مشكلة ملهاش حل.. ياريت الاعضاء الأفاضل يشاركوا بحلول
السلام عليكم ورحمة الله..
اعضاء المنتدى الكريم.. فيه مشكله لواحد صاحبي قالهالي من اسبوعين وبصراحة مش قادر افكر في اي حل ليها عشان يرجع له حقه.. فقولت اعرض الموضوع على اخواتي في المنتدى لعلي اجد له حل ..
المشكلة.. صاحبي كان عنده ميكروباص اجرة ، وحب انه يبيعه وفضل يسأل على افضل سعر ، وللاسف لم يصل لسعر مناسب له..
وللاسف برضه تعرض لالتهاب رئوي حاد وعلى اثره دخل الى المستشفى وظل 24 يوم بيها.. وقدر الله وما شاء فعل..
في فترة المستشفى كان كلم واحد صاحبه بيشتغل في موضوع البيع دا وكمان عشان يباشر لو متابعة الميكروباص لحين شفائه.. وكان قايل لصاحبه دا على موضوع البيع.. وقد كان.. صاحبه اشار عليه انه يبيع اللوحات لوحدها والعربية لوحدها.. وهذا ما تم ..
تم بيع اللوحات فقط في البداية بـ 52 ألف جنيه.. وتم علم صاحبي بالمستشفى وكمان عشان يروح يمضي بالشهر العقاري البيعية.. وقد تم حضر الاخ مسئول البيعة بسيارة ملاكي عشان ياخد صاحبي من المستشفى للشهر العقاري عشان يمضي عقد البيع..
والمفروض ان صاحبي كان فاهم انو بعد ما يمضي حيتعمل له عقد بيع تاني للسيارة الفارغة.. وكان كل ما يسأل صاحبه يقوله لسه.. لسه..
وبعدها تفاجأ بصاحبه قاله ان العربية الفارغة تم بيعها بـ 30 ألف جنيه.. وكدا مشي الحال..
بعد ما طلع صاحبي من المستشفى بقا.. فين الفلوس يا عم.. الفلوس عند الراجل لسه... :36_2_49[1]:
طب إزاي يعني .. اصل كل ما اروحله يديني 4000 في 5000 في 7000 في 3000 وهكذا..
طب والباقي فين .. لسه عنده طب كام اللي عنده دلوقتي وتعالى نروح نجيبهم.. قاله 20 ألف (من اصل فلوس النمر) طب والعربية.. فلوسها فين ؟؟ قاله ان هو باع له العربية بـ 23000 مش بـ 30 ألف زي ما قاله.. يا خبر ابيض.. (ولما اهله قعدوا في الموضوع دا قالو خلاص النص عليكم والنص علينا يعني 7000 الفرق بينهم هما الاثنين .. لا حول ولا قوة الا بالله طب يرضي مين دا ، معلش مهي غلطة صاحبك انو سلم لابننا كده.....). طب فين الفلوس.. موجودة.. وظل يراوغه لغاية لما صاحبي راح لأهله وقال لهم.. وطبعا كان قالي.. قولتله تعالى نروح نجيب الفلوس اللي عند الراجل الأول باقي فلوس اللوحات اللي هم 20 ألف.. وفعلا الحمد لله حصلنا عليهم في 4 زيارات متتالية ...
وبعد ما اهل الواد صاحب صديقي دا ادخلو بالموضوع عرفوا ان الفلوس الـ 23 ألف مربوطين في عربية نصف نقل وفعلا دي احنا شفناها عندهم بس للأسف من غير ورق يعني سكة مش مضبوطة.. والباقي في حاجات (بضاعة) في الجمرك.. ودي خاله فعلا اكدهالنا ..
اخوه قالنا ان هو حياخد العربية النقل ويدفع تمنها على اول شهر 3 اللي جاي..
طب والباقي يا جدعان.. ابوه واخوه وجوز اخته وخاله.. قالولنا حنشوف الموضوع دا مع الواد وحنرد عليكم..
وبعدها بيومين روحنالهم لقينا خالهم (ودا راجل متدين جدا) بيقولنا الكلام فيه لوع ومش مضبوط وحيصغروني في الموضوع دا وانا افضل اني ابعد عن الموضوع دا.. ايه دا بقا يا حاج.. .... ؟؟؟؟
رحنا متصلين بابوه واخوه.. قالولنا بيقوولنا الفلوس على شهر 5 الجاي.. طيب ايه الضمانات .. عايزين ايصالات امانه.. لا مش بنكتب ايصالات .. طب ازاي يعني.. وبعدين الفلوس كده حتكون شغالة معاكم واحنا بنتفرج عليها .. خلاص لو كده حيطلع كل شهر 1000 جنيه كربح طب والايصالات ، لا مش عايز يمضيها.. طب تضمنوه انتو .. لقينا بقا الكلام فعلا بقا ملاوع ومخادع واصل وفصل والحكاية.. وفيه زي تهرب كدا.. لغاية امبارح روحنالهم تاني عشان نشوف ايه اخر الأخبار.. لقينا ابوه بيقولنا انا حتصل بعمه ويجي يشوف الكلام دا عشان الواد بيلاوع في الكلام وحيصغرنا واحنا مش صغيرين وحتزعلوا مننا واحنا ميرضناش ولو لقيت الكلام مش حلو.. حتصل بيكو وانتو اتعاملو معاه بقا بالطريقة اللي تحبوها..
وطبعا كده الكلام مش حلو خالص.. وللاسف صاحبي معهوش اي (ورقة ضد) ضد الواد ده.. فايه رأيكم بقا ايه اللي يتم معاه عشان الفلوس دي ترجع ؟؟
ملحوظة.. اجمالي الفلوس اللي عند الواد ده كالآتي..
10 ألاف دول في النصف نقل اللي مش موجود لها ورق وغالبا سكتها مش مضبوطة..
27 ألف عند الواد نفسو (فلوس العربية الفارغة وكان ساحب فلوس من فلوس النمر)..
فياريت اللي عنده حل للمشكلة الغريبة دي ان يساعد ، وجعله الله في ميزان حسناته..
