عرض للطباعة
السلام عليكم احبائي
بعد التحية و بدون مقدمات
عربيتي 128 جيت أدورها
حطيت المفتاح ولمبتين الزيت و البطارية نورو لما الف المفتاح اسمع صوت (تكة) واحدة فقط جاية من ورا الدركسيون ثم صمت ولا شيء يحدث ولا تدور ولا تحط منطق.
ايه ده؟
يتصلح ازاى ؟
و بكام؟
و عند مين؟
و اشكركم ازاى؟؟؟؟؟
و عليكم السلام ورحمة الله
لو البطارية عندك سليمة يبقي غالبا المارش ودة بيتعمل عند اى كهربائي
هل العربية كانت مركونة فترة ، فالبطارية فضيت ؟
اذا كان الجواب لا ، هل الكلاكس صوته عالى ؟
لو الكلاكس صوته طبيعى ، اذن العيب عيب مارش ، وليس بطارية
لو الكلاكس صوته واطى ، اذن البطارية نايمة وعاوزة تدور بوصلة أو بالزق
وفكرتنننننا بايام ال 128 الله يرحم ايامها
تحياتى
+1000000000000اقتباس:
المشاركة الأصلية كتبت بواسطة hamtle97
أولاً الف شكر على التجاوب
ثانياً : بالنسبة للكلاكس فهو فيه حاجة و هي:
لما استعمله يكون في الأول صوته كويس و ما يكملش و صوته ينخفض تدريجيا لحد ما يضيع و لازم امشي شوية كتير قبل ما افكر استخدمة تانى وهكذا يا تري ايه رأيكم؟ دام عزكم؟؟؟؟
بص يا باشا
دى ليها سبب من 2
الأول ان كابل البطارية يكون مهوى زى ما الزملاء قالو، بس دى ليها عرض انك بعد ما تسمع التكة تلاقى لمبات التابلوه كلها طفت، فى هذة الحالة يبقى زى ما الإخوة قالولك، زلطة وتفقعها فى الأطاش بتاع البطارية علشان يبات مطرحه والدنيا هتبقى وردى
لكن لو التكة لم يتبعها شى واللمبات لسة منورة ، يبقى فى هذة الحالة عندك مشكلة فى المارش، قد تكون اوتوماتيك وقد تكون بنديكس وقد تكون كتاوت وقد تكون بوبينة المارش او فارغة المارش او الشربونات او الجلب
وفى هذة الحالة قدامك حل من اتنين، إما انك تدور العربية زق وتروح بيها لكهربائى مارشات، وإما انك تفك المارش وتوديه لكهربائى
لو هتفك المارش قدامك حاجة من اتنين، اما تكون المشكلة فى التوصيلات او الكتاوت ، واما تكون المشكلة فى المارش نفسه (اوتوماتيك او بوبينة او بندكس او شاربونات او جلب)
علشان تحيد مشكلة الوصلات يمكن اختبار المارش مباشرة من البطارية، حط مفتاح الكونتاكت على وضع اضاءة اللمبات وهات سلك كويس، وبص على المارش هتلاقى راكب فيه سلكين ، واحد تخين مربوط بصامولة 13 جاى من البطارية مباشرة اسمه سلك اللقط وواحد رفيع راكب بكلبس ده اللى جاى من الكونتاكت، اعمل وصلة بالسلك اللى فى ايدك بين الطرفين دول على المارش، (طرف اللقط وطرف سلك الكونتاكت) مع الأخذ فى الاعتبار كل التحفظات الآتية
1- تأكد ان الفتيس فى وضع المور لأن انت هتكون قدام العربية ولو المارش قام والعربية معشقة وانت امامها النتيجة ممكن تكون وخيمة
2- تأكد من بعد يديك عن جميع الأجزاء المتحركة فى حوض المحرك السيارة تحسبا لقيام المارش
3-اياك ان يلمس الطرف الحر للسلك اى جزء معدنى فى السيارة حينما يكون الطرف الأخر موصولا بسلك اللقط لأنه يحمل طرف موجب وجسم السيارة ارضى وهذا كفيل بعمل قفلة قد تفسد اشياء فى السيارة وقد تحدث حريق وقد تصيبك باضرار، الأفضل ان تقوم بتلميس السلك فى طرف الكلبس اولا ثم توصل الطرف الآخر لطرف سلك اللقط
4- ماتتخضش مع حدوث شرارة بسيطة وصوت المارش لحظة التلميس لأن هذا هو الطبيعى، والخضة قد تؤدى لحركة غير محسوبة العواقب منك
المهم، لو المارش دار بهذة الطريقة يبقى عندك عيب فى الكونتاكت او الوصلات او الكتاوت ، لو المارش مادارش يبقى المشكلة فيه، وفى هذة الحالة يتفك ويروح لكهربائى، فك المارش مش صعب ، يتم فصل قضاش الباطارية الموجب اولا، ثم فك صامولة سلك اللقط من المارش ولف سلك اللقط بشريط كهربائى عازل، بعد كدة هتلاقى المارش مربوط بفارغة الفتيس من طرفه الآخر ب 3 مسامير بش مش متأكد هم 10 وللا 13، بس غالبا 13، فك التلات مسامير دول باستخدام مفتاح بيبة او مفتاح سوكيت (وبرضه ممكن مفتاح بلدى بس هيزهقك شوية) هتلاقى المارش بقى فى ايدك، خد المارش وروح لكهربائى
لو العيب كتاوت او جلب او شربونات او اوتوماتيك صلحه، لو العيب بوبينة او فارغة هات مارش استيراد تمنه حوالى 160 جنيه، وفى كل الأحوال لو تكلفة الأصلاح هتوصل ل 100 جنيه فأكثر هات مارش استيراد
اعرف واحد كويس فى مسألة المارشات فى ميدان عابدين ، شهرته تايسون الكهربائى،لو انت واقف فى المديان وقصر عابدين امامك هتلاقى جامع فى آخر الميدان على اليمين هو فاتح قدامه على طول
اضافة اخرى هامة جدا
حكاية ان صوت الكلاكس يضيع دى تشير بأصابع الإتهام للبطارية
اكشف على البطارية الأول
دى غالبا مشكلة بطارية
راجع وصلات البطارية ( القواطيش ) ونظفها واعد تركيبها لو ماجابتش نتيجة يبقى البطارية عاوزة شحن او تغيير
حظك حلو .. المشكلة دي لسه حصلة معايا في الريجاتا
بص يا سيدي دا يا إما المارش فيه حاجة أو سلكة مش متوصلة
أو بطارية أو دينامو
و هي ممكن تكلفك 5 جنيه لو مارش أو 15
لو بطارية يبقى حوالي 300
لو دينامو يبقى تقريبا 60
الف شكر للأخوة :
sab3aawy - haima -- khattab_89
على الأهتمام و ربنا يخليلكوم عربياتكم و مانجيش لكم في بطارية و لا مارش .....(؛
و هحاول اشوف واحد كويس يبص عليها (:
الأخوة الأعزاء
انا نظفت القواشيط و دارت و سبتها شوية دايرة 10 دقايق بعدين بطلتها و جربت تاني و لكن ما دارتش
في واحد قالى حط للبطارية ماء مقطر لو ناقصة و انا فكيت مسامير البطارية لقيت المية ناقصة في اكثر من حجرة فهل ده هو السبب ؟؟؟؟؟
و لو جبت ماء مقطر من البنزينة و حطيته هل ده يكون العلاج و خلاص ولا أيه؟
افيدونى ربنا يكرمكم.
وشكراً
روح لحد بتاع بطاريات خليه يكشف لك على ميه البطارية من حيث الكمية وتركيز الحامض ويكشف لك على أداء البطارية، الموضوع كله تكلفته 5 جنيه وهتعرف حالة بطاريتك بالظبط لو هى ناقصة ميه او حامض هيظبطهالك، ولو هى منتهية هيقول لك