الموضوع: المرة دى مش مقارنه عاديه عشان شراء (المرة دى مقارنه للثقافة) الميكروباص و الملاكى

المشاركة الأصلية كتبت بواسطة MaNoLa

موضوع دايما بييجى فى بالى لما بسئل ناس عايشة برة أو بتفرج حتى على برامج أو أفلام أجنبيه
فيه عربيات كتيرة كدة شبه الميكروباص بس طبعا مش ميكروباص
و العربيات دى بيتم أستخدامها على أساس إنها عربيه ملاكى عادى
زى الدودج كرفان و الهيونداى أتش 1 و الحاجات دى
ليه دايما عندنا الحاجات دى بتبقى تحت بند ترخيص الأجرة أو أتوبيس رحلات ؟
و ليه الناس العاديه إلى زيى و زيك كدة بنفضل نشترى عربيه عاديه بدل العربيات دى
بالرغم من أن كل حاجة فى صالح العربيات الكبيرة دى زى السعر مثلا الهيونداى أتش 1 المستعمله شوفتلها أعلان بـ75 ألف جنيه و فيه ناس بتروح تجيب تويوتا كرولا إلى سعرها أعلى بكتير
بالرغم برضة أن العربيات الكبيرة دى موفرة فى قطع الغيار لأنها معمرة و فيه منها بيشتغل بالجاز و بتبقى قوتها رهيبه

طيب الموضوع ثقافة ولا أية بالظبط و ليه الناس دايما مش بتحب تقارن مابين العربيات الكبيرة دى و العربيات الملاكى العاديه
و على فكرة فيه ناس كمان بتجيب عربيات نقل دبل كابينه و بتقفل الصندوق الخلفى و بتبقى ليها شخصيا زى الملاكى
و محدش يكلمنى عن الزحمه و المرور لان محدش بيفكر فى كدة أساسا لأنها مش شغلانه الشعب

1- عشان الزحمة والمرور.. مش بتوع الحكومة لأ بتاعتي انا.. يعني مثلا هيونداي اتش 1 أركنها فيين أنا ف كل مشوار حاطلعه؟ برة فيه أماكن تركن فيها ف كل حتة مش حتلاقي الحاجات دي هنا
2- الفلوس.. أنا لييه أشتري عربية 50% من تمنها موجه لأن العربية دي بتنقل ركاب فا طبعا العفشة والموتور والحاجات دي كلها حاتفرق في حين اني ممكن أصرف نفس التمن علي عربية موجهه أساسا للشيء اللي انا عاوزه زي الرفاهية أو الشد أو خلافه.
3- مين قالك ان المشاريع دي رخيصة؟ فيه منها بيعدي ال 200 ألف.. حاديك 200 ألف وأقولك هات جيتا يا اما مشروع وشوف انت بنفسك حاتعمل ايه.
4- برستيج الشغل.. يعني أنا كا مهندس أروح أقابل عميل يلاقيني سايق مشروع؟ وأهزر أقوله أصلي باسرح عليه بعد الضهر؟
5- برة المشاريع مابتشتغلش اجرة أساسا (بتشتغل في بعض الدول بس أنا باقول الأغلبية) انما هنا وانت ماشي حتلاقي "باكوس ياسطة"و "سيدي بشر".. مواقف زبالة طبعا خصوصا لو وقفت ف الزحمة ف محطة مصر والله ما حاتطلع سليم.
6- أهم سبب.. بره لأن الفلوس متوفرة أكتر والعربيات أرخص بيشترو أكتر من عربية.. مثلا نص بيك اب أو ميني فان ينقلو فيها بضايعهم. وعربية سيدان أو كوبيه أو مهما كانت للاستخدامات الشخصية. وعربية SUV أو 4x4 عشان الأسرة.. والكلام ده عن سفر قبل كدة لكن طبعا احنا بنتكلم برضه عن شريحة معينة من الأجانب. للتوفير بدل ما كل واحد في الاسرة معاه عربية بيخلو التلاتة دول عندهم. رب البيت والام مثلا بيبقي مع كل واحد فيهم عربية خاصة (زي ما قلنا سيدان أو كوبيه أو مهما كانت المهم ان دي له هو فقط). وعربيتين تانيين واحدة ميني فان أو بيك اب للنقل والأحمال والمشاوير الزبالة وواحدة كبيرة SUV للعائلة ودول ممكن أي حد من الاسرة يستخدمهم طالما مش محتاجينهم للضرورة.
تعديل:7- حاجة زيادة كدة.. ممكن حد يقوللي حاغرز ازاي ع البحر بصندوق الدنيا اللي انا حامشي بيه ده؟

المشاركة الأصلية كتبت بواسطة eng f3lix

فعلا زيها زي ثقافة الناس بالنسبة للعربيات البيك اب
زي التويوتا الهاي لوكس والدودج راام
التويوتا الهاي لوكس الناس بتجيبها علشان الشغل ويشتغلو عليها وتحميل بضاعة وهكذا بالرغم من ان برة تعتبر عربية عادية او للاستخدام اليومي
نفس الكلام بالنسبة للدودج رام ( الوحش ) اغلب الناس عندها اقتناع ان العربية دي عربية نص نقل هههههههههههههههههههه وميعرفوش انها بردو عربية للاستخدام اليومي وبجد عربية وحش بس

علي فكرة أنا الاسباب اللي كتبتها كانت علي سبيل المثال لا الحصر.. يعني عشان الواحد كان ف الشغل وباله مش رايق. والموضوع أعتقد انه معمول كامقارنة بين الميكروباص والملاكي مش البيك اب.. بس لو عاوز تدخلها ف المقارنة حاديك كام نقطة
1- العربيات البيك اب ظهرت كاموضة أو تقليعة في أمريكا بالذات لنفس نقطة 6 اللي اتكلمت عليها فوق. العربية البيك اب كان الشباب بيفضلو ياخدوها عن ال اس يو في عشان استهلاك البنزين دي نقطة (ماتنساش ان البنزين عندهم غالي) ونقطة تانية انها اخف وأريح من الاس يو في. فا بديهي ان الشباب هناك يبدأ يهتم بيها علي أساس انهم اللي بيستخدموها 90% من الوقت. ظبطوها شخلعوها زوقوها اتحولت لموضة وبدأت شرائح أعلي من الشباب تهتم بالموضوع ده. دودج بالذات حاولت تلحق هوجة الشباب ده ف انها توفرلهم عربيات بيك أب من ناحية العربية بيك اب فا الاسرة مش حاتعترض علي استخدامها للغرض ده وفي نفس الوقت الشركة وفرت فيها كل وسائل الراحة الموجودة ف أي عربية سيدان مثلا. مع تزايد التقليعة دي بدأت الشرايح الأكتر غناء (اللي عندهم امكانية ان كل واحد يبقي له سيارته الشخصية) يهتم بالموضوع ويشتري عربيات زي دي. وطبعا دودج قالتلهم مرحبا ووفرتلهم فئات أعلي. وصل الموضوع لأن بعضهم كان بيستخدم المساحات الفاضية ورا ف انه يقفلها ويحط فيها ساوند سيستم كامل وشاشة ال سي دي وساعات اكس بوكس وخلافه وطبعا كل ده بيبقي له مصدر كهربي مادخلتش بصراحة ف تفاصيله أوي. اذا كان علطول من البطارية ويحوله 220 فولت ولا بياخدله شحن من الدينامو.
2- حاجة حلوة ان المصريين ماخدوش التقليعة دي من امريكا.. احنا مش حانقلدهم ف كل حاجة بقي خلي لينا كيانا الخاص.
3- حتي لو حصل وقلدناهم. اركن كدا عربية بيك اب زي الدودج دي ف الشارع خمس دقايق وارجع حتلاقي عيال بتلعب فيها ماتش كورة أو مصارعة المحترفين.. انت وحظك بقي في اختيار اللعبة.

المشاركة الأصلية كتبت بواسطة mazagangee

عربية ملاكي و لا اس يو في ؟
دي حاجة بتحكمها :
1- امكانيات مادية .......... اغلب الشعب المصري بيستنى فترة كبيرة عشان يجيب عربية نص عمر و دي بتكون سيدان في الاغلب و طبعا مش هيقدر يجيب عربيتين .
2- احتياجات الحياة اليومية : برضه الاغلب مش بيحتاج يسافر او يروح مشاوير بين محافظات و بيكون مشاويره في حدود 100 كيلومتر و ده هيخليك مش محتاج عربية كبيرة ..
3- ثقافة : العربية البيك اب دي الناس بتعتبرها عربيات نقل و اللي راكبها سواق

حتي لو بيسافر كتير.. عربية كبيرة = استهلاك بنزين أكتر.. الاس يو في تنفعك لو انت مثلا اسرة من خمسة أو ستة أو لو دايما بتبقي فيه لمة كبيرة ف عربيتك ^_^