هستلم فلونس 2012 بكره

اعضاء منتدى رينو ومالكى الرائعه فلوانس الافاضل,

بأذن ربنا بكره هستلم وهرخص الفلوانس,انا جبت الفئه التانيه اوتوماتيك اللى هى ثمنها 142 الف,انا كان معايا دايهاتسو سيريون وبيعتها من اسبوعين ويوم لما بعتها رحت حجزت الشيفروليه كروز,انا كنت معجب جدا بالعربيه دى بقالى فتره بس من اسبوع غيرت وجهتى بعد مقارنه بينها وبين الفلوانس خصوصا ان سعرهم واحد.
انا حجزت من السبع اللى فى مصر الجديده تحديدا فى ميدان السبع عمارات,هما ناس محترمين (لحد دلوقتى) يعنى مامطوحوش فيا كتير ولا كان فيه اى مماطله وحتى حجزت بسعر كويس,هأخد العربيه بسعر 140500 الف جنيه وفيه واحد هيجئ معايا من السبع يرخصلى,اتمنى تكمل على خير وميكنش فيه اى مشاكل ساعه الاستلام او تكون العربيه عامله كيلومتر كتير لأنى قلقان من الموضوع ده بصراحه.

طبعا انا مش هسئل ايه اللى المفروض اخد بالى منه وانا بستلم ولا هسئل عن اى حاجه علشان انا عارف ان اكيد الجميع هينصح من غير حاجه ده غير انى بقالى فتره قاتل المنتدى بحث وقرأه عن السياره ده غير انها اصلا مع واحد صاحبى وسقتها كذا مره وسافرت بها كمان ولكن انا عندى بعض الاستفسارات الصغيره

اولا انا كنت ناوى احط بنزين 95 فهل مالكى العربيه ينصحوا بالموضوع ده ولا شايفين انه مش هيقصر فى حاجه فى العربيه؟

ثانيا بخصوص الستاير,بتتثبت على الرخصه ولا لاء؟ انا قرأت هنا فى المنتدى انها مش بتتثبت وفى السبع قالولى بتتثبت فأنا عايز اعرف علشان لو ده حقى متنازلش عنه,ولا هيا راجعه للمرور مثلا؟ ولا على حسب شطاره الولد اللى هيخلصلى الورق ولا ايه؟ علما انى تابع لمرور مدينه نصر

ثالثا لانى جديد فى الموضوع ده,الراجل اللى هيجئ يخلصلى الترخيص,المفروض اديله قد ايه؟واحد صاحبى قاللى 100 وواحد تانى قاللى 20 فأنا مش عارف

اخيرا لو فيه اى حد عنده نصايح عامه او اى تعليق هكون شاكر لو يلفت نظرى له

شكرا مقدما

تحياتى

اللهم بارك فيك وفي سيارتك واعطاك الله خيرها وكفاك شرها إن شاء الله..ماتنساش بقى تعمل تقرير استلام بالصور يبقى جامد جدا...المفروض الستاير تتثبت على الرخصة..انا مع الـ100 جنيه بس بشرط يكون اشتغل بهم بما يرضي الله

اولا الف مبروك وربنا يكرمكم فيها و يكفيك شرها يارب و يديك خيرها ان شاء الله واهنيك على الفلوانس بجد عربيه فرق كبير بينها و بين الكروز في الاول او الاخر فرنساوي و تقيل تحس انك فعلا سايق عربيه
اولا ما تنساش تدبح اي حاجه بنية العربيه ان شاء الله
ثانيا بالنسبه للبزين انا سالت في الوكيل قلي لو عندك امكانيه تحط 95 يكون افضل لانه بينصحوا بيها للعربيه و بيطول عملا الماتور غير كده عن تجربه تحس ان العربيه رايقه معاك وكمان في سحب العربيه انا كنت بحط 92 و بدات احط 95 لا في فرق بصراحه حسيته في العربيه و كمان حست ان صوت الماتور اقل
ثالثا: الساتر ما بتتسبتش على الرخصه النه مش موجوده تقريا في خطاب الافراج الجمركي
رابعا: لو الراجل خدمك و خلص كل حاجه حاو اوييي 100 بصراحه
نصائح
اولا : حاول اول 1000 كيلو ما تعديش ال 100 سرعة العربيه كذا واحد قالي كده و كمان لما اشتريت العربيه هي فعلا بتكون متلينه بس نصيحه
ثانيا: الافضل تعمل فرش للعربيه عشان مهم جدا
ثالثا: فقي اول 5000 هتلاقي صوت العربيه عالي شويه متقلقاش في الاول بس
رابعا: طبعا خلي صيانتك مع التوكيل في ايه حاجه

وربنا يارب يبركلك فيها
شكرا
تحياتي

الف مبروك و السبع بتاع مصر الجديده ناس محترمين جداً عن تجربه و ملتزمين فى المواعيد و الراجل اللى هييجى معاك ممكن تديله ١٠٠ج لو كان كويس و سريع و حاول تاخد معاك صوره البطاقه و صوره رخصه القياده علشان ما تضيعش وقت و مبروك مره تانيه

الف الف مليوووون مبروك
نصيحتي الوحيده ليك انك تحب العربيه عشان هيه كمان تحبك

شكرا لنصايحكم جميعا يا جماعه,انا استلمت امبارح على خير الحمد لله,السبع بصراحه فعلا ناس محترمين والعربيه جات حسب الميعاد المتفق عليه ومكانتش ناقصه اى حاجه وعامله كيلومتر قليل اوى (13كم) واتغسلت واستلمت وكله تمام,النقطه الوحيده السلبيه هى فى موضوع الترخيص بس انا مرضتش اقف فيها اوى
هما طلعوا معايا واحد يرخصلى كما كان متفق عليه واثناء كلامى معاه واحنا رايحين بسئله السنه هتتكلف كم,قالى حوالى 800 جنيه,طبعا انا فهمت انه عايز يطلع مصلحه,قلتله والستاير هتتثبت على الرخصه قالى طبعا يا باشا,لما وصلنا المرور اديته ال800 جنيه وفعلا ثبتلى الستاير على الرخصه وقالى ال800 دول هما اللى دفعتهم فى المرور وانا عايز حسنتى بقى,اديته 100 جنيه زياده,انا عارف ان المصاريف فى المرور كلها مش هتزيد عن 700 جنيه بكتيره اوى بالاكراميات بكل حاجه بس قلت اهو دول مقابل اثبات الستاير على الرخصه

طبعا العربيه اكتر من ممتازه فى كل حاجه وانا لسه بكتشف فيها فمعنديش حجات كتير اقولها

شكرا لكم جميعا

تحياتى وكل سنه وانتم طيبين

الف مبروك و ربنا يديك خيرها ان شاء الله.

اقتباس:

---

المشاركة الأصلية كتبت بواسطة GMakram

شكرا لنصايحكم جميعا يا جماعه,انا استلمت امبارح على خير الحمد لله,السبع بصراحه فعلا ناس محترمين والعربيه جات حسب الميعاد المتفق عليه ومكانتش ناقصه اى حاجه وعامله كيلومتر قليل اوى (13كم) واتغسلت واستلمت وكله تمام,النقطه الوحيده السلبيه هى فى موضوع الترخيص بس انا مرضتش اقف فيها اوى
هما طلعوا معايا واحد يرخصلى كما كان متفق عليه واثناء كلامى معاه واحنا رايحين بسئله السنه هتتكلف كم,قالى حوالى 800 جنيه,طبعا انا فهمت انه عايز يطلع مصلحه,قلتله والستاير هتتثبت على الرخصه قالى طبعا يا باشا,لما وصلنا المرور اديته ال800 جنيه وفعلا ثبتلى الستاير على الرخصه وقالى ال800 دول هما اللى دفعتهم فى المرور وانا عايز حسنتى بقى,اديته 100 جنيه زياده,انا عارف ان المصاريف فى المرور كلها مش هتزيد عن 700 جنيه بكتيره اوى بالاكراميات بكل حاجه بس قلت اهو دول مقابل اثبات الستاير على الرخصه

طبعا العربيه اكتر من ممتازه فى كل حاجه وانا لسه بكتشف فيها فمعنديش حجات كتير اقولها

شكرا لكم جميعا

تحياتى وكل سنه وانتم طيبين

---

الف مبروك و ممتاز انه ثبت الستاير على الرخصه . ابقى حاول تركب فرش علشان يحافظ على الصالون و مستنيين التقرير :verygood: