الحقوني:الفيرنا بتاكل زيت والفتيس بيعلق

السلام عليكم:العربيه عندي بتاكل زيت كتير اوي روحت وكشفت وحطيت زيت والموتور صوتو بعد سرعة اربعين بيبدا يعلى كانو بيتحك من جوه وبيزن جامد كانو بيحجر والميكانيكي اللي روحتلو راجل كويس جدا وشاطر وعرف الي فيها وقالي الموتور حيتكسر قريب جدا وقالي كمان اني لازم اتابع الزيت كل يوم وبعدين كمان الزيت دخل جوه الانجكشن والبوابه وكان بهدله والفتيس عندي بيعاكس في الغيارات يعني الاول لازم من وقت للتاني يعلق وبعد كده بيدخل بسرخة التروس وبعديها يعشق انا محتار انا فكرت اني اغير الموتور بواحد تاني احسن واقوى بس المشكله ان العربيه تقسيط وهيه عامله 62000 كيلو 2008 /1600 cc/ العمل ايه يجماعه انا محتار ولا عارف اغير موتور ولا حتى حعرف ابيع العربيه تشورو عليه بايه انا عندي الانجكشن كمان متبهدل زيت هوه والبوابه بس المشكله ان كل شويه بيخشلو زيت انا خلاص يجماعه بجد احترت اتمنى ان الاعضاء يفيدوني ان شاء الله واسف جدا على الاطاله وشكرا

ماتور بفتيس وريح نفسك هاتبقي مكلفه بس معلش

يعني اخر كلام ايه انا روحت اكدت كلام الميكانيكي تاني قالولي المكنه خلاص بترزع والفتيس بيون جااااااااامد اعمل ايه افيدوني وفعلا صوت المكنه والون ظااااااااهر جدا جدا وشكرا

انا بردو رئي تغير الماتور بفتيس بس هو ليه سوال هو ايه اللي عمل في الماتور مع ان العربيه جديدة ؟؟؟؟؟؟

ماتور بفتيس وريح دماغك وبيع القديم

يجماعه انا مش حينع اغير موتور علشان العربيه تقسيط والبنك ورقم الموتور لاني لازم برخص برقم الموتور والشاسيه اللي مثبوتين في جواب البنك لاني بروح بجواب من البنك للمرور وبالتالي برخص

لا ينفع بس هتجيب جواب من البنك بس دوخه دوخه الحل التانى الفحص كل 3 سنين ركب ماتور استيراد وخلى الماتور القديم عندك وقبل الفحص ركب الماتور الخربان وافحص بيه

عمر الماتور و ريح دماغك بس غريبه العربيه لسه ماشيه 60 الف و بتعمل كده مع ان فى عربيات تانيه كتير ماشيه اكتر من كده و لسه نظيفه اكيد فى حاجه غلط حصلت للعربيه دى

الفتيس ممكن يكون سليم بس محتاج تشوف الزيت و طقم الدبرياج

طبعا من الواضح الاهمال فى تغير الزيت والفلتر الخاص مما يؤدى الى احتراقه وتكون طبقات كربون وقذورات على الاجزاء المتحركه مما يمنع تزييت الاجزاء المتحركه مما يؤدى الى احتكاك الاجزاء المعدنيه وطبعا استعمال بنزين من نوع 80 ------------رفقا بالسيارة سيدى

على فكره انا مواااظب جدا على تغيير الزيت والفلتر في ميعاده وغيرت زيت الفتيس وزيت الموتور وفلتر الزيت وغيرت طقم الدبرياج وبردو لسه العربيه زي مهيه ولا كاني عملت حاجه خاااااااااالص على فكره انا بحط بنزين 92 على طول وعمري محطيت 80 ابد والنهارده عملت اصلاحات وطلعت جربت العربيه ولسه زي مهيه صوت الون موجود في الفتيس وصوت الموتور كانو بيجعر كده على العموم الميكانيكي قالي ده فتيس كده والموتور بردو بيرزع وعلى فكره انا معايه كل مايثبت اني بعمل الصيانه الدوريه في التوكيل على فكره الموتور ده قبل كده ضرب معايه والعربيه طلعت دخاااااااااااااان ابيض من الشكمان ولما روحت التوكيل قالولي ده عيب صناعه في الفيرنا عموما وكانت العربيه عامله 14000 كيلو وقتها انا مش عارف بصراحه اشمعنى الموتور ده اللي كده وانا والله مواظب على كل الصيانات الدوريه وقطع الغيار كلها اصليه من التوكيل ومعايه كل الفواتير بس المشكله ان الضمان كمان خلص وشكرا

طيب انت طبيعه قيادتك ايه بالظبظ و العربيه دى 1500 مش 1600 صح

لا انا العربيه 1600 انا سواقتي عاديه وساعات بجري وعلى طرق السفر ببقى مثلا 120

طيب الميكانيكى ما قالش ايه السبب ؟ زيت مغشوش مثلا و لا ايه ؟
ولا عيب صناعة ؟

بالنسبه للموتور التوكيل نفسوه قالي ده عيب صناعه في الماتور والمفروض انهم صلحو وقتها بس اللي عرفناه ان التوكيل صلح العربيه وقتها بالحاجات اللي بايظه يعني فيما معناه كمثال انهم صلحو البساتم البايظه وركبوها وطقم الشنبر كذلك المشكله كمان ان كل شويه الزيت بيدخل في الانجكشن وبيبهدل البوابه كاني جيبت زيت ورميتو جوه البوابه ان شاء الله انا حنزل بكره واشوف الدنيا ايه تاني مع الميكانيكي وانا ان شاء الله متابع معاكو وشكرا

يجماعه هو الموتور لو بيرزع العربيه تجيب 180 انا غيرت الفتيس والونه زي مهيه والمشكله اللي مش لاقي لها حل ان الانجكشن كل شويه بلاقي البوابه غرقانه زيت من الموتور وممكن حد يفهمني اكتر يعني ايه الموتور بيرزع