الموضوع: مودرن يعني اكسسوارات !!!

تحية خاصة أولا بأستاذ معتز مسئول الاكسسوارات في مودرن موتورز الدقي اللي دايما رافع راسي وبصراحة دايما عامل الواجب وزيادة .. أنا بشكرك جدا على حسن معملتك معايا غير إن أنا صاحبه لكن مع كل اللي وديتهم ليه بيقولوا ونعم الرجولة بجد ..

هو التقرير ده بخصوص وحدة الرفع بتاع التيدا و اهم حاجة تركيب انذار للنيسان صني ..

أولا بداية اليوم قبل ماروح ..

أنا من فترة وجيزة يعني من بعد مركبت وحدة الرفع فالتيدا وهو مش عجبني في باب السواق ساعات بيعلق وكده .. وزرار الاوتو بتاع الازاز بتاع السواق بيعلق وهوا بيطلع .. المهم كلمت معتز وقلتله علي اللي فيها وقال لي تعالى في أي وقت وانا اغيرلك وحدة الرفع بتاعت باب السواق قلتله شكرا وكده وكنت فرحان قوي لحسن تعاونوا معايا بصراحة زي عادته يعني .. انشغلت قوي أنا يعني كده شهر .. وبعديها كلمته قلتله أنا عايز اجلك وده كان امبارح .. قال لي تعالى نشوفلك الحاجة طبعا بدون سابق ميعاد ..

أما رحت ..

دخلت أنا على طول ساعتها لحد جوه الصيانة .. وعندهم صنيعي شاطر كده اسمه كريم بصراحة لايعلا عليه ما شاء الله .. وقاعدة أتكلم معاه وقال لي هنغيرلك وحدة الرفع ..

خلال نص ساعة انتظار ..

قاعدت اتكلم معاه شوية كده وهم بيعملوا الوحدة .. ودخلنا في حوار الريموتات .. وسألته عن ريموت الصني بكام قال لي بـ 700 جنيه .. قلتله إيه ده غالي جدا .. المهم قعدنا نتكلم شوية على الانذار وكده لقت عنده نوع انذار كده بـ 400 جنيه بالكتاوت بتاعته بـ كمان 2 ريموت زيادة .. المهم أنا أعجبت قوي بالعرض ده بس قلتله سيبني افكر ..

خلصت التيدا ..

دخلت أنا جوه بقى وجربت كل حاجة .. وكل حاجة تمام .. ورحت قلتله سلام عليكم ورحت ماشي ..

الانذار مش عايز يروح من دماغي ..

قاعدت كده اقلبها في دماغي وقلت أما اركبه .. انذار .. وعرض حلو رخيص .. واهم حاجة بقى موضوع الريموتين ده .. اتصلت بـ معتز تاني قلتله أنا هودي التيدا وهجيب الصني اركب فيها الانذار < متستغربوش أنا أصلا ساكن جنبه > .. المهم وديتها وجبت حبيبتي ووديتها عشان اعملها انذار ..

أثناء التركيب ..

كان أسوأ حاجة في الموضوع ده كله .. مدة تركيبه خد وقت كتير حوالي ساعة ونص .. بس مش مشكلة كله يهون عشان خاطر معتز . و كلمت عم ahmed .tv عشان اطمن عليه وانا هناك وكمان عشان اسأله على شوية اكسسوارات بصراحة الراجل عمره مابيتاخر عن حاجة ما شاء الله عليه يعني . و بعد كده قعدت معاهم وهو بيتركب وظبطلي كل حاجة .. المهم العربية خلصت .. وماسبتش كريم الصنيعي لحد مافاهمني كل حاجة ههههههههههههههههه .. المهم كل حاجة بقت تمام التمام الحمد لله ..

الحساب ..
440 بكل حاجة تركيب وضريبة و كتاويت و ناقص كمان فول وطعمية هههههههه ..

ملحوظة الكتاويت ده متركبة عشان اخلي الريموت الجديد يفتح الشنطة كمان .. عشان يتعرف يعني ..

احب اكون خدمتكم أحبائي أعضاء نيسان ..
ويارب مكنتش تقيلت عليكم ..
اخوكم أحمد ..