الموضوع: تقرير عن صيانة ال 15000 في اوتــو ايـجيبـت و كالعاده مفاجئات جامده جدا !!!

طبعا بعد المقابله السابعه لصقور نيسان و مقابلة اوتو ايجبت و شرحهم لينا الطرق العلميه الدقيقه الي بيشخصوا و يصلحوا بيها الاعطال
اخدت قرار اني لازم اجرب اعمل الصيانه القادمه عندهم مع انهم بعيد عن بيتي و الطريق ليهم مكسر شويتين
بس بجد انا ارفع القبعه و احيي طريقة تفكير اوتو ايجبت في طرق الصيانه
و التشخيص و فعلا نادر انك تلاقي حد في مصر شغال على الكتاب صح زي ما بنقول




و طبعا من سؤالي ليهم في المقابله و كان هو هل عندكم عدد اقصى للسيارات الي بتستقبلوها في اليوم و السؤال ده عشان اتأكد من مستوى الخدمه و فعلا كان ردهم ايوه محددين العدد فعلا و عشان كده لاز تحجز الصيانه قبل اما تروح



خدت القرار يوم الاتنين اني اتصل احجز اتصلت ب 16666 و حجزت الصيانه و حددت انا يوم الثلاثاء الساعه 10 الصبح

بعد كده حبيت اتصل ب أحمد مصطفى Ahmed.tv ابلغه اني رايح اوتو ايجبت و يقولي اتعامل مع مين هناك و اذا ب حسين جمال Sonasteel لقيته اون لاين فقولتله اني رايح قالي و احنا كمان رايحين و كانت احلى صدفه انا مكنتش عارف ان الصقور رايحين و حجزت بالصدفه الصراحه فرحت اوي




المهم الصبح الساعه 8 خدت بعضي و توجهت للمركز الطريق كان زحمه جدا و فيه عربيه نقل مقلوبه و محمله زلط و بتعدي عربيه واحده بس من جمبها و قعدت ساعتين لحد ما عديت و وصلت المركز الساعه 10
و لما وصلت لقيت الصقور سبقوني على هناك.

في واحد استلم مني المفتاح و اداني شنطه حطيت فيها متعلقاتي و الحاجات الي جوه العربيه و طلبت اعمل الصيانه
وورقي كان متحضر و جاهز و مهندس الدخول قالي انتظر و رقمي هايطلع على الشاشه مع انهي مهندس استقبال و دخلت لمهندس الاستقبال و انتوا عارفين مشاكلي في العربيه القديمه حكيتها كلها و كان عنده سعة صدر و مستمع جيد كمان و وعدني بحل كل المشاكل دي مع الصيانه

انا طبعا كان عندي.

مشكله ان التكيف ساعات بيفصل لوحده و بيعمل تلج على ماسورة الضغط الواطي.

مشكله ان فيه رجه في العربيه لما ادوس فرامل.

مشكله في عومان بسيط في العربيه.

كنت شاكك ان العربيه واطيه من الشمال عن اليمين.

المشكله الازليه الي اتهمت فيها بالوسوسه (زي اتهمت فيها بالهرطقه كدا )ان في حته في الموتور عندي فيها بخر زيت و كان مركز خدمه اخر قالي ده عادي و وراني كذا عربيه فيها نفس المنظر و في اوتو ايجبت قالولي لا مش عادي طبعا و ليها حل.

و دون كل ملحوظه صغيره قولتها و بعدين راح يستلم العربيه مش زي مراكز تانيه مهندس الاستقبال مبيكتبش الا بعد ما يجرب العربيه و بيكتب من وجهة نظره بس بجد احترمت اوي المهندس ده و اوتو ايجبت


خد مني المفتاح و دخلت العربيه ورشة الصيانات و لقيت منظر مبشوفوش الا في مراكز الصيانه في اليابان لما بسافر
الفنيين بتشتغل زي ما الكتاب بيقول و بيربطوا كل مسمار بالعزم المطلوب في كتاب خدمة السياره لا زياده و لا اقل و فحصوا كل نقطه فحص دقيق جدا و بكشاف نيون عشان لو فيه تسريب اي سوائل يبان و بعد كده فحصوا الطنابير

لقوا عندي الطنابير الاماميه فيها ريجه فقالولي انهم هايصلحوها
طبعا انا كانت ايدي على قلبي في التكلفه استغربت قولتها هاتخرطوها قالو لا
قولولي هانعملهم Re-Facing للطنابير !!!؟؟؟
بكام طيب قالولي ب 105 قولتلهم ماشي لانها ارخص من الخراط و مبتاكلش في الطنابير



جابوا جهاز امريكي ركبوه على الطنابير و هي راكبه و قعدوا يزبطوا الجهاز و دخلت اتفرج لقيت الجهاز بيمسح الطنبوره بس بنسبه اقل من 0.01 من الملي ازاي ؟؟؟ بيقيس السمك بشعاع ليزر بيخرج من اداة قياس الجهاز و بيزبطوا سمك المسح من الجهاز من خلال زرار بتبين الرقم

المهم طلبت منهم انا يرصصوا الكاوتش و فعلا رصصوه باحدث جهاز ترصيص hunter DSP9200
و قالولي تكلفته 75 جنيه

و بعدين خرجت العربيه بعد كده لورشة الاصلاحات العامه عشان يشوفوا ارتفاع العربيه و يفحصوا الحته الي فيها بخار زيت دي
حطو العربيه على جهاز الزوايا و قاسوها بالمتر لقوها ما شاء الله سليمه و زبطوها زوايا

بعدين مهندس احمد مدير الصيانه جه بص على الحته الي فيها زيت في الموتور قالي كلامك صح و حلها اني اغير وش السلندر و لو عاوز اغيرهولك دلوقت الموافقه بنجيبها في ربع ساعه
قولتله هل الموضوع مستاهل و هل يضر الموتور

قالي لأ
قولتله هل الموضوع ده متكرر في الصني
قالي أيوه و ممكن يرجع تاني

قولتله طيب لو زاد بعد كده
قالي هنغير في الضمان و عندك 3 سنين

قولتله خلاص مش مشكله لو زاد ساعتها نغيره

جينا للمرحله الاخيره و هي التكيف و ده بقى كان مركز خدمه قبل اوتو ايجبت روحتله 7 مرات في نفس المشكله و محلهاش و لا عنده وقت يجرب

دخلت العربيه و كنت واقف جمبها و قابلت الفني الي بيشتغل و انا بحكم خبرتي في العربيه سئلته كام سؤال كده و لقيته فاهم جدا جدا و بتدى يجرب و يفحص التكيف بعد اعادة شحنه لانه لقى فيه شحنة فريون و معاه هوا كتير و زياده فقالي هو ممكن يكون ده السبب و ابتدى يجرب العربيه لمدة ساعه و نص دايره و فاتح تكييف و حد مزود بنزين من جوه و الحمد لله العيب اختفى و الضغوط على الجهاز كانت ممتازه ما شاء الله

و بعدين خدوا العربيه تتغسل طبعا انا كنت متوقع غسيل من بره زي مراكز الخدمة التانيه بالعكس الغسيل كان من جوه و من بره و الموتور اتغسل فوم و الفرش اتنضف و كمان حطولي فواحه بريحة الياسمين

و خلصوا شغل على الساعه 5 تقريبا و ده عشان كمية الطلبات الي كنت طالبها و الفحوصات الي اتعملت

و بعدين مهندس الاستقبال سلمني العربيه الاول قبل ما ادفع و اتاكدت من اتمام كل الي طلبته و بعدين كانت المفاجأه

قالولي مش عاوزين فلوس الصيانه الدوريه .... قولتلهم مش فاهم انت بتشتغلني ياعم قالي لا الصيانه الدوريه حضرتك مجانيه حتى 25-1-2012 و الفلتر مجاني


و بعدين فهمني كل فتفوته في الفاتوره بهدوء و الابتسامه لا تفارق وجهه و وجهني لمكان الخزينه و اداني الفاتوره ادفعها

و بجد احسن من مراكز الخدمه الاخرى الي ممكن يرميلك العربيه بره من غير ما تشوف ايه اي اتعمل و يقولك الفاتوره على الخزينه

و كمان قيمة اصلاح الطنابير و الترصيص عملولي عليها خصم نايل موتور

و ده ملخص الاعمال الي تمت

1- صيانة ال 15000
2- اصلاح الطنابير
3- ترصيص الكاوتش
4- اعادة شحن التكييف و فحص الضغوط لمدة ساعه و نصف
5- فحص ارتفاع السياره
6- فحص المساعدين و العفشه
7- الكشف على الزوايا
8- فحص الموتور لمعرفه سبب بخر الزيت البسيط
9- فحص السياره فحص عام كامل
10-فواحه ياسمين (جميله و مبتتبعش بره)

وده الي انا دفعته

105 اصلاح طنابير + 75 ترصيص + 10% ضريبه

198 جنيه و خصم نايل موتورز 15 %
----------------------------------------------------
دفعت 168 جنيه
-----------------------------------------------------

بجد شكرا اوتو ايجبت على المعامله الطيبه و التفاني في العمل و الدقه في الادء و العروض الجامده اوي اوي
و اولا و اخيرا رضاء العميل الي زي الي صعب ارضائه بجد لاني بحب الدقه في كل حاجه
اوتو ايجبت ما شاء الله 100/1000000



اما بقى احمد مصطفى Ahmed.tv الراجل ده طلع عينه معانا من الصبح و ساب شغله و بيته و معملش حاجه في التوكيل غير انه رايح عشان خاطر بقية الاعضاء
لك مني كل الحب و التقدير و لاني بجد مهما قولت مش هاعرف اوفيك حقك و معلش انا مبعرفش ارتب كلامي

بس بجد احمد مصطفى Ahmed.tv انت عمله نادره في الزمن ده
يا راجل دانا حبيت اسمي عشان على اسمك

و بحب برضه احيي و اعتذر لكل الاعضاء الي كانو معايا امبارح و وسوستلهم امبارح في دماغهم بس و طلعتلهم حاجات في عربياتهم بس معلش ده لمصلحتكوا عشان تمشوا بحاجه تقترب الى الكمال بس


بجد احلى قسم و احلى صحبه