الموضوع: أسعار قطع غيار أفيو و رحلة البحث عن مكان للسمكرة و الدوكو .

نبدتي الحكاية

كنت انا زمان كدة في اول 2009 عملت حادثة بالعربية ( كان ليها تقرير هنا بس انا مش لاقيه )
و صرفت ساعتها 3000 سمكرة و دوكو ( أكتشف بعد كدة ان اتنصب عليا في حوالي 2000 )
و قطع غيار بـ 1500 جنيه

بعديها باسبوعين بالظيط عربية نقل بلوكات رخام مزودة بونش ريحت علي الكبوت عندي ( كسرتلي الشنب بتاع الشبكة و مكان فردتين الشاسيه بتوع النقل علم في الكبوت عندي بأعوجاج في الصاج .
تاني يوم طالع كوبري فيصل و واحدة بعربية تمبرا راجعة مارشدير على الكوبري و طبعاً مش باصة في مرايات و لا زفت خدت الخبطة في الرفرف اليمين
ثالث يوم راكن في ارض المعارض رجعت لقيت واحد مريح على الباب الخلفي طبقلي طبلة الباب
رابع يوم واحد معيا في الشغل ( هو عضو معانا هنا في قسم بروتون ) كان راكن قدام عربيتي و عايز يطلع بس التفكير خانه عايز يطلع بضهره من قدامي و احنا راكنين موازي للرصيف
راح خابطلي الأكصدام قشره و الكلبسات فكت

المهم في خلال أسبوع بالظبط العربية بقى حالها يصعب على الكافر

طبعاً جالي اكتئاب و قررت اني اسيب العربية كدة
بس بصراحة أحساس ممتع جداً تبقى ماشي بعربية مش خايف عليها

كنت بربي سواقين التاكسي و التكاتك و أحياناً ميكروباصات

نظرية البوز بيز ما كانتش بتاكل معايا
الي بيكسر عليا كنت ممكن انط بعربيتي كلها في عربيته مش هاممني

طبعاً في الفترة دي خدت كام حكة على كام رسمة من مسامير و حروف شيفروليه و افيو كلها أتسرقت .

ده غير مرة اتوبيس نقل عام ريح عليا من ورا البيوية بتاعة الأقصدام طقت و بعديه توكتوك دخل فيا من ورا طبق الأكصدام من الحرف

ده كان في رمضان الي فات

العربية بصراحة صعبت عليا جداً

بس مكنتش عايز اعملها لعدة اسباب
1- الشعور الممتع و انت مش فارق معاك حاجة و خصوصاً سائقي الموتوسيكلات الصيني
2- كذا عربية اتسرقت محتوياتها في الشارع إلا عربيتي

إلا ان قررت اني ارجعها لأصلها و ارجعها صح مش اي كلام .

بدأت رحلة البحث عن سمكري
كنت الاول ببحث عن سمكري و بعدين هدور على بوهيجي و بعدين تراجعت و هقولكوا الاسباب

ابتديت ابحث في محيط السكن علشان ابقى قريب منه و اتابعه



روحت لواحد و ليكن اسمه ( س )
و سألته عن التكلفه للسمكرة
قعد بتاع ربع ساعة يفكر لدرجة اني قولتله اعدي عليك بكره تقولي السعر
و أثناء و هو بيفكر لقيت شخص غريب ما كنش حاضر الحوار من الاول و لا بص على العربية
قال 1500 بوية
فسألت س قولتله تبعك ده مردش عليا
المهم س تكرم و رد و قالي 500 سمكرة و 1500 بوية و قالي انا ما بقتنعش بحد في فيصل كلها يرش بوية انا هاخدها البراجيل ارشها هناك و شوية كلام من بتوع الصناعية هنعلك شوية سمكرة حلوين عليو شوية بوية لوز
قولتله بس انا عندي عيب خلقي في العربية ان الباب اليمين بيعض في الرفرف لوحدة
قالي لاء يا بيه العربية دي واخدة خبطة شديدة من قدام أثرت على جسم العربية

عرفت انه هجاص و قولتله 10 ايام و اعدي عليك

و توالت رحلة البحث من 2000 لـ 1700 لـ 2500

و في يوم افتكرت مركز صيانه جنبينا كنت بشوف عنده بصراحة عربيات طالعه من عنده زيرو فعلاً
قولت لو خد 1000 زيادة بس اكون متطمن أحسن ما اسيبها لواحد في الشارع

عديت عليه و اتقابلت مقابله محترمه و خد لفة حوالين العربية و قالي نغير أكصدام و فانوس شمال كان مشبر بس سليم
قولتله ماشي هتاخد كام
و كانت الصاعقة
1400 جنيه
فتنحت شوية و هو لاحظ اني تنحت أفتكرني استغليت المبلغ
فقالي ان المبلغ ده ليك انت علشان طلعت معرفة ( في اثناء الدردشة طلع معرفة فعلاً )

و روحت جبت الأكصدام و الفانوس بس شنب الكبوت مش لاقيه اصلي خالص حتى الان و لا هواية التوربيدو ( كان حد عايز يسرقها فأتكسرت حته منها )

و الشنب خايف اجيبه صيني لونه يغير و يبهت

و روحت سلمتها امباح بمحضر استلام تابع للمركز على ان يتم التسليم في خلال 10 ايام

أسعار قطع الغيار ( بسعر الجملة )
كشاف امامي ديبو ( 200 )
أكصدام امامي تيواني ( 185 )
كارتيرتين عجل امامي ( 50 )

الشنب سعره متفاوت و غير موجود سمعت فيه من اول 90 جنيه للأصلي حتى 175 جنيه
هواية التوربيدو سمعت فيها من 80 إلى 175 و غير موجودة

هي العربية مش متبهدلة يعني مافيها صاج معجونفي بعضه كلها تريحات على تجريحات و تطبيقة طبلة باب
بس كل حاجة في حته
علشان كدة هترش حزام و كبوت

و لما ترجع إن شاء الله هبقى ارفع صورها هنا

أدعولي بس ترجع زي ما انا عايز