اول حادثة بالعربية الجديدة . قصاد بلطجى . احكموا بقى !

السلام عليكم و رحمة الله و بركاته
و لو انى هشارك معاكم بخبر مش ولابد النهاردة بس عايز اتكلم بجد لانى اعصابى تلفانة جدا و مش قادر اتلايم عليها .
كنت بعدى على كوبرى معروف انه مقرف لكن الظروف شاءت انى اعدى من هناك المهم كان على يمينى جرار داخل معايا و طبعا ماشى مش فى دماغه و انا راكب تويوتا كورولا . و فجأة لقيت توك توك جاى فى المقابل على شمالى و مفيش بينى و بينه 3 سم
و عدى المهم ببص قدامى لقيت عربية كارو بحصان و سايقها عيل صغير و جاية فى المقابل . و الصراحة كان ماسك كيس عصير بيمصمص فيه مش فاضى .
طبعا قلت ابعد عنهلان الحصان لو اتحرك الكارو هيخبط فيه مش هنعرف نسيطر عليه قبل م يدغدغ العربية بتاعتى و يدوبك باخد يمين سنة صغيرة كان الجرار خلاص بدء يطلع المهم لسه يدوبك ببعد عن الشمال لقيت موتوسيكل عليه اتنين ( اجاركم الله من أشكالهم ) و الحيوان داخل قدام الحصان على شمال و قفلها خالص و بردة ماشى و خبط فيا و لقيته بيزعق .
" حاسب رجلينا يا جدع انت " قلتله يا عم انت رايح فين المهم انا اتنرفذت و بقوله الجرار على يمينى هو قعد يشتم و يسب الدين ( استغفر الله العظيم ) .
ملحوظة هامة : الظاهر انى اتلخمت فى الكلام معاه و رجليا خفت على الفرامل و العربية اتحركت و ميلت ناحيته سنة عشان كدة كان متنرفز قوى .
و فجأة لقيت التانى اللى كان راكب وراه راح واقف على الموتوسيكل و برجله فى الرفرف اللى قدام شمال و خبطة مرة و التانية و تنى الرفرف و انا خلاص كنت على اخرى ساعتها والدى كان معايا و دة اللى مضايقنى ماخدتش راحتى فى التصرف .
اول م الحيوان خبط الرفرف كسرت يمينى و فركت بالعربية و روحت ماشى .
و من ساعة الموقف دة و انا دمى محروق و اعصابى تلفانة بجد . و مدبش عليكم بضرب نفسى ستين جزمة انى مكسرتش عليهم نيمتهم على الارض و جبتهم تحت العربية عشان يعرفوا ان الله حق . و للعلم الاتجاة اللى كانوا فيه كان مخالف . و من ساعتها و ماليش نفس اركب العربية .
بس

بجد العيال بتاعة المتسكيلات بقوا خطر رهيب وعلى طول 2 و3 ورا بعض واخر بلطجه انا من كام شهر اتفتح عليا مطوه من عيل فيهم قدام قسم امبابه وكانوا سرب موتسيكلات فى فرح والواد جاى من ورايا وبيخيط لى على العربيه انى هخبطه طب انا هخبطه بظهرى ازاى وكان موقف غريب ربنا ستر وربنا يعافى بلدنا من الاشكال دى

شوية كلاب ... ربنا ينتقم منهم

انا لو مكان حضرتك والله كنت مدام العربيه اتخبطت وكده كده رايح لسمكرى كنت رميت عليه ودوست بنزين وقلبتهم الاتنين فى الارض وسبتهم ومشيت الحمد لله انها جت على قد كده

الحمد لله انا فعلا ملاحظ حوادث كتيره الفتره دي عن الموتسيكلات سرفيس واقف علي جمب الطريق ومش بيتحرك وواحد بتاع موتسيكل طااااااااااااااااااااخ بدون اي مقدمات ولي فرامل بعدها بيومين قاعد مع صحابي ولقينا الناس بتجري واحد بعربيه مازدا داخل الشارع وواحد بتاع موتسيكل عامل فيها ناصح وعايز ياخد عربيتين غرزه من اليومين ولبس
وقبلها كنت ماشي بالعربيه وواحد بتاع موتسيكل خبطني من وره وبيقولي حد بيمسك فرامل مره واحده متكلمتش ونزلت لقيت الاكصدام الدهان وقع وبيقولي متخفش يا عم مش لسه زيرو مردتش بردو بس رجعت ليه شوية علي الموتسيكل وفركت فركه كيفتني بجد جه يجري ورايا زنقه كنت هلبسه في عربية من بتوع السريحه

معلش هدي نفسك بس وكبر دماغك
دول شويه همج مينفعش تعمل عقلك بعقلهم لان ساعتها انتا حتهزق نفسك معاهم وهم حيبقو عادي هما متعودين على قله الادب
ومعلش قدر الله وماشاء فعل
وحاول بقى متعديش من المكان ده تاني وربنا يستر طريقك وطرقنا

مش عارف بس أنا شايف إن كده كده الرفرف اتخبط
يبقى خربانة خربانة
كان المفروض تفرق شمال الأول قبل اليمين

فعلا انا حاجنن من القرف ده اللى اسمه موتوسيكلات فعلا عاملين زى التتار و كلهم بيئة . لكن احمد ربنا و اركب عربيتك و انبسط وما تخليش حد يضايقك لانك خاتشوف كتير بس المهم اغصابك تكون باردة

سيادتك غلطان طبعا
كان لازم تخبطهم وطز في العربية بس المهم محدش يشتمني مابالك سب الدين كمان
اصل انا لسة عاملها من اسبوع تقريبا ونيمت الجوز على الارض وانا ماشي بالعربية

كنت جبتهم تحت العجل يا صديقي
قدر الله وما شاء فعل
فداك العربية وفداك كل حاجة ما دام انت بخير
بس ما دام العربية اتخبطت كدة كدة كنت هاتهم تحت العجل وربيهم لأن فيه شوية مخلوقات لازم تتربى !

السواقه فى البلد بقت جحيم و سلبيات الناس لا تعد ولا تحصى و ربنا يصلح الحال

متشكر ليكم كلكم على ردودكم .
و والله الواحد مبقاش عارف يقول ايه بس الحمد لله قدر الله و ما شاء فعل . و الحمد لله انها جت على قد كدة المشكلة ان والدى كان معايا و مكنش ينفع اعمل كدة على الاقل لو كنت نيمتهم تحتها و طلعت كان ممكن ييجوا ورايا و ساعتها لو كنت لوحدى و الله يبقوا جم لقدرهم لكن مدام والدى كان معايا كان ممكن يوقفنى و ساعتها كانت هتبقى مشلة اكبر .
يلا ربنا يتوب علينا من الاشكال دى

هو أنا لو مكانك,
كنت عملت زى ما كل الناس قالتلك.. فعلا كنت هأنفخهم, أقله خبطة بـTorque-Steer هتشخرمهم.. وتكمل فرك وتمشى عاااااااادى جدا..
لأنى بأتعصب بسرعة, ومش بقدر أمسك نفسى الصراحة..

بس أحترمت فيك أوى:
- احترامك وتقديرك لوجود والدك معاك..و انك كملت ومشيت من غير ما تقف.. :S_thum1[1]:
فعلا, كما قال الرسول الكريم (ص)
"....الشديد الذى يملك نفسه عند الغضب"

قدر الله و ما شاء فعل. خلاص بقينا فى شيكاغو !!!

الحمد لله انها جت بسيطة لكن حضرتك اتعرضت لمعدات كتير اوى جرار وكارو وموتوسيكل يعنى كويس اوى ان ماكنش فيه دبابة كانت كملت لكن بامانة كان لازم فعلا تكوم بتاع الموتيسكل ده طالما غلطان وقليل الادب كمان

وباء دول وباء عالم مقرفه
تلقيه ماشي جمب العربيه من ورا ويخليك مش عارف تتحرك ولو ابتديت تكسر يقولك مش تحاسب وتبتدي قله الادب
استغفر الله العظيم

احييك بصراحة على هدوئك و فى الظروف الى زى دى اتبع نظرية انا قاعد فى عربيتى و دى ناس معفنة و مش حنزل من مستوايا و اتعاريك على شتيمة مبتلزقش انا شايف ان اللى حضرتك عملتوا ده عين العقل و كبر دماغك و انزل بالعربية عادى و استمتع ان ربنا كرمك بعربية ماشاء الله حلوه و احسن من الناس دى بكتير :)

انسي اللي حصل خلاص انت لو نزلت الشارع دلوقتي لا هتفتكره ولا هيفتكرك .. كل يوم بيحصل مليون موقف زي دا و انت كتمت غيظك ودا الصح و التصرف السهل انك تميل علية ببوز العربية ترمية ع الارض وتمشي في طريقك لكن متزعلش علي تصرف يخليك محترم قدام نفسك واوعي تقول انك اتصرفت غلط. وانسي الموضوع خلاص انا مرة اتخانقت مع سواق تاكسي وكان هو الغلطان وبيقل ادبة كمان بس هو صعب عليا ليه؟؟ لانه جاهل ميعرفش وميفهمش غير الطريقة دي في الكلام ثانيا اكيد بيحقد علي اللي راكبين ملاكي.. وفي النهاية سبتة ومشيت

معلش

في سعات الواحد بيتصرف في مواقف عكس ما هو عايز

يعني صدقني لو واحد اتهور وفعلا عمل اللي بتقول عليه

وحد جراله حاجه اكيد مكنتش هتسامح نفسك انك اتسببت في عجز حد او قتل حد

علي فكرة انا كنت بطل من ابطال الكونغ فو من اكتر من 12 سنة

وياما كان بيعمل مشاكل لكن لما العمر بيعدي والواحد بيكبر ويعرف ان الواحد لو اتهور

ومشي ورا تهوره ممكن تكون النتيجة كارثية

فداك الف رفرف والحمد لله انك بخير

انا لو مكانك كنت جبتهم تحتها ومشيت بدون منطق ولا اتكلم معاهم كلمة
لسبب واحد
لما تقولة انت خبطنى ولا انت بتعمل اية .. كلام ملوش اي لازمة
لانة هيطلعك غلطان باردو .. مينفعش اروح للقاتل واسألة عن سبب قتلة
بالنسبة لة سؤال سخيف .. علشان كدة انا بطلت انزل واسأل حد
لان السؤال ملوش قيمة .. لو حد عمل حاجة معجبتنيش بشد فرامل يد واسحب مفتاح عربيتى
وانزل اتعامل وزي ما تيجي .. بدون مفتح بوقي بكلمة وهو بيتكون مفاجأة لصالحك

من كام يوم عيل سنة ميزدتش عن عشر سنين راكب فيسبا دخل ف الاكصدام من ورا
والشارع واقف والدنيا واقفة من الاربع اتجاهات وكل العربيات واقفة واسمع دب
نزلت اشوف دة اية لقيتة عيل صغير .. طيب اعملة اية ؟
جريت ع الواد الناس اللى واقفة ف الشارع لما شفونى بجري علية افتكرو انى رايح اضربة
لقيت الناس مسكانى وبتقولي حرام عليك تضرب عيل صغير !! مين قال انى هضربة
وواحد تانى اعمي مشفش حاجة بيقولي انت اللى غلطان اقولة انت شفت اية عشان تقول انى غلطان
يقول شفتك انت غلطان طب متنطق شوفت اية يقولي باردو هو انت غلطان .. يا ابن التيت

لذلك قررت ان محدش لة فدية عندى .. سواء عربية او موتوسيكل
اللى هيهرج ويخبط هياخد نصيبة
لو عربية .. هسيبة لحد ميجي قدامي واخبطة من ورا لحد ملفة
موتوسيكل هيشيلة شيلة حلوة وارد الرفرف او طبلة الباب بأيدي مش شغلانة
من اخطاء علية ان يتحمل خطأة .

ايه يا جماعة العنف دة كله ؟؟؟؟؟؟؟

بجد دي الظاهرة الي لازم نتكلم عنها مش موضوع رفرف لو جابه استيراد مش هيزيد عن 150 جنيه

بقي عايزينه يقتل واحد او يكسرله رجله عشان خبطله رفرف ؟؟؟؟؟
او لمجرد انه خدش اكصدامك
او لمجرد انه خبط علي شنطة عربيتك

في ايه ؟؟؟؟

العيال بتوع الموتوسيكلات او التوك توك او الميكروباصات او حتي التاكسي
كلهم حدث او سنهم لن يتعدي 21 سنة علي اقصي تقدير يعني عيال صغيرة
ثانيا : الفقر واكلهم
ثالثا : بيتمني من ربنا ودة منتهي احلامه انه يكون شاب روش زي ولاد الناس يعني تبان عليهم من قصة شعرهم او من مستوي صوت الكاسيت او من كمية السماعات والصبات الي مركبها - من طريقة اللبس

هما معقدين نفسيا ونفسهم يقلدوك انت راجل ابن ناس ومستريح وراكب ملاكي (طبعا بتكلم من وجهة نظرهم) ولابس كويس ومرتبط وبتحب وعايش حياتك بالطول والعرض

انا لازم ابقي زيك هركب موتوسيكل او توك توك او ميكروباص او تاكسي (واهو بردو عربية وشبه الملاكي) وهركب كاسيت وطقم صوت (للأمانة بقي النهاردة تشغيل الكاسيت وتركيب سماعات وصب وفر من مظاهر البيئة) وهركب جنوط

هو تفكيره كدة

حقده عامي عينيه وحقده هو الي بيحركه

انتوا المفروض تشفقوا عليه او حتي علي الأقل سيبه يفرغ شحنته لأن دي بتبسطوا اوي وهتخليه يرجع فخور انه شتم واحد راكب ملاكي (علي الأقل رضت غروره)

شوفناها كتير اوي
واحدة فقيرة او مش جميلة تقطع فستان زميلتها الغنية او الأكثر منها جمالا لمجرد الحقد والغيرة وليس الأيذاء في حد ذاته

تعال شوف اولاد البوابين في المناطق الراقية

هتلاقيهم هيموتوا ويقلدوا فلان ابن علان عشان راكب عربية وريحته حلوة ولابس نظارة ومصاحب فلانة
صحيح لما بيقلده بيجيب لأهله العار بس اهو دة منطقه

ياريت يا جماعة تعيدوا التفكير وقللوا شوية العنف

انا شخصيا مرة كنت ماشي وشايف توك توك جاي قصادي - كنت ساعتها في حدايق الأهرام ومعايا عربيتي القديمة (لادا) العند والشيطان صورلي انه بيعند معايا وان المفروض اني اوسعله الطريق روحت معاند وفضلت زي مانا ويا يا هوا وكبست بنزين ويايوسعلي الطريق يا أما همشي في جنازته
وفعلا علي اخر لحظة الواد فداني وكان هيتقلب لدرجة انه لطش في اكصدامي كسرلي ضفر الأكصدام البلاستيك واكتشفت انه كان سرحان في ملكوت ربنا
انا شخصيا استفدت ايه ؟؟؟؟؟؟؟؟ ولا حاجة
اكصدامي اتكسر ودفعت 30 جنيه ثمن الضفر
كنت هخبطه وساعتها مكنتش ههرب من القدر وكنت هروح القسم والمستشفي وهلاقي عليا قضية او كنت هنزل ابوس ايد سواق التوك توك انه يسامحني (مع اني بحتقره)

انا قولت الي في ضميري

رجاء محدش يزعل مني واعتبروا انكم ماقرتوش حاجة

تقبلوا مروري

والله المستعان
،
،

انا و الله مش عارف اقول ايه . غير انى تقريبا لازم اعمل حادثة صغيرة كل يوم عشان اجى هنا و الاقى التفاعل دة كله و المناقشة الراقية دى .
كل واحد قال رأية بصراحة و اللى هو شايفة صح و الأكيد انى هحترم كل الأراء سواء موافق او معترض عليها .
و للأمانة انا فعلا يومها بالليل و الله م عرفت انام و صوره الولد دة فى خيالى و ازاى يشتم و يسب الدين و انا اسكت و معملش حاجة . و بدأت افكر فى الاحتمالات بالعقل .
- والدى حاجة صعبة شوية . و لو كنت خبطهم و مشيت كان ممكن يوقفنى و ينزل يراضيهم و ساعتها كانت هتبقى مصيبة بكل المقاييس . بلطجية و اكيد معاهم سلاح ابيض و اللى خبط العربية كان باين قوى انه مش فى وعييه !
- كان ممكن اخبطهم بردة و امشى و ياعالم الطريق كان هيبقى فاضى و لا لا و هترسى على ايه مش عارف .
- للأمانة انا لو كنت لوحدى من غير تفكير أقسم بالله العظيم كنت هقفل ازاز العربية و الابواب و كنت هكسر عليهم ارميهم و افرك العجل عليهم و امشى و زى م ترسى . و كنت اقدر اوديهم فى ستين داهيه و البسهم تهمة اقل حاجة هكلم حد من قرايبى و اعملهم محضر انهم كانوا هيسرقوا العربية و ساعتها الضابط لما يشوف مهندس قدامة عربيته مخبوطة و اتنين بلطجية منهم مسطول اكيد الوضع اختلف .

بس الأهم من دة كله واحد حبيبى قالى كلمة عجبتنى قوى . ( العربية خاينه ) . قالى يعنى ممكن تعمل اللى بتقول عليه دة و نيتك انك بس ترد الاهانة بخبطة و لا اى حاجة لكن العربية ممكن تعمل لواحد فيهم عاهه مستديمة و لا يمكن تموت حد فيهم ساعتها الوضع كان هيختلف تماما .
بصراحة اقتنعت بوجه النظر دى جدا و يمكن هى اللى بقولها لنفسى و ارضى كرامتى و اقول الحمد لله و ربنا مبيسبش حق حد .
مقدر جدا مشاركتكم معايا و مليون شكر لكل اللى قال رأية و ان شاء الله ربنا يستر طريقنا كلنا و يعديها على خير

اخبطه و امشي دول ..... ولا يسوا و خليه يفرفر عالأرض

الحمد ل الله -وتذكر -الكاظمين الغيظ -هو دا كظم الغيظ بجد وعجبتنى المقولة اللى جى دى


إذا قدت سيارتك وآذاك إنسان فتمالك اعصابك واستخدم القاعدةالمكتوبة على المرآةالجانبية "الأجسام التي تراها هي أصغر مما تبدو عليه في الواقع"

إذا قدت سيارتك وآذاك إنسان فتمالك اعصابك واستخدم القاعدةالمكتوبة على المرآةالجانبية "الأجسام التي تراها هي أصغر مما تبدو عليه في الواقع"

+1111111

والله العظيم انت عملت الصح ... متزعلش نفسك ولا تتنرفز.

فوض امرك لله و حسبى الله ونعم الوكيل