الموضوع: من واقع خبرتكم اعمل ايه؟!

ازيكم يا شباب اخباركم ايه؟
احنا الحمد لله
يارب جميعا تكونوا بخير واللي مش متجوز يتجوز ان شاء الله وتبنوا بيوت مسلمة طيبة صالحة يا رب
ربنا يتقبل دعائك ويزوج شباب المسلمين
دلوقتي انا بفكر اني اخد خطوة واخطب ان شاء الله وابتدي امشي في حكاية بناء البيت دي
طيب ايه الموقف؟!
استخير وتوكل على الله
انا بالفعل عندي شقة -ودي المشكلة اللي محتاج رايكم فيها -
الشقة دي ساكنة -والدي مسكنها- وهتفضى الشهر دا ان شاء الله ... هي كان المفروض يخلص عقدها كمان سنتين والمفروض انها هتتسكن تاني لنفس المدة
والدي بيسألني هل انا هعد في الشقة دي واللا اعد معاهم في الشقة ؟!
لا اقعد فى الشقة دى ومتقعدش معاهم مش لحاجة بس فيه مثل بيقول البعيد غالى واكيد هما كمان اناس طيبين بارك لك اللهم فيهم وامد فى عمرهم
احنا قاعدين في شقة مكونة من 4 غرف وريسيبشن كبير و 2 مطبخ و 2 حمام
فدلوقتي قدامي خيار من 4 خيارات:-
الخيار الاول اني اقبل اني اعد معاهم في الشقة وهيكون نصيبي مطبخ وحمام وغرفتين وصالة !
الخيار التاني اني انتظر لما المدة تنتهي -سنتين على اعتبار انها هتتسكن سنتين كمان -
الخيار التالت اني اسيب الشقة فاضية وادفع انا ايجار الشقة لحد ما اتجوز
الخيار الرابع اني اعد معاهم لحد ما الشقة تفضى وبعدين اجهزها وانقل فيها
انتوا ايه رايكم في الخيارات دي؟!
كل خيارات الشقة مرتبطة بالانسانة اللى هترتبط بيها يعني كل خيار من اللى انت قولته هل يناسبها ام لا وان كنت اظن واغلب الظن ان اليومين دول البنات تفضل الاستقلالية وده فى الاول يرجع ليك وللانسانة اللى هترتبط بيها
النقطة التانية:-
بالنسبة لفترة الخطوبة هل كتير ان فترة الخطوبة تكون سنتين؟!
لا كتير ولا قليل فترة الخطوبة شرعت للتعارف من الممكن ان تقل ولا تزيد عن سنتين انما فى وقتنا الحالى فترة الخطوبة تحدد بمدة التى يتم فيها تجهيز الشقة
لأني اعتقد اني هحتاج فترة خطوبة لن تقل عن سنتين عشان أقدر اجهز نفسي
فهل اخطب واعد سنتين خاطب واللا انتظر اجهز نفسي وبعد كدة اخطب واتجوز على طول واللا اعمل ايه بالظبط؟!
اخطب واعد سنتين خاطب طيب ايه المشكلة لما تخطب وتقعد سنتين خاطب زى ماقلتلك فترة الخطوبة بتبقى لمعرفة طباع الشريك ومينفعش تربط نفسك سنتين من غير خطوبة وبعد تقول انا خلصت وعايز اتجوز وبعدين مادام انت نويت ان شاء الله ربنا بييسر فى موضوع الزواج
بصراحة انا مليت وزهقت من اني مخدتش خطوة فعلية في الموضوع دا واحساس انك لوحدك دا احساس مش حلو برده -بغض النظر عن اهلي بس احساس من نوع تاني يعني
النقطة التالتة:-
بالنسبة للاتفاق مع اهل العروسة هو الشائع عندنا في البلد ان العريس يتحمل الغرف كلها كخشب وتنجيد وان العروسة تتحمل ما تبقا من اجهزة وما شابه فهل دا كدة كويس واللا لا؟!
اتفاق الزواج يتم على حسب العرف السائد بالبلد ونصيحة لوجه الله اول حاجة فى الاتفاق ان كل حاجة تبقى معروفة مين هيجيب ايه ومين هيجيب ايه يعنى منعا للقيل والقال
انتوا ايه رأيكم؟!
النقطة الأخيرة انا تعبت دماغكم معلش:-
بالنسبة للشبكة ايه النظام دلوقتي ايه الحاجة المقبولة مع اسعار الذهب الحالية ؟!
الشبكة برده على حسب العرف السائد فى البلد عندك

تحياتي لكل آرائك الجميلة جدا يا صديقي
رأيك يحترم جدا وفيه شيء كبير جدا من الصحة
جزاكم الله خيرا

المشاركة الأصلية كتبت بواسطة mahmoud_afifi

الله الله,, طب كنت استشيرني وانا أقولك الزتونه .. يلا بقى نقول ايه هههههههههه

بص يا أشرف باشا, بالنسبه للنقطه الاولى من رأيي انك تقعد مع والديك السنتين دول لغاية لما الشقه تفضى. اديك هتكون في فتره خطوبه (وده جواب للنقطه التانيه) وفي نفس الوقت الدخل بتاع الايجار هتجهز بيه نفسك. (مجرد اقتراح)
اصل العروسه الجديده تحب يبقى عندها بيتها الخاص وكمان مهما كانت العروسه كويسه برضه ممكن تلاقي خلاف بينها وبين والدتك.

النقطه التانيه انا جاوبتها في وسط الكلام, اما بقى النقطه التالته معاك حق فيها. العريس عليه الخشب والتنجيد والباقي على العروسه. واوقات الاجهزه الكهربائيه بتبقى على العريس. على حسب الاتفاق بس خلي بالك ان الاتفاق يكون واضح وشامل في البدايه عشان مايبقاش في خلاف بعد كده ويكون في شهود على الكلام ده.

بالنسبه للدهب بقى اصبر شوية يمكن ربنا يكرمك واسعار الدهب تخف على حظك.
والف مبرووووووك مقدما يا جميل



ههههههههههههههههههههههههه ه .. أجل الكلام ده ياعم ميدو لما يتدبس
كده هتخليه يغير رأيه

ربنا يكرمك يا محمود يا رب
عقبال مافرح فيك كدة وازفك بنفسي ان شاء الله ساعتها بس اكيد مش بالفيرنا هجبلك عربية جامدة جدا ساعتها ان شاء الله
كلامك برده منطقي ممكن فعلا اعد معاهم الفترة دي ونجرب مش هنخسر حاجة

المشاركة الأصلية كتبت بواسطة أحمد كمال

اوعى تسكن مع اهلك

مهما خطيبتك و اهلك كانوا حبايب و الله حتى لو هي بنت خالك او بنت عمتك او بنت خالتك


الستات كائنات نفوذية سلطوية اقليمية territorial بطبعها

هتبدا معركة بسط النفوذ من تحت لتحت ..... صدقني حاجات انت كراجل شايفها هايفة زي هناكل ايه النهاردة او مين هيطبخ او او او ... بتبقى عبارة عن نغز من تحت لتحت بين الستات و حرق دم .......

و محاولة توسيع رقعة النفوذ

و هتحصل صدامات السنين

و هيتحولوا من حبايب لتوم و جيري و انت هتبقى عيشتك سوااااااااااد و مرار طافح

تصالح و تطبطب و تحايل

و تيجي على نفسك عشان ترضي الكل


ارجوك لأ

سنتين خطوبة كويس و بعدها تسكن في شقتك


حبكت معاك أوي أجر مؤقتا لحد ما الساكن يخرج


بس بلااااااااااااااااااااااا ااااااااااااااااااااااااا اش سكن مع اهلك هتخسر الود اللي بين اهلك و مراتك




الشبكة حسب مستوى حضرتك و مستوى العروسة و نصيحة انت تكون صارم و ما تفاصلش في طماطم معايا كذا و مستوايا ما يسمحش و لو حد قال لك بسيطة قول له لأ لسه فيه مصاريف بالكوم و دي فلوس العفش و التوضيب


ما تغلطش غلطة ناس كتير انا منهم ...... ما تتداينش عشان جواز

عجبني جدا تعبير Territorial
جميل جدا رأيك وبرده كويس فعلا
ممكن نخطب ونشوف ربنا هييسر بايه الله المستعان

المشاركة الأصلية كتبت بواسطة saadelden

ربنا يوفقك يا اشرف بيه و يهديك للطريق الصحيح

ربنا يكرمك يا سعد يا رب

المشاركة الأصلية كتبت بواسطة azmeralda

3000
5000
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!


دول يدوبك يجيبوا دبلة ومحبس خفيف كمان انتو متعرفوش الدهب بكام ولا ايه!!!!!!!!!!!!!!!!!!!!!!!!!!!!!!!!!!!!!!!!!!

والله يا صديقي اسعار الدهب غير مستقرة
ودا يخلي المجازفة في شبكة غالية شيء تحفه المخاطر دا اولا
من ناحية تانية انا اولى بالفلوس اللي هتتصرف في الشبكة في تجهيز الشقة لن تجهيز الشقة والجهاز نفسه هيصرفوا كتير جدا !
فحرام اني اروح اجيب شبكة غالية واتداين عشان اكمل الجهاز دا مش منطقي طبعا !

المشاركة الأصلية كتبت بواسطة SYD

اسكن لوحدك اولا
فترة الخطوبة مش قضية
هات الي تقدر عليه دبلة او خاتم او محبس او انسيال او سلسلة او هاتهم كلهم وفهمها انها هي دي الشبكة بتاعتها

وربنا يوفقك ودوق من الكاس الي احنا شاربينه

والله المستعان
،
،

الله المستعان يا صديقي
كلام جيد برده

المشاركة الأصلية كتبت بواسطة MaZaGAngeE

مفيش اي سبب انك تعمل خطوبة طويلة جدا كده
كفاية قوي خطوبة 6 شهور
و ايه المشكلة انك تعيش مع ابوك و امك ؟ دي حاجة كويسة و مريحة ليك جدا ......... طبعا هيكون فيها شوية ملح صغيرين جدا لو امك و مراتك اصحاب و شطة و فلفل و خل لو مش اصحاب ... بس عموما لازم سمعك يكون تقيل جدا مع الاتنين

مزجانجي بيجيب من الاخر
انا تقريبا مرتاح للرأي دا
اني اعمل فترة خطوبة لحد ما استقر واتيقن ان هي دي البنت فعلا واني متفق مع كل آرءها ومن ثم نتوكل على الله
مفيش مشكلة اني اعد مع والدي ووالدتي

المشاركة الأصلية كتبت بواسطة Akram

قبل كل شيئ صلي إستخارة ,
بالنسبة للفترة فدي تتوقف على الاتفاق و الوقت اللي تقدر تجهز فيه نفسك بالإضافة للشقة هل هتحتاج توضيب كتير و لا لأ ,
بس بلاش تتجوز مع أهلك لأنه في الغالب هيحصل مشاكل ,
فلو هتقدر تجهز الحاجات المطلوبة منك في 6 شهور مثلا و هتحتاج توضيب للشقة يبقى لازم تأخد الشقة من دلوقتي و تبدأ توضبها شوية بشوية و تجهز بقية حاجتك ,
طيب بالنسبة للإتفاق ,
احنا عندنا العريس بيجيب النوم و الانترية و النجف و الثلاجة ,
و العروسة بتجيب السفرة و المطبخ و البوتاجاز و الغسالة و التنجيد و الستائر ,
و كل حجرة بتيجي بفرشها أو بالسجادة ,
و بالنسبة للدهب فده على حسب مقدرتك , يعني 3 آلاف يجيبوا دبلة و محبس و خاتم معقولين و لو عايز تزود يبقى على حسب مقدرتك ,
عموما لما بتبدأ الخطوة دي هتلاقي ربنا سهلك حاجات كتير ,
.

حتى لو الاتفاق كدة برده يبقا معقول مش وحش برده
الله المستعان يا حج اكرم