شراء a620 مستعملة و تقييم السيارة و تجربتي مع مركز المتحدة و صيانة ال80,000
شراء A620 مستعملة و تقييم السيارة و تجربتي مع مركز المتحدة و صيانة ال80,000 :
أحب فقط أن أنقل خبرتي للأعضاء الكرام بعد لف أكتر من شهرين و رؤية 12 سيارة من هذا الطراز و موديل 2007 تحديدا حتي يتفادوا الأخطاء و التي وقعت في بعضها و ده دليل عام لشراء أي سيارة مستعملة :
نخش في الموضوع علطول:
§ فحص الطلاء و السمكرة:
1. يجب رؤية السيارة نهارا في ضوء الشمس وخد معاك ميكانيكي لو مش بتفهم قوي و لف الأول لفتين حول السيارة لمعاينة الطلاء من الخارج و معرفة إذا كانت رشة و ما هي الأجزاء المرشوشة (بتبان عند الفواصل,كاوتش الزجاج,الأماكن الغائرة,فواصل الإكصدام,.....إلخخ) و رؤية الخرابيش الموجودة بالسيارة
2. فحص الإكصدامات جيدا لوجود زوائد طلاء.
3. إفتح الكبوت و إفحص شاسيه الكبوت و الحوض و الرفارف من الداخل و صدر الموتور
4. الشنطة و إنزع الفرش الداخلي و الأجناب و حط إيدك داخل الرفرف من الخارج و الداخل
5. إفتح الأبواب و شوف سهولة الفتح و بص علي جلد الأبواب و القوايم
6. إرفع السيارة لرؤيتها من أسفل و تحديد أماكن صدأ الأسطح
1. نظرة عامة علي الصالون و بيان نظافته (بيدل علي إعتناء المستخدم)
2. فحص جلد الكراسي و الكنبة و إقعد و إنجعص لتبين جودة التنجيد و جلد الأبواب(عيب شائع في 620 تأكل جلد الأبواب تحت أزرار التحكم في الزجاج)
3. فحص موكيت الأرضيات لتبين قطوع أو خلع
4.فحص السقف لتبين سقوط البطانة أو الفرش
5. فحص المرايات الداخلية و نور الصالون
6.فحص الأكر الداخلي و الأبانوس و النواكل لتبين كسر أو خلع
7. فحص الكنبة جيدا و التأكد من المسند الوسط و فتح الكنبة
8. فحص الأدراج و أماكن التخزين.
9.فحص كاوتش الأبواب و الزجاج الخلفي و الأمامي
10. فحص الزجاج لتبين خدوش أو تغيير أو كسور
تجربة الأتي:
- الزجاج الكهربائي (نزله و طلعه كذا مرة للأخر عشان تشوفه) من ماستر السائق و من كل باب لوحده
- السنتر من الداخل و الخارج (أزرار التحكم الداخلية عند السائق و الراكب)
- الأكر من الداخل و الخارج
- المرايات الكهربائية
-جرب نور العربية بالكامل أمامي,خلفي,شبورة أمامي,صالون,مراية,شبورة خلفي,إشارات (أمامي,خلفي,مرايات),الشنطة,م ارشدير,عدادات,أزرار الكونسول و الأبوباب,نور تحذير الأبواب الأحمر
- ولاعة السيارة (للمدخنين طبعا)
- التكييف علي كل السرعات و الأوضاع و تأثيره علي المحرك و IDLING السيارة
- المساحات الأمامية
- سخان الزجاج و المرايات و الكراسي
- الديفيدي و الشاشات و السي دي شينجر
- فتحة السقف
-الستارة الخلفية
- جميع أزرار التحكم
-سنسورالبارك و الكاميرا لو موجودين
-فحص الإطارات
- فحص المحرك و العفشة (يفضل في مكان متخصص)
- صوت المحرك و متابعة عدد لفات الموتور علي السلانسيه
-يبان صوت سيور أو برجلة في المحرك
- زود بنزين و إسمع صوت الشكمان (العربية صوتها عالي أصلا)
- حرك الدركسيون أقصي اليمين و الشمال لتبين حالة دائرة الباور
-فحص المحرك لبيان أي تسريب لزيوت أو مياه و الوصلات و قربة المياه
- رفع السيارة و فحصها من أسفل (المحرك,الشكمان,تسريب زيت أو مياه,القواعد,الجلب,العفشة)
-عشق R وشوف صوت صندوق التروس و تصرف السيارة
- عشق D و إبتدي جرب السيارة و خد ملفات حادة ببطء لبيان حالة الكبالن و المقصات.
-شد شوية بالعربية و يا سلام لو في مطبات عشان تشوف حالة العفشة و المساعدين (لو فيه صوت أو حسيت الدنيا مفككة من بعضها طبعا عارف حتعمل إيه)
- شوف حالة الفرامل مع السرعة و مع التوقف البطئ لبيان أي صوت تصفير و ده بيدل علي حالة التيل و نظام الفرامل ككل.
-لو ينفع تجري علي سرعات عاليه لبيان إستجابة الموتور ,نظام التعليق,التسريب نتيجة فقد العزل تحت الدواسة,الزجاج,الأبواب,فتح السقف.خلي بالك السيارة أربع سرعات فمع السرعة قوي الصوت حيعلي شوية
-ماتبعة نقل الفتيس في التسارع و التباطؤ.
-تجربة وضع STEPTRONIC .
- جرب تعمل كيك داون لملاحظة الإستجابة
- التأكد من سلامة فرامل اليد
-معرفة تاريخ صيانة السيارة و أماكن الصيانة و ما تم تغييره في السيارة.
ثانيا التجربة الشخصية:
أحب أن أعرض تجربتي مع مركز المتحدة ليستفيد منها الأعضاء الكرام سواء في موقعنا هنا أو باقي المواقع المتخصصة في السيارات.
السيارة A620 موديل 2007 شاريها مستعملة عاملة 85,000 كم من قريب و صديق و سوف أعرض تجربتي في الشراء و كيفية فحص السيارة في هذا الموديل تحديدا.
ما علينا,السيارة حالتها ظاهريا جيدة و مالكها الأول صارف عليها (جهاز إنذار أخر بخلاف الأصلي..دي في دي DDX7039KENWOOD ..مغير الشاشتين..بازوكا JBL...GM..طقم زينون عالي و واطي و شبورة..فوانيس رينجات) و لكن هناك فرق بين الظاهر و الباطن ...حيث أنه كان من النوع اللي بيركب و يمشي بدون متابعة و أنا أشتريت منه بدون فحص كامل (عارفين المجاملات بقي)
صيانات السيارة تامة كانت بتم في التوكيل حتي إنتهاء الضمان و بعد كده كان بيعمل الصيانة حسب الطلب (يعني الحاجة البايظة بيصلحها).
الحاجات اللي تم تغييرها في التوكيل بمعرفته خلافا للصيانة الدورية (الردياتير..مساعدين أمامي و واحد خلفي).
المهم بعد الشراء كنت عامل حسابي علي الخوابير اللي ممكن تطلعلي حيث إن دي أول عربية صيني أجيبها و سيارتي الحالية أوبترا فكان ولابد يتم عمل مقارنة و دي جاية في وقتها عشان ما نسبقش الأحداث.
أول ملاحظة إن الحرارة بتاعة السيارة عالية...فتحت الردياتير و كنت حعيط من كتر الصدأ اللي بمية (مش العكس) داخل القربة...المهم توكلت علي الله و رحت شادد علي محطة موبيل عشان أغسل دورة التبريد من الهباب اللي جواها و طبعا و هو بيغسل كنت حاسس إن بينزل من العربية مياه مستنقعات وبعد كده قفل جامدعلي كلبسات علبة الردياتير و حط جركن و نص مياه خضراء. الحساب 120 مياه+30 جنيه غسيل
مشيت بالعربية شوية و روحت ركنت....و شوية لقيت ساسي الجراج جايلي بيقول في ميه نازلة من العربية...نزلت لقيت الميه بتنقط من تحت بصورة منتظمة....المهم رحت واخد بعضي و نازل رايح عند بتاع ردياتيرات في شارع سليمان جوهر...بص بصة بخبرة (و راح حاطط إيده تحت دقنه ...هممم...)لازم نحل الردياتير يا باشا...-لأ خبير يابني- طيب يا سيدي حل بس الميه نزلها في حاجة عشان لسة متغيرة....ما ينفعش ..لازم هتنزل في الأرض...طيب خلصني....هو سعادتك غسلت دورة التبريد في المحطة...أيوه......يااااااااا ااه ليه كده بس.....و حسسني إني إرتكبت جريمة.....ده كده ممكن يبوظ الحساس و الطمبة و البلف و الجوان والخراطيم و الوصلات ووو.......(بدينا الفتاوي حاكم أنا مهندس ميكانيكا و عارف الإشتغالات دي كويس و أقصي حاجة ممكن تحصل إن HOSE ممكن يضرب غير لو جوان أو طلمبة ضعيفة أما ال THERMOSTATIC VALVE فمستحيل لأنه علي سوستة قوية و كل اللي ماكينة الغسيل بتعمله انها بتضغط علي السوستة).
المهم ماطولش عليكم (قولو طول)فك الردياتير و نزل الميه اللي لسه فلوسها ما بردتش في الأرض و هو بيقول الحمد لله اننا نزلنا الميه ديزززالميه بتاعت موبيل دي بتاكل في الردياتير....إزاي بس يا سيدي و كل العربيات نازلة بيها هي أو الحمرا.....لا لا لا..الناس دي مش فاهمة حاجة.....طيب إنجز يا عم الفاهم...المهم فك الرياتير و غسله و قالي الكلبسات بتاعت العلبة اللي تحت كان عايزة يتقرط عليها...و ركب تاني....روح بقي هات ميه ردياتير سعودي (خضراء برضه) المهم جبت 2 جركن ب 50 جنيه و شكله لا سعودي و لا صعيدي أساسا....و ملا الردياتير و برضه الميه بتنقط...إيه يا برنس مش شايف ولا إيه....و المهم بص بخبرة تاني برضه ....همم....الكوليهات عايزة تتغير...المهم 2 كوليه كبار و 3 صغيرين و الحساب 11 جنيه...المهم غير و ربط و قطعت الميه من الحتة دي و الحساب 40 جنيه و مشيت و عامل حسابي الميه حتنقص شوية و تتزود تاني يوم عشان تكون مليت دورة التبريد كاملة.
الملاحظة التانية الكاوتش متهالك وناشف بزيادة.....يلا بينا علي بتاع الكاوتش نغير ال 4 فرد HANKOOK و الحساب 2280 جنيه و الفرد القديمة كانت محجرة في الجنط (سوء إستعمال و عدم متابعة بحت) المهم قلت أشوف البطارية بالمرة و الحمد لله طلعت كويسة.
كلمت قريبي و سألته علي السيور قاللي غيرت في التوكيل علي 40,000 ....طيب يابني و إيه اللي خلاك متعملهاش علي ال 80,000 .....المهم قررت تغير السيور بس قلت قبل السيور أشيك علي حالة الزيت و أغيره هو و الفلتر (أول خطوة بعد شراء سيارة مستعملة) كلمته تاني أعرف حاطط زيت إيه فقالي كالتكس (كنت حعيط تاني...لأن شغلي محتك بالزيوت و عارف إن أداء كالتكس الفترة دي غير جيد -و ده رأي شخصي و ليست دعوه للعدول عن زيت كالتكس لمن يستخدمه- رحت رايح علي محل قطع غيار..فلتر زيت كوري بتاع لانسر بومة..15 جنيه..و واخد بعضي علي موبيل مغير بسوبر XHP في نيتي إستخدامه 2000 كيلو من أصل 5000 بس عشان ينضف المحرك و بعد كده موبيل 1.الحساب 280 جنيه زيت و 10 جنيه تغيير فلتر و 15 جنيه تربيط عفشة و قواعد عشان كانت مفكوكة.
الخطوة اللي بعد كدة تغيير السيور....كلمت التوكيل لمعرفة الصيانة ال 80,000 تتكلف كام قال 2250 شاملة تغيير طقم السيور كاملة+البلي+فلتر هواء+فلتر بنزين+بوجيهات+كشف عام علي السيارة+كشف علي تيل الفرمل+ما يستجد طلبه من العميل و الحجز قبله ب 4 أيام...ده الكول سنتر بس ليا علاقات بناس في التوكيل ممكن التغاضي طبعا عن فترة الإنتظار و تخفيض المصنعيات و مراقبة السارة أثناء الصيانةو إهتمام شوية أكتر أثناء الفحص (مفيش حاجة إتغيرت برضه في مصر...كله بيمشي بالعلاقات).
المهم قريت في كذا منتدي علي مركز النتحدة و مدي جودته قلت أجرب كلمت أ/محمود للإستفسار عن المكان و معرفة أسعار قطع الغيار و الصيانة و النظام عموما ...الراجل في منتهي الذوق و المصطلح اللي يطلق عليه USER FRIENDLY المهم إداني نمرة محمد رشاد المسئول عن الميكانيكا و قطع الغيار ...قال طقم الكاتينة كامل ب1200 جنيه + 200 مصنعية.قلت نجرب و نشوف الناس بتشكر فيه ليه.
رحت واخد أخويا و طالع علي المركز (يعيبه فقط المكان و صعوبة الوصول اليه و الطريق في حتت يخليك تغير عفشة لوحدك J).
§ المركز:
قياسا إلي تعاملي مع ورش صناعية و ليس في مجال السيارات و بس يعتبر حجم المركز جيد بنسبة 85% لاستيعاب عدد معقول من السيارات.(الشغل ممكن يتم في 6-7 سيارات في نفس الوقت)
المركز مقسم OPEN WORKSHOP PARTITIONS للعمل بكل سيارة لوحدها بطاقم محدد.
شغل الميكانيكا و الكهرباء و السمكرة و التكيف يتم تحت سقف واحد و ده شئ جيد في حالة لو حتعمل كذا حاجة في العربية.
تجهيزات المعدات المساعدة(الأوناش,الروافع,ا أجهزة) و العدد اليدوية جيد جدا و لكن ينقص جهاز Exhaust Analyzer أو يمكن موجود و أنا ما شفتوش لكن مهم لضبط المحرك و عملية الإحتراق و المساعدة في ضبط Air-to-Fuel Ratio .
إهتمام جيد بالأمن الصناعي و توزيع معدات الإطفاء.
عدد جيد من العمالة الفنية و يوزع توزيع معقول في حالة ضعط العمل أو تواجد أكثر من سيارة.
§ الإستقبال :
- في مدخل المركز تجد أ/محمود في إستقبالك بابتسامة عريضة (أول مبدأ في خدمة العملاء) و يأخذك في جولة صغيرة داخل المركز لتري الإمكانيات (خطوة ممتازة لزرع الثقة في العميل).
- تدخل بعد كده المبني الإداري و غرفة الإنتظار لتجد موظف الأستقبال اللي بياخد بياناتك و بيانات السيارة لوضعها علي DATA BASE لحفظ صيانات السيارة التي تمت في المركز (خطوة ممتازة بس إذا تم تسجيل البيانات و الشغل اللي إتعمل في السيارة و حالة السيارة و قراءات جهاز كشف الأعطال لعمل بطاقة للسيارة History Card لانه بيساعد قوي مستقبلا في سرعة كشف الأعطال و متطلبات السيارة) بس أعتقد إن أمر الشغل بس هو اللي بيتسجل و مش متأكد من ده.
- بعد كده يسألك عن المطلوب عمله في السيارة لإصدار أمر شغل و قطع الغيار لو حتشتريها من هناك لأن برضه ممكن تجيب قطع الغيار اللي إنت عايزها و هما يركبوهالك.
و أحب أقف شوية هنا عشان أمر الشغل اللي بيطلع بيكون بالمتطلبات الأساسية اللي العميل بيطلبها و مش بيسجل فيه الطلبات الصغيرة...بمعني أنه من الأفضل عمل Check List بكل متطلبات العميل (فيوز..غيار لمبة..في صوت مش عارف إيه....إلخخ) و الليستة دي تعلق بجانب السيارة لحد ما كل فني يخلص المطلوب و يعلم في اللستة و بكده يضمن إنه تعامل مع كل طلبات العميل و لا يعتمد علي الذاكرة لأن في حاجات ممكن تتنسي و تقعد تفكر الفنين كل شوية.
- كباية شاي محترمة من اللي تصحصح كادو من المركز J عاملها الكابتن إسلام.
§ الصيانة:
- المهم عملنا أمر الشغل و قطع الغيار الطلوبة و دخلت علي الورشة و انا أصلي من النوع اللي بيحب يشوف كل فتفوتة و هي بتتعمل.
1. الشكوي الأولي كانت من ان العربية بتعلي و توطي و ساعات بتبطل أوترعش شوية خصوصا لو شغلت التكيف (علي سبيل التجربة) مع وجود ريحة بنزين ني داخل الكابينة,المهم أ/محمود مع الأسطي حسين كبير الميكانيكيين و فاهم كويس جدا وصلو الجهاز و بدأ الضبط من البوابة طبقا لقراءات الجهاز – و كان في تقصير مني أني ماتبعتش الجزئية دي كويس- المهم في اللحظة دي العربية إتعدلت و ثبت الrpm في ال idling(سلانسيه) سواء بالتكييف أو من غيره.
المفروض إن جهاز كشف الأعطال بيعمل Loop Check علي كل الحساسات Sensors و تقرير عن اي Fault و خصوصا إن موديل العربية بدوايره المفروض متسجل في الجهاز.
المهم سألت الأسطي حسين علي ريحة البنزين الني قال عشان العربية ماكنتش مظبوطة.
2. الحاجة التانية كشف عام علي السيارة و تم رفع السيارة بالكامل و معاينتها من أسفل و ووجد الأتي:
- بعض لحامات الشكمان مفكوكة و محتاجة بنط لحام
- نزول مياه من مشترك دورة التبريد و بتنقط ........*
- محتاجة ربط قليل للعفشة
- جلبة الكوبلن اليمين علي وشك تتقطع
-
3. سألت الأسطي حسين علي الحرارة علوها الطبيعي فين...قال "عند النص أو بعديه بسنة و سويتش المروحة بيشتغل علي 96 درجة" .....و ده بالنسبة لي طبعا غير طبيعي عشان أنا عمري ما شفت كده لا في ياباني و لا كوري و المحرك ده أصلا ياباني فكان الموضوع ده غريب عليا
4. نزلنا العربية وفرش مشمع غلاف علي الحوض و دي برضه حركة توحي بالإحترافية و بدأ يفك السيور و جاب طقم الكاتينة بلجيكي و البلي و باقي السيور و جلبة الكوبلن صيني.
5. فك وصلات التبريد و فضي المياه في طشت نظيف عشان يحفظها و تمهيدا لتغيير المشترك اللي بيسرب و فك المشترك و إختبره قال سليم و محتاجين نغير كوليه الربط فقط.
6. تغيير السيور كاملةوجد سير الكاتينة الصغير في حالة سيئة و علي وشك الإنقطاع CONTINENTAL- ألماني- و فلتر الهواء و البنزين بأخرين صيني و لاحظ أن فيه وصلة من وصلات الباور بتسرب زيت فكها و غير ال O-RING
ثم عمل CHECK علي البوجيهات ب FILLER GUAGE لقياس خلوص البوجيهات ثم إعادة ملئها بالمياه تزويدها و تغيير 2 كوليه مياه ثم غسيل الموتور بالبنزين و المياه (و دي نقطة برضه مش سليمة عشان كان المفروض بنزين و بخار إن وجد فإن لم يوجد يبقي بنزين أو جاز و هواء بس أو فوم محركات) و خصوصا رداءة بعض خامات السيارة من حيث التقفيل أو العزل أو أنتشار طبقة صدأ خفيفة علي بعض الأجزاء المعدنية SURFACE RUST بعد الغسيل تم الكشف بالنظر علي وجود أي تسريب.
7. تم رفع السيارة لعمل بنط اللحام في الشكمان و تربيط العفشة.
8. تزويد زيت الباور و متابعة زيت الفرامل و الجيربوكس.
9. في كل خطوة كنت بسال و أترازل علي حسين عشان أشوف تصرفه مع الضغط حيبقي غزاي و في كل مرة بيرد بإبتسامة و ذوق علي كل إستفسار.
10. تغيير لمبة أستوب شمال خلفي و جبنا الكهربائي عشان أكرة الباب الأمامي الداخلية ما كانتش بتفتح ال مهم ظبتها.
11. الزجاجين الأماميين فيهم بطء شديد في جزء معين فجبنا السمكري عشان يوسع المجري شوية بس قال لا محتاجة بس
WD-40-مع إن القصة دي حصلت في الزجاج الخلفي مع قريبي و السيارة زيرو ووسعها في التوكيل و كسل يعمل الأمامي –
و رش WD-40 و فتح الزجاج و قفل زي الفل (لمدة ساعة واحدة و عقبال ما روحت كان نشف و رجع زي الأول بطئ تاني).
12. السيارة بعد ما أتمت الصيانة كان البودي مغطي تراب و يجب تخصيص بلية صغير كده يلمع العربية بعد ما تخلص و العميل برضه أكيد حيشوفه بحاجة J
13. المهم دورت و جيت أطلع وجد الأتي :
- الدركسيون بدون باور (قلبي وقع في رجلي و كنت حنزل أنط في كرش سحس) بس جه و جرب و إشتغل علطول ...الدايرة بعد ما فتحها لتغيير الO-RING فقدت الضغط و كان لازم شوية وقت لإعادة ضغط الدائرة
- لمبة الشبورة اليمين مش شغالة و جه الكهربائي و فك و ظبتها (نتيجة غسيل المياه و ضعف عزل العربية مما أدي لتسريب مياه لجهاز الزينون).
14. ينقص الورشة فقط فني جيربوكس أوتوماتيك ...و ده مش عيب قوي عشان الأوتوماتيك له ورش كتيرة متخصصة.
§ الأسعار و الخدمة :
- أسعار قطع الغيار
o طقم الكاتينة 1200
o فلتر هواء55
o فلتر بنزين35
o كوليهات المياه 5 جنيه الواحد (و ده تريبل سعر السوق بس كلها مستهلكات صغيرة بس كترها بيعد)
o ال O-RING 15 جنيه (و مش حقول سعره اللي أنا عارفه كام عشان يمكن مستر محمود يزعل مني J)
o علبة زيت جيربوكس موبيل 40 جنيه – زود شوية في الباور و إداني بقيت العلبة شبه كاملة- وده المفروض مكنش يحصل لأن المركز المفروض يظبط سوائل الحركة و الفرامل بمقابل رمزي علي قد الزيادة و خصوصا أن الزيت ده مش يتزود غير كل فين وفين .
o تغيير لمبة الستوب عملوها مجانا ورغم قلة ثمن اللمبة هي لفتة جيدة جدا لإعطاء إحساس العناية بالعميل
o كان في خبطة خفيفة في الرفرف الشمال الخلفي و عرضوا عملها مجانا برضه و لكن كنت مستعجل و كده كده حدي وش نظافة للأجناب و الإكصدامات و لما سألت السعر وائل السمكري فصل (500 جنيه سمكرة-مافيهاش غير شغل قليل من التجاريح- و 1500 دوكو) و هو سعر عالي نسبيا حتي بالنسبة لحجم العربية و خصوصا إن السقف و الكبوت و الشنطة مش حيتعملوا.
o بعض أسعار قطع الغيار أغلي من السوق في حدود 5-10% و ده مش في كل قطع الغيار...يعني ممكن قطعة غيار تجيبه زي بره و يمكن أرخص.أما المستهلكات فهي دي اللي السعر فيها غالي شوية عن السوق.
- أسعار المصنعية : حوالي 250 جنيه (الفاتورة مش جنبي و مكسل أقوم أدور عليها)
المهم الإجمالي 1590 جنيه
o بقشيش الصنايعية (و ده براحتك مفيش حد حيقولك اي أوامر يا بيه و حاجات كده) و أنا طبعا مش حقول دفعت كام و إيه لمين J
§ ما بعد الصيانة و التجربة :
- طبعا قبل الصيانات مكنتش أقدر أقرص علي العربية عشان أجربها و قلت أجرب بقي و وجد الأتي:
o ال RPM علي السلانسيه عالي شوية برضة مما يسبب مشكله و تحميل علي الفتيس و التيل لو إنت واقف في إشارة مثلا و شلت رجلك من علي الفرامل العربية عايزة تسحب لقدام فحرجع المتحدة تاني نشوف الدنيا مالها.
o زيادة معدل إستهلاك الوقود بعد ضبط المحرك و جاري متابعة النقطة دي بدقة عشان منظلمش حد.
o التسارع في البداية بطئ نظرا لحجم و وزن السيارة بس بعد ما بتعدي 40 كيلو التسارع ممتاز
o وزن السيارة مشكلة لأن النقلات مرتبطة بالسرعة و ال RPM فلو علي مطلع كوبري و لا حاجة لازم تعمل كيك داون عشان تحافظ علي التسارع.
o لوحظ علي السرعات العالية فوق 110-120 تسريب هواء سخن من عند الدواسة طبعا بسبب العزل الضعيف و دي بقي مش عارف حلها فين و إزاي وخصوصا إن لو قفلت الإزاز العربية بتبقي فرن حتي علي السرعات المنخفضة زائد ريحة البنزينالغير محترق اللي أكيد برضه بتدخل من الحتة ده (إفتكروا فوق حصل إيه) كمان تسريب من فتحة السقف مما يدل علي جودة التقفيل J
o العربية ثابتة كويس علي السرعات يعيبها بحس ان العربية بتتنطط لو الطريق مش مستوي.
o بوش خفيف في كرسي السائق عايز يتعمل.
o ضعف في إستقبال الراديو و ده مش عارف سببه إيه مع إن الكاسيت اللي مركبه محترم جدا.
o تم ضبط ضغط الكاوتش عشان كان كله علي 30 و بقي 32 أمامي و 33.3 خلفي و 35 إستبن.
o نقصان المياه تاني من الردياتير و جاري برضه متابعة النقطة دي بدقة عشان مليناها للأخر يوم الصيانة و طبعا كان لازم المية تاخد دورتها و تنقص و تاني يوم زودت شوية صغيرين و عملت بيها مشاوير طول النهار و اليوم اللي بعده لقيت المية ناقصة برضة فجاري متابعة النقطة دي بدقة و حشوف لو فيه تسريب.
o الستارة الكهرباء بتطلع حتة صغيرة و بعد كده تعلق فعايز أشوفها.
§ النتيجة:
- الإستقبال,الضيافة و الإهتمام بالعميل 10/10
- مكان الإنتظار و رحابته 9/10
- سهولة الوصول للمكان 8/10
- الخدمات المحيطة بالمركز –معدومة- يعني تيجي لوحدك من غير العيال و معاك الأكل و الميه و العصير و منك للعربية أو التلفزيون الموجود في الإستراحة.
- نظام تسجيل البيانات و الصيانة 9.5/10 - محتاج شوية الحاجات اللي قولناها فوق-
- تجهيزات الورشة و المعدات 9.5/10
- توافر قطع الغيار 10/10
- أسعار قطع الغيار 9/10
- أسعار المصنعية 10/10
- كفائة الفنيين 9.5/10 (علي إعتبار إن الكمال لله وحده) بس الناس فاهمة شغلها كويس جدا و كلام في سركو 10/10
- تجربة السيارة بعد الصيانة 7.5/10 يدوب بيطمن أن شغله تمام و دي محتاجة زقة عشان العميل بعد الصيانة برضه بيكون قلقان شوية فلازم يطمنه انه موجود.
- التقييم العام 9.5/10 ونصيحة جرب مع الناس دي مش حتخسر حاجة بل بالعكس حتستمر في التعمل معاهم علطول و سوف يتم التحديث تياعا لكل الصيانات التي سوف تتم عندهم.
و في إنتظار تعليقاتكم
