يا باشا دا حضرتك الذوق كله

سألتلك هناك مالقيتوش كل اللي موجود هناك نوكيا و سامسونج و بلاك بيري و صيني بالكوم و سألتلك في محل كبير في وسط البلد إسمه التميمي اللي جبت من عنده الموبايل الراجل حسسني إني بقوله شتيمة ولا حاجة و قالي إنهم ما بيتعاملوش في الموتورولا إكمنه تقيل و مش بياع زي الحاجات التانية

المشاركة الأصلية كتبت بواسطة materna

حرامييييييييييية
اتقرج بسسسسسسسسسسس واعرف الاسعار واشترى من برة

ما ناس كتير فعلا قالتلي كده

المشاركة الأصلية كتبت بواسطة احمد المصرى

انا مره كنت فى عبد العزيز من حوالى 3 سنوات تقريبا لقيت صاحب محل جايب لزق ال هو الكبير دا وماسك موبيل 6630 وفاتح الوش وبيلزق اللزق على الشاشه وبيشيله تانى علشان يشيل اى تراب او اى بصمه صباع طيب لو الموبيل جديد ليه بيعمل كدا

تقديرى الوحيد ان الموبيل مستعمل وبيبيعه على اساس انه جديد والله اعلم

و الله تقريبا هو دا اللي بيحصل

المشاركة الأصلية كتبت بواسطة mody3on

اشتري واطمن يا باشا بس اهم حاحة تاخد العلبة مقفولة بلزق المصنع .. ولو عاوز حاجة مضمونة اقفش ده
Select website -- Home page

ما أنا بتفرج علي الحاجة علي سليكت و علي الشناوي علشان أخد فكرة عن الأسعار قبل ما أنزل

المشاركة الأصلية كتبت بواسطة _loma_

بلاش عبد العزيز ده نهائى

فى شارع شريف فى وسط البلد على نصية العبد اللى 26 اغلبه محلات موبايل وانضف من عبد العزيز بكتير

وفى برضه شركة دريم
DREEM2000.NET

ما أنا ماجبتش من هناك و جبت من محل التميمي اللي في وسط البلد

المشاركة الأصلية كتبت بواسطة alrabeh

بعد راديو طلعت بحاجة بسيطة فيه ممر أدخل فيه واسأل على محل على المحامى حتلاقيه فى آخر الممر مزنوق لجوة ناحية الشمال ومحل صغير جدا
اشترى منه وانت مطمئن تماما
من الوكيل لإيدك مباشرة
بالتوفيق

تمام يا باشا شكرا الطلعة الجاية إن شاء الله

المشاركة الأصلية كتبت بواسطة ahmed_nubira

فى حد يشترى الكاتل !!!!!!!!

يا باشا علي قد فلوسنا العملية نايمة اليومين دول و كنت عايز حاجة في حدود 500- 700 و حلو جدا و الله واي فاي و الشاشة تتش و qwerty و شريحتين و فيه أبليكاشنز لذيذة للفيس بوك و تويتر تشوفه تقول بلاك بيري يعني بعد عدة مقارنات حسيت أنه أفضل حاجة في الفئة السعرية دي يعني خدت حقي و فوقيه بوسة

المشاركة الأصلية كتبت بواسطة materna

galaxy fit العادى مش الايت ب 1150

المرة الجاية بقي إن شاء الله

**MaZaGAngeE** · 17-12-2011 03:00 AM

الف مبروك
و شكرا على اهتمامك

**amrrashed** · 17-12-2011 05:35 PM

انا مش عارف انت اشتريت ولا لا .... انا دايما بشترى موبيلاتى وموبيلات صحابى من عند محل اسمه كادو ناصية عادلى مع شريف اسعارة كويسة ومعاملته حلوة

**chicobon** · 17-12-2011 11:29 PM

انت اشتريته بكام و هل لاقيت الون الاسود منه انا كان نفسي اجيب alcatel 813d انما للاسف مالقتش غير الازرق و الاحمر منه و لاقيت في فرق في السعر في محلات كانت بتبيعه بي 618 و محلات بي 550 بس برده مالقتش منه كتير غير في رزق الله و برده مش الاسود ياريت تقولي رايك فيه بعد الاستعمال و هو فعلا شبه البلك بيري
الف مبروك عليك ربنا يباركلك فيها

**mustafavet** · 17-12-2011 11:57 PM

ياريت ترفع صوره

**EL Tanna** · 18-12-2011 12:32 AM

ياريت لو تشوفلى الشاحن بتاعه زى النوكيا ولا لا يعنى لو الشاحن حصله حاجه هلاقى حاجه اشحته بيها ولا خلاص و ياريت البطاريه معاك بالمرة :d
لو فى صور بقى يبقى فل

**البرنس** · 18-12-2011 03:33 AM

المشاركة الأصلية كتبت بواسطة MaZaGAngeE

الف مبروك
و شكرا على اهتمامك

الله يبارك فيك .. كان نفسي أفيدك أكتر من كده و الله

المشاركة الأصلية كتبت بواسطة amrrashed

انا مش عارف انت اشتريت ولا لا .... انا دايما بشترى موبيلاتى وموبيلات صحابى من عند محل اسمه كادو ناصية عادلى مع شريف اسعارة كويسة ومعاملته حلوة

أه يا باشا إشتريت من عند التميمي بس لو فكرت أشتري تاني هاشوف المحل اللي حضرتك بتقول عليه

و ألف شكر علي مشاركة حضرتك

المشاركة الأصلية كتبت بواسطة chicobon

انت اشتريته بكام و هل لاقيت الون الاسود منه انا كان نفسي اجيب alcatel 813d انما للاسف مالقتش غير الازرق و الاحمر منه و لاقيت في فرق في السعر في محلات كانت بتبيعه بي 618 و محلات بي 550 بس برده مالقتش منه كتير غير في رزق الله و برده مش الاسود ياريت تقولي رايك فيه بعد الاستعمال و هو فعلا شبه البلك بيري
الف مبروك عليك ربنا يباركلك فيها

الله يبارك في حضرتك .. أنا جيبتة ب 550 من عند التميمي اللي في وسط البلد ... أنا بردوا كان نفسي في الأسود بس للأسف مكانش عندوا حتي أنا سألتة لو فية الأسود في فروع تانية قالي إنهم مجابوش منه الإسود أصلا و الصراحة أنا ما شوفتش إسود علي الطبيعة لحد دلوقتي فتوكلت علي الله و جبت الرمادي خصوصا إن السعر كان مغري و كان أقل من المحلات التانية ...
بص هو الموبايل كويس جدا جدا يعني التاتش في الشاشة حلو جدا و الواي فاي شغال زي الفل و بيجي بأبليكيشن للفيس بوك و تويتر و كذا أبلكيشن تاني و معاه متصفح أوبرا و ال browsing فيه حلو جدا و ممكن تنزلة الأبليكاشنز اللي إنت عايزها من موقع getjar , هو بيدعم تطبيقات الجافا كلها زي النوكيا بالزبط و نزلتله ebuddy دا زي الماسنجر كده و التشات شغال فيه تمام و شكله شيك و شبه البلاك بيري و بيجي معاه وصله اليو إس بي و السماعة و كله و سعره حلو جدا و الشريحتين شغالين مع بعض في نفس الوقت زي الفل بدون أي مشاكل هو زي البلاك بيري بس من غير ال bbm مع فروق في البروسيسور و الرام طبعا تقدر تقول كده زي الكلب الولف اللي علي أبوة و الكلب الولف الشعبي

العيوب اللي فيه ممكن تكون إنه كله بلاستيك خفيف يعني تخلي بالك منه علشان مش هايستحمل خبط و رزع و الكاميرا بتاعته علي قدها شوية و إنه مابيشغلش فيديوهات من اليويتوب بس طبعا بالسعر ده إنت واخد حقك و فوقية بوسة يعني النوكيا ال c3 اللي يعتبر قريب منه مافيهوش تاتش و ب 750 جنية فا طبعا إنت أولي بالفرق بس طبعا خلي بالك إن الموبايل دا إنت تجيبة علشان تستخدمة مش علشان تبيعة لإن لو فكرت تبيعة هتخسر جامد لإن الألكاتيل مالوش سوق قوي

يعني من الاخر الموبايل حلو جدا و أنصح أي حد بيدور علي حاجة في فئة ال 500-700 إنه يجيبه لأنه فعلا أفضل حاجة في الفئة السعرية دي بعد بحث مطول بداية بالنوكيا و نهاية بالصيني مرورا باسامسونج و ال إل جي و المتورولا .. زي ما بيقولو best value for the money إنما لو الميزانية تسمح بأكتر يبقي ساعتها فيه إختيارات تانية

المشاركة الأصلية كتبت بواسطة mustafavet

ياريت ترفع صوره

عنيا يا ريس دي صورة علي الطبيعة معلش بس الجوده تعبانة علشان مصورها بعده قديمة شوية

و دا لينك فيه صور للموبايل إتفرج علية براحتك

Alcatel OT-813D Photos

المشاركة الأصلية كتبت بواسطة blackfox14

ياريت لو تشوفلى الشاحن بتاعه زى النوكيا ولا لا يعنى لو الشاحن حصله حاجه هلاقى حاجه اشحته بيها ولا خلاص و ياريت البطاريه معاك بالمرة :d
لو فى صور بقى يبقى فل

الشاحن بتاعة بو إس بي دا منتشر بكثرة فا مفيش منه خوف إنما البطارية صراحة معرفش أية نظامها و الصور هتلاقيها في فوق الكلام ده