الموضوع: أدخل شوف أقرب توتال ليك علشان صيانه نيسان المجانيه

المشاركة الأصلية كتبت بواسطة y2y1500

بما أن فات اسبوع كامل وماحدش راح ولا قالنا ايه اللى بيحصل فى حملة الفحص المجانى ..
قررت اليوم انى اعدى على توتال المرج الطريق الدائرى اتجاه الزراعى اللى مسؤول عنها مركز صيانة المحمل - 10 طريق مصر اسكندرية الزراعى - شبرا
----------------------------
اولا: نموذج الفحص المجانى


وزى ما انتو شايفين فى الصورة مكتوب الاتى: (استلم هديتك من مركز خدمة المحمل + غسيل السيارة بالكامل مجانا + كشف مجانا بالكومبيوتر + كشف وتقرير عن حالة العربية مجانا)
وكل ما تفضل المهندس مشكورا اليوم بيه هو توصيل العربية بالكومبيوتر وغالبا كان جهاز كونسلت 2 مش 3 لأن شكله اقدم من اللى فحصت بيه العربية فى يونيو 2011 الماضى وكان معاه كوبون فلتر التكييف مجانا وقالى العربية تمام زى الفل
وكتب بياناتى (الاسم - الموبايل - الفئة n16 - عداد 59150كم - مانيوال - اسمه ورقم موبايله لتنسيق حجز الصيانة والاستفادة من الخصم المقرر وهو 10% على قطع الغيار شاملة فلتر زيت 50ج + بوجيهات 68ج + فلتر هواء 130ج + تيل فرامل 300ج حسب الحاجة بالاضافة لخصم 20% على المصنعيات وهى 225ج لصيانة ال60.000 كم بالنسبة لى والتفاصيل دى على ظهر الورقة كماهو مبين بالصورة)
----------------------------------------------
ثانيا: اسئلة دارت بينى وبين المهندس .. بدون تعليق
س1. من فترة وتحديدا من وقت 55 الف كم والعربية معايا مخنوقة ع السلانسيه والrpm واطى عن قبل كده وباحس اوقات انها هاتطفى لو ما زودتش بنزين فى الطلعة او المطبات علما بأنى بانضف فلتر الهواء باستمرار كل صيانة وكل غسيل ؟
ج1. هى ع الجهاز مزبوطة اهى rpm= 630 ويمكن يكون فعلا عشان قربت تعمل صيانة وهاتغير البوجيهات والفلتر ودايما المانيوال بيبقى اوطى من الاتوماتيك وده هايفرق فعلا فى استهلاك البنزين معاك.

س2. الفرامل مابقتش زى الاول وشكلى هاغير تيل فرامل فى صيانة ال60 الف كم؟
ج2. لا مش شرط عشان مانيوال ممكن يقعد اكتر من كده عادى غير الاتوماتيك

... طبعا كان عندى اسئلة تانى زى صوت تزييق الدركسيون فى الركن وصوت خروشة من اسفل شمال التابلوه وغيرها .. بس فضلت انى اوفرها للصيانة باذن الله

اه نسيت اقولكم انى وانا باخد المفتاح من الفنى اللى وصل الجهاز بالعربية ودورها سألنى باستغراب كده .. هو انت مغير الريموت ده ؟
انا: اه .. مش احسن من ال...... اللى بيجيى مع العربية
------------------------------------------
ثالثا: انطباعى عن الفحص
بصراحة وعن اقتناع تام اديله مقبول او 2 من خمسة فقط على اقصى تقدير
لأنى بصراحة قولت هاستلم تقرير موجز عن العربية خاصة وانا داخل على صيانة كبيرة بس الواضح انى كنت فاهم غلط
لأن كل اللى تم ان الفنى وصل الجهاز بالعربية ودورها والمهندس فتح اللابتوب وشايف ان كله تمام وخلاص ومشيت من دون ما كبوت العربية يتفتح ولا يقلب نور حتى او يشيك على اى حاجة والدليل كل بنود الفحص متروكة بدون رأى لحين ما اتشرف واروح المركز وهناك يكشفوا ع العربية
-----------------------
اه نسيت اقولكم ان اكتر حاجة كنت مبسوط منها بعد ما مشيت العربية اتمسحت بالفوطة من احد عمال البنزينة عشان كانت متربة اوى وبقت مراية :s_thum1[1]:

طلع أي كلام !!!