بيجو 207 ؟ إية نظامها ؟

**Moe86** · 26-12-2011 04:50 AM

سلام عليكم, أنا زميل من قسم فيات و مهتم بال207 مستعملة
أنا عارف إنها نادرة شوية, و بعد بحث على قسم البيجو هنا للأسف لاقيت مواضيع بسيطة و أغلبها قديمة من 2008
بعد حوالى 4 سنين, هل فى عيوب معروفة ظهرت ؟ أخبار الفتيس الأوتوماتيك إية؟ نفس مشكلة ال307 ؟ هل أى مشاكل متكررة فى الكهرباء بتاعتها مثلا ؟
قطع الغيار برة التوكيل متوفرة ؟ ممكن أسعار لبعضها كمثال ؟ زى الفوانيس و السيور و التيل ؟

لو لاقيت 207 2008 عاملة 50,000 مثلا مانيوال فبريكة تخلص على كام مثلا ؟ 70,000 ؟
فى أخبار عن ال208 هتنزل إمتى و بكام فى مصر؟

و شكرا مقدما

**Mohab.Nabil** · 26-12-2011 08:27 PM

و عليكم السلام و رحمة الله و بركاته

انا بصراحة معرفش اوى عن الـ 207 بس هى شكلها جميل الصراحة و شكلها من العربيات المحترمة بس انا بحس انها ضيقة شوية من ورا

خصوصا ان حضرتك بتقول فى حدود الـ 70 الف ممكن تجيب 307 او c4 نظيفة و هما اكثر انتشارا و وسعا من الـ 207

دا رأيى الشخصى و بالتوفيق ان شاء الله

**Moe86** · 26-12-2011 11:53 PM

بالنسبالى كشاب لسة مش متجوز الحجم الصغير للعربية أهم من الوسع بتاع الكنبة, لأنى عايز أجيب مينى كوبر أساسا بس معدية الميزانية بتاعتى, مش مهم اللى يقعد ورا يبقى مرتاح !

و بعدين 70,000 هتجيبلى 207 مانيوال (1600 CC طبعا) موديل حديث و ماشية قليل,
فى حين إن السعر دة فى ال307 يجيب موديل أقدم و ماشية كتيييير, دة غير المخاطرة فى عيوب مشهورة فى الفتيس الأوتو و الكونترول

عموما شكرا لردك و أنا مستنى النصيحة و التجربة الفعلية من الأعضاء أصحاب العربية

**Mohab.Nabil** · 27-12-2011 08:00 PM

المشاركة الأصلية كتبت بواسطة Moe86

بالنسبالى كشاب لسة مش متجوز الحجم الصغير للعربية أهم من الوسع بتاع الكنبة, لأنى عايز أجيب مينى كوبر أساسا بس معدية الميزانية بتاعتى, مش مهم اللى يقعد ورا يبقى مرتاح !

و بعدين 70,000 هتجيبلى 207 مانيوال (1600 CC طبعا) موديل حديث و ماشية قليل,
فى حين إن السعر دة فى ال307 يجيب موديل أقدم و ماشية كتيييير, دة غير المخاطرة فى عيوب مشهورة فى الفتيس الأوتو و الكونترول

عموما شكرا لردك و أنا مستنى النصيحة و التجربة الفعلية من الأعضاء أصحاب العربية

تمام فهمت قصدك و عندك حق

و ممكن برضو تفكر فى الـ c3 الـ 1600 بتبقى فيها اوبشنز كثير اوى و فيه منها بانوراما و هتبقى فى حدود السعر ده

و بالتوفيق ان شاء الله

**Moe86** · 27-12-2011 10:46 PM

شكرا لذوقك, الc3 حاسس إن شكلها بناتى قوى خصوصا سقفها بيبان من الجنب كأنه نص دائرة !

**Moe86** · 01-01-2012 04:06 AM

بما إن محدش فادنى بأى معلومة هحكى على الجديد معايا و خلاص
مبدأيا أنا ماكنتش أعرف إن التوكيل أباظة ضايع قوى للدرجة دى!!
رحت النهاردة توكيل بيجو فى طنطا, أشوف ال207 على الطبيعة و كدة, لاقيتهم عارضين منها فئة واحدة بس مش بيبعوا غيرها: 1400 أوتوماتيك بيز لاين, المصيبة بقى بكااااااام..... 123,000 جنيه بعد التخفيض, هما فاكرين فى ناس عبيطة قوى كدة؟!
مين اللى هيدفع 123 ألف فى عربية 1400cc و كمان أتوماتيك يعنى بطيئة موووووت, دة غير إن العربية قرعة خالص (ولا جنوط ولا فتحة سقف ولا فوجات ولا فرش جلد ولا أى حاجة خالص)
اللى خدت بالى منه, إن جودة الخامات الداخلية عالية, و لكن حسيت إنها أقل من ال207 اللى شوفتها من 3 سنين, الكلام دة بجد ولا تهيؤات ؟
و مش هتكلم عن الsalesman اللى كل معلوماته عن العربية إسمها إية و بكام !!!
كنت فاكر أوماترا بتوع فيات ضايعين جدا طلع فى أضيع منهم بكتييير

**Moe86** · 07-01-2012 09:03 PM

لاحول ولا قوة إلا بالله, محدش هنا معاه 207 خالص ؟!

طب حد معاه الكتالوج بتاعها pdf بالإنجليزى؟ علشان اللى عرفت أجيبه من على النت فرنساوى و هولندى!

**mostafa53** · 08-01-2012 10:08 AM

السلام عليكم ورحمة الله وبركاته
أنا عندى 405 قديمة وباتردد كتير على التوكيل وباشوف مختلف موديلات البيجو وباسأل أصحاب السيارات عنها. اللى فهمته إن ال207 كسيارة شبابية هى فعلا الأعلى فى حدود سعرها وأنا أظن أن سعر 70 ألف فى موديل 2008 مش كتير بشرط إنها تكون فى حالة ممتازة وتكون صيانتها دايما عند الوكيل

**Moe86** · 09-01-2012 02:21 PM

شكرا يا أستاذ مصطفى, أنا بس كنت مستنى رد حد مجربها أو بيملكها

**Moe86** · 16-01-2012 03:57 PM

القسم دة ميت خالص, البقاء لله
عموما, أنا رحت توكيل بيجو تانى و قابلنى salesman مختلف قالى إن العربية 1600 مش 1400 ! ناس ضايعة بجد. و فالى برضو إنها موديل 2011 و تمنها ممكن يخلص على 120 ألف أو أقل كمان, أعتقد إن سعرها كدة غالى بس معقول شوية بالنسبة لباقى العربيات الأوروبى
و قالى مفيش أخبار عن موديل 2012, فى رأيى الشخصى هما عايزيين يخلصوا منها قبل نزول 208 الجديدة كليا
موديلات 207 الأقدم زى 2008 مثلا كانت أوتوماتيك عادى ولا ستيبترونيك زى اللى شوفتها فى المعرض؟ حاسس إن محدش هيرد و بسأل نفسى كعادة القسم دة