كنت حاعمل حادثة موت بسبب اللى مبيعرفوش يسوقو ارحمنا يارب !

الحمد الله طبعا على كل شىء طبعا قبل اى حاجة بجد فى ناس معندهاش فكرة خالص عن السواقة و معاها رخصة و ماشية ببركة دعاه الوالدين و فى اللى معندهوش اى اهتمام بقواعد السواقة و احترام الاخرين يعنى تحس انو ماشى لوحده فى الطريق و الطريق ده بتاعو انا حاحكى اللى حصل و شوفو انا اتصرفت صح ولا لا ,لان الحادثة اساسا كانت فى اقل من الثانية حاتحصل .....
اولا كنت فى الكلية خلصت محاضرات و تمام و التمام واحد صاحبى ساكن معايا فى نفس المنطقة و بيروح معايا المهم ركبنا يلا بسم الله الرحمن الرحيم طلعنا بالعربية انزل على طريق البحر ماشى عادى زى العربيات كلها و لحسن الحظ ان المرة دى بقى الوحيدة اللى مجرتش فيها ماشى بتاع 80 جيت كدة فى حتة اسمها سبورتنج الناس بتاعت اسكندرية عارفها طبعا الحتة دى مفتوحة على البحر المهم ماسك الشمال و ماشى لقيت واحد معاه لانسر بيجرى قفل عليا رحت رايح يمين راح طالع يمين تانى انا حبيت اطلع منه بقى عشان لقيته غشيم بصراحة المهم رحت الحارة الشمال خالص لقيت عربية راكنة فى الحارة الشمال على البحر و عطيلى انتظار و اليوتيرن قدامه مافيش 20 متر و عربية جديدة و انا المسافة بينى و بينه مافيش بتاع 10 متر و ده قدامى و جمبى بتاع الانسر طبعا العربية كدة كدة انا عارف مهما دست فرامل مش حاتقف رحت دايس فرامل على الاخر و طبعا العربية بتزحف انا عملت كدة عشان الحق اهدى اى حاجة و بتاع الانسر يكون عدى و اطلع وراه على طول المهم بتاع الانسر سمع صوت الزحف راح شادد انا بقى بعد كل ده لقيت العربية عمالة تمشى و خلاص داخلة فى العربية اللى واقفة رحت سايب فرامل و رفعت هاند لانى مكنتش حالحق اطلع حتى المهم رفعت هاند و رحت لفف وشها شوية طبعا العربية عرضت و عديت من العربية اللى واقفة دى يادوبك مافيش مسافة خالص رحت منزل الهاند راحت العربية عايمة فضلت اسايسها لحد لما عدلتها و طبعا البحر كله و قف ورايا بيتفرجو حايحصل اية و الحمد الله عدت على خير و ربنا سترها ..
دلوقتى بقى واحد زى بتاع الانسر ده مبيعرفش يجرى بيجرى لية ؟؟؟
2 - واحد اللى سايب عربيته على الشمال على البحر و ده طريق سريع و قدامه الملف مافيش 20 متر نفترض انها عطلانة ميزقها لحد الملف و يبعدها عن الطريق ؟؟
بجد بقت حاجة وحشة اوى و يارب الناس تتعدل شوية او على الاقل يحترمو بعضهم .
معلش طولت عليكم بس حبيت احكلكم اللى حصل عشان انا متنرفز خالص من اللى حصل ......

اعذرنى الحكاية اللى انت بتحكيها

انت الغلطان فيها

الانسر لما كان على الشمال وشاف العربية اللى واقفة جه على اليمين

وانت افتكرته بيرخم عليك

روحت رايح شمال من غير ما تكون رؤيتك للطريق كافيه وكنت هتخبط العربية المتوقفة

فلو فيه حد مش بيعرف يسوق فهو انت

اقتباس:

---

المشاركة الأصلية كتبت بواسطة محمد عز

اعذرنى الحكاية اللى انت بتحكيها

انت الغلطان فيها

الانسر لما كان على الشمال وشاف العربية اللى واقفة جه على اليمين

وانت افتكرته بيرخم عليك

روحت رايح شمال من غير ما تكون رؤيتك للطريق كافيه وكنت هتخبط العربية المتوقفة

فلو فيه حد مش بيعرف يسوق فهو انت

---

حضرتك بتاع الانسر كان بيروح يمين و شمال و قفل عليا كذا مرة و على فكرة بتاع الانسر كان حايلبس برضو فى العربية اللى كانت واقفة بس هو كان فى مسافة بينو و بينها عشان كدة هو عرف يطلع لكن انا اتزنقت ,و على فكرة الناس اللى كانت ورايا على الطريق و شايفين اللى حصل كلو بعد لما طلعت من العربية اللى واقفة و عدلت العربية كل جى جمبى و قالى فعلا انو هو اللى غلطان و بتاع االميكروباص جى جمبى و قالى ابعد عنه عشان ده غشيم عمال بجرى من اول الطريق و يقفل على الناس كلها و كان حايلبس الدنيا فى بعض ,فا ااظن ان انا مش اللى غلطان و شكرا لاهتمام حضرتك بالموضوع .

انت غلطان لانك سخنت على بتاع الانسر دة اولا والمفروض انك عارف الطريق وعارف ان فى ملف

ثانيا بتاع الانسر لو غشبم ما كنش شد علشان يفتحلك سكة..دة كان سلمك فى العربية الواقفة

اقتباس:

---

المشاركة الأصلية كتبت بواسطة yyy

انت غلطان لانك سخنت على بتاع الانسر دة اولا والمفروض انك عارف الطريق وعارف ان فى ملف

ثانيا بتاع الانسر لو غشبم ما كنش شد علشان يفتحلك سكة..دة كان سلمك فى العربية الواقفة

---

انا ماسخنتش على بتاع الانسر انا حاولت اطلع منه و بس و انا فعلا عارف الطريق و عارف ان فى ملف بس كنت حارف اطلع لان الحارة الشمال مفتوحة الملف اخد جزء بعد الحارة الشمال
ثانيا .بتاع الانسر مشدش عشان يعدينى هو شد عشان الطريق فتح قدامه

قدر الله و ما شاء فعل و حمدا لله على السلامه

اقتباس:

---

المشاركة الأصلية كتبت بواسطة wshawky

قدر الله و ما شاء فعل و حمدا لله على السلامه

---

الله يسلمك و الحمد الله على كل شىء

ربنا بيسلم لما يكون الواحد ماشي بسرعه معتدله تخيل لو انت كنت ماشي بالطريقه العاديه بتاعتك اللى قايل عليها كان يبقى ايه العمل والحمد لله ان كان هو اللى بيجري فوسعلك مكان تخيل لو واحد من بيلينوا الطريق كنت هتروح فين ده مره حصلت ان واحد رمى عليه فجأة بسرعه عاليه ضربت كلاكس ودوست فرامل وهبوس ايد اللى جمبى ان يهدى شويه ولا يكسر ربع متر احط فيه وش العربيه وهو متنح ومكلبش فى الدركسيون

هو بص نسبة كبيرة من الغلط تقع على اللى ركن فى الشمال وبرضو بتاع الأنسر علشان كان المفروض يشغل الأنتظار علشان ينبهك وانت علشان فكرت تطلع منه علطول من غير ما تكشف الطريق بس مثلا نسبة 70 ./. على اللى كان ركن على الشمال

أولا حمد لله على سلامتك
ثانيا: في الواقع انتم التلاتة غلطانين; واحد راكن على الشمال, واحد بيجري على البحر, و حضرتك فاكر إن البحر طريق سريع مع إن السرعة القانونية 60 !!

الف سلامة عليك ... وفى الظروف اللى ذى دى دايما هدى وامسك فرامل وسيبة يعدى الله يسهلة

اقتباس:

---

المشاركة الأصلية كتبت بواسطة houras1010

ربنا بيسلم لما يكون الواحد ماشي بسرعه معتدله تخيل لو انت كنت ماشي بالطريقه العاديه بتاعتك اللى قايل عليها كان يبقى ايه العمل والحمد لله ان كان هو اللى بيجري فوسعلك مكان تخيل لو واحد من بيلينوا الطريق كنت هتروح فين ده مره حصلت ان واحد رمى عليه فجأة بسرعه عاليه ضربت كلاكس ودوست فرامل وهبوس ايد اللى جمبى ان يهدى شويه ولا يكسر ربع متر احط فيه وش العربيه وهو متنح ومكلبش فى الدركسيون

---

الحمد الله على كل شىء الواحد لازم يخلى باله من كل اللى حواليه و ربنا يسترها معانا كلنا ,وشكرا لاهتمام حضرتك .

اقتباس:

---

المشاركة الأصلية كتبت بواسطة ahmedbasto

هو بص نسبة كبيرة من الغلط تقع على اللى ركن فى الشمال وبرضو بتاع الأنسر علشان كان المفروض يشغل الأنتظار علشان ينبهك وانت علشان فكرت تطلع منه علطول من غير ما تكشف الطريق بس مثلا نسبة 70 ./. على اللى كان ركن على الشمال

---

هو الغلط الكبير طبعا من اللى راكن على الشمال و كان قدامه الملف مافيش 20 متر حتى لو عطلانة مع انها عربية جديدة يزقها لحد الملف و يبعدها عن الطريق مش يسبها كدة

اقتباس:

---

المشاركة الأصلية كتبت بواسطة dr.karim emam

أولا حمد لله على سلامتك
ثانيا: في الواقع انتم التلاتة غلطانين; واحد راكن على الشمال, واحد بيجري على البحر, و حضرتك فاكر إن البحر طريق سريع مع إن السرعة القانونية 60 !!

---

الله يسلم حضرتك
اقول لحضرتك على حاجة انا مش بقول انى مش غلطان عشان انا اصلا بجب الجرى بس اقول لحضرتك على حاجة جرب كدة تمشى 60 على البحر و شوف اية اللى حيحصل ..مش حقول أكتر من كدة ...

معلش في ناس كتيرة ميهمهاش سلامة الغير ولا فلوس الغير
متحرقش دمك
قدر الله و ما شاء فعل
انا حصلتلي بس مع مقطورتين علي الصحراوي واحدة ماشية يمين وواحدة ماشية شمال وفي حارتين في النص وانا جاي بسرعتي الاقي المقطورة اللي علي الشمال زي متكون مستنياني اجي بينهم وراحت حدفت عليا بغباء وكنت هتفرم لولا ستر ربنا والمشكلة انو كمان بيبجح ويقولك وانت تعدي ليه من جمبي لو حد غلبان ومش هيعرف يتصرق اكيد دمي هيتحرق
انا نفسي بجد يعدموا معظم سواقين مصر ونخلي بالنا من كلمه معظم عشان محدش يقولي انت بتغلط فينا ويجيبو سواقين يحترموا الغير والمرور

اقتباس:

---

المشاركة الأصلية كتبت بواسطة bido600

معلش في ناس كتيرة ميهمهاش سلامة الغير ولا فلوس الغير
متحرقش دمك
قدر الله و ما شاء فعل
انا حصلتلي بس مع مقطورتين علي الصحراوي واحدة ماشية يمين وواحدة ماشية شمال وفي حارتين في النص وانا جاي بسرعتي الاقي المقطورة اللي علي الشمال زي متكون مستنياني اجي بينهم وراحت حدفت عليا بغباء وكنت هتفرم لولا ستر ربنا والمشكلة انو كمان بيبجح ويقولك وانت تعدي ليه من جمبي لو حد غلبان ومش هيعرف يتصرق اكيد دمي هيتحرق
انا نفسي بجد يعدموا معظم سواقين مصر ونخلي بالنا من كلمه معظم عشان محدش يقولي انت بتغلط فينا ويجيبو سواقين يحترموا الغير والمرور

---

الحمد الله على كل شىء
فعلا فى طريق اسمه الدولى عندنا فى اسكندرية هنا الطريق ده برضو اكترهم تريلات و نقل تقيل و فاكرين ان الطريق بتاعهم بيمشى و ياخد غرز عادى كدة و مش مهم اللى معاه على الطريق المهم هو يوصل ..و متزعلش نفسك اهم حاجة ان حضرتك بخير و حمد الله على السلامة

الحمد لله انها عدت على خير .. انا حرمت اجري جمب حد احس انه غشيم على البحر .. احتمال انه يلبسني كبير عشان هو مش عارف .. انما نقول اية بس منة لله اللي بيحب الشاي بالياسمين
انت الايام دي بتلاقي ركنة فين عند الكلية ؟!

اقتباس:

---

المشاركة الأصلية كتبت بواسطة osama.m

الحمد لله انها عدت على خير .. انا حرمت اجري جمب حد احس انه غشيم على البحر .. احتمال انه يلبسني كبير عشان هو مش عارف .. انما نقول اية بس منة لله اللي بيحب الشاي بالياسمين
انت الايام دي بتلاقي ركنة فين عند الكلية ؟!

---

هههههههههههههه فعلا فى ناس كتير اوى بتجرى و خلاص المفروض لو احنا حتى بنشد
نشد مع بعض يعنى نجرى مع بعد مش نجرى ورا بعد
و بالنسبة للكلية انا مش فى المجمع