الموضوع: بعد تغيير أولسية الكارونة لسه عندى نشع زيت من كارونة الشاهين !!!!!

السلام عليكم ورجمة الله وبركاته
من حوالى 3 شهور.... تحديدا فى منتصف شهر 9 الماضى
لاحظت ان الكارونة عليها نشع زيت
قبل كده كانت ناشفه تماماً
وكنت قارى موضوع للبشمهندس حسام
عن مشاكل الكارونة وعرفت ان إهمالها بيسبب مشاكل كتيره جداً ووجع قلب
فجريت بسرعه على الميكانيكى قالى عاوزه أولسيه كارونة قولتله بص على
العربية لو عاوزه حاجه تانية بص عليها

اكتشف تسريب من طبه المياه قالى لازم تتغير وهنرفع الماتور بره العربية
علشان نركب الطبه وبالمرة نركب جوان جديد لكارتيرة الزيت للنظافة
قولتله ماشى وجبت قطع الغيار وروحتله

طبعا بفضى نفسى علشان أقدر أتابعه ولو محتاج قطع غيار تانية وعلشان افهم
واشوف ايه اللى بيحصل ... المهم الميكانيكى ركب طبة المياه وجوان
الكارتيرة وحط الماتور فى الحوض
وبدآ يفك فى العامود اللى داخل على الكارونة (مش عارف اسمه ايه تقريبا اسمه عمود الكردان)
المهم كان عندى شغل ولم انتظر حتى اتمام تركيب الأولسيه قولتله الموضوع
هياخد وقت قد ايه قالى نص ساع الى ساعه بالكتير قولتله تمام هسيبك نص
ساعه وارجعلك تانى
قالى هنحتاج زيت تروس علشان نزود الكارونة قولتله ماشى عندى جركن
زيت تروس التعاون هجيبه معايا
بعد ساعه رجعتله ايه الأخبار يا اسطى على
قالى كله تمام يابيه
قولتله الأولسيه ركب كويس وان شاء الله ترشيح الزيت اتمنع؟
قالى كله تمام
قولتله انا جبت زيت التروس علشان نزوده
قالى لا خلاص الزيت مش ناقص ولا حاجه المقاس بالظبط مش محتاج تزويد

ساعتها استغربت قوى أمال الزيت اللى على الكارونة ده كله لما اتسرب من الأولسية مش هيعمل نقص فى الزيت !!!
ولما فك الأولسيه مفيش زيت هيقع من الكارونة !!!!

على العموم الأسطى على الميكانيكى أمين وبنتعامل معاه من كام سنة فى عربية والدى اسكودا فليشا
وعربية أخويا السابقة الدوجان
وعربيتى الشاهين

قولت خلاص على بركه الله
عاوز كام ياسطى قالى كله يبقى 85 جنيه
واديت بقشيش للولد الصبى اللى معاه
اتفضل ياريس وربنا يباركلك

تابع باقى القصة فى المشاركة التالية .............