الموضوع: العربية مش عاوز تدور

لو المشكلة فى الكونتاكت تاخد فردة كهرباء من القطب الموجب للبطارية وتلمس السلك للمكان اللى راكب فيه سلك اللقط هو بيبقى بنز كده واصل فيه سلكة بترملة وفجسم المارش افتح الكونتكت واتاكد ان الفتيس ممور ولمس السلك هتدزر العربية فك السلك وروح للكهربائى يشوف بس قبلها بص على الفيوز يمكن واحد منهم قاطع

-أنا شايف إن طريقة "Hellboy" هي الأضمن (طالما المشكلة من المارش)- وهي طريقة الرمي العادية
أي بدون الحاجة إلى المارش نهائيا.
-طريقة "Aboomar22" تحللك الوضع لو في مشكلة في الريلاي أو الفيوزات او الكابلات.
الصح إنك متقربش من موجب البطارية (safety) عشان كده بيحطوا عليه غطا لونه : "أحمر" . ده حتى لو هتفك البطارية تفصل الأرضي الأول وبعد كده الموجب. إلا لو انت محترف وعارف بتعمل إيه.
وفي كلتا الحاتين تم إستخدام الكونتاكت.

--في طريقة تانية بس هتحتاج واحد معاك: (وده لو الأعراض دي هي اللي عندك : انك لما بتيجي تدور بتسمع صوت تكة بسيطة جدا ولكن مفيش cranking)
-- سبب المشكلة دي : إن الأوتوماتيك باظ : اللي هو starter solenoid وده بيعمل حاجتين (يطلع ترس البندكس لبره ، ويوصل كهربا عن طريق البسكوتة إلى موتور المارش)
للتوضيح أكتر: المشكلة بتكون ان البسكوتة لدعت أو اتكسرت وبالتالي المارش مبيلفش ، لكن ترس البندكس بيطلع بره وعشان كده بتسمع التكة إياها)
....الخطوات:

1- العربية تكون متمورة، وشد الهاندبريك كمان.
2- الأخ اللي هتجيبه هيقعد في العربية :( تقوله: دور ..يدور ، بطل .. يبطل)
3- هتجيب مفك (أي كلام) وتعاملك هيكون مع الأوتوماتيك(الأسطوانة الصغيرة اللي لازقة عالمارش .. وبارز منها مسمارين)
4- هتحط المفك على أحد المسمارين في وضع إستعداد :إنك أول ما تسمع التكة تلف المفك لفة بسيطة وسريعة فيصبح ملامس المسمارين.(هيء وضعك وخد راحتك وادي وسع لنفسك .... هههههههه)
5- هتقول لأخينا (دور ياض) أول ما تسمع التكة إياها (يكون المفك ملامس المسمارين)
6- هتشوف شرارة غريبة (ما علينا) .. المهم هتدور معاك من أول أو تاني مرة .. وتشيل المفك سريعا (وقول لأخينا .. خلاااااص :سيب إيدك ياض هتحرق المارش)عشان ترس البندكس يرجع مكانه.

على فكرة أنا مش بهرج : لكن هو ده السيناريو اللي بيحصل معايا في كل مرة.
*حقيقة الأمر: انت وصلت كهربا لموتور المارش من بره (عن طريق المفك) ، لكن لو الأوتوماتيك سليم، فالكهربا هتوصل من جواه ( عن طريق البسكوتة إياها .. أيوه :اللي باظت).
* بخصوص موضوع : "مفك أي كلام" و "شرارة غريبة" فده سببه : إنك يا معلمي هتعدي تيار كهربي مستمر ممكن يوصل إلى 500 أمبير وده بيسموه cold cranking amper كافي انه يخلي المفك يحمر .. هههههه.
* يراعى الحرص الشديد .. والكلام ده لو إتعمل في توكيل شغال بمعايير الsafety أو ال Kaizen .. فالتوكيل ده هيقفلوه تاني يوم.

"" Please ... DON'T TRY THIS AT HOME""
وأخيرا:.لو بعد ده كله لقيت ..No response يبقى الشربونات عايزة تتغير.

أخوك في الله
أحمد حواس ..

الصور دي يمكن تساعد:
1- لحظة تلامس المسمارين في نفس الوقت بالمفك.



2- ممكن بدل المفك تستخدم jumper wire سلك محمل (وإوعى يكون عريان .. هههه)

والله يا استاذ حواس انا كنت عايز اعرف فعلا لما الاتوماتيك بيبوظ الكربائى بيدورها ازاى الله ينور عليك اما صاحب الموضوع اقولك احسن حل روح هات الكهربائى يشوفها وخلاص وهو هيتصرف ويدور ها