الموضوع: استفسار من حبايبي

اولا انا بعتذر اني مجتش المقابلة إلي فاتت عشان كان عندي جامعة في نفس الوقت بعد الصلاة (مشروع تخرج بقى )

وان شاء الله اكون موجود في المقابلة الجاية لإني بجد نفسي اتعرف عليكوا

موضوعي بقى :

انا عربيتي تيدا هاتشباك 2006 لونها احمر
وكانت معايا في السعودية 4 سنين وانتوا عارفين الشمس هناك رهيبة فللأسف لون العربية باظ خالص من الشمس والعسيل الكتير بقى لونها مدي على برتقالي

ده غير ان فيها خبطة في الشنطة وباب السواق فقررت اني ارش العربية كلها مع انها فبريكة
وانا بكره اتعامل مع اي سمكري في الحرافيين من بعد إلي حصل معايا في عربيتي البياكنتو
لدرجة اني رحت لواحد بيقولي هرشهالك سكينز ب 1500 جنيه !!!!
فياريت لو حد عنده فكرة في التوكيل تتكلف كام سمكرة ورش مع العلم انه مفيهاش سمكرة كتير ومش هتحتاج معجون اوي ، ولو حد يعرف صانيعي امين وشغله مظبوط ياريت يقولي

وعندي مشكلة تانية في العربية : كنت وديتها الصيانة في السعودية عشان كانت العدادات مشبره من جوا وللأسف من بعد ما صلحوها لحد انهارده ساعات بييجي صوت زنة عالية اوي خلف العدادات لما بدوس بنزين وغالبا بما بتكون العربية بارده وقلت الكلام ده في مودرن موترز هنا ولا حد اهتم ولا صلحوا حاجة ده حتي كرسي السواق بيتنطط مع المطبات قالولي ربطناه وهو زي ما هو
فياريت لو حد يعرف يفيدني في الموضوع ده لإني بجد اتخنقت من صوت الزنة ديه وحاسس ان عزل العربية من الكبوت بقى تقريبا منعدم

آسف طولت عليكم