عرض للطباعة
السلام عليكم ورحمة الله
أستفسار عن السيات أبيزا من 94 الي 99
في موضوع مثبت بس مش موضح أجابة أستفساري
عايز أعرف المواتير اللي بتكون نزلة بيها إية وكمان اية اللي معاة التكييف والباور نازل معاة
اللي اعرفة
94 الي 96 دة بتكون 1300
ومن 97 الي 99 دة بيكون في منها 2 ماتور الأول 1000 والثاني 1400
والتكييف والباور في الي 1400 بس مش عارف الكلام دة صح ولا لا ومين فيهم كاربرتير ومين فيهم أنجكشن
علشان عايز أشتري أبيزا تكون حالتها حلوة
منتظر ردكم
وعليكم السلام ورحمة الله وبركاته
اولا اهلا بيك في قسم سيات
ثانيا
بالنسبة للسيارة السيات ابيزا اول نزول ليها كان في الثمانينات يعني هتلاقي منها موديلات 87 و88 وقبل كدة كمان بس مش منتشر الموديلات الأوائل منها غير من 87 وانت طالع ودي كانت 1000 و 1200 سي سي ودة المنتشر منها 1200 سي سي
الجيل الثاني ظهر سنة 1993 ودي اكتر شيب منتشر واعتقد دة محور سؤالك
دي كانت بتنزل 1300 سي سي كربراتير وكانت هي والبولو واخدين مواتير الجولف 2
مانزلش منها تكييف نهائي وكان في منها كوبيه 2 باب ونزل منها موديلات بجنوط 14 حديد
الجيل الثاني نزل منه حاجة اسمها face lift ودة نزل سنة 97 والتغيير كان في الأكصدامين والشبكة الأمامية والفوانيس الأمامية والخلفية والرفارف الأمامية وفرش الأبواب والعدادات ديجيتال (الكيلومتر والساعة) وزودوا RPM وعملوا المفاتيح مشفرة وتغيير طفيف في الطابلوه وطبعا التغيير الأكبر والمهم كان في الموتور بحيث انه بقي 1000 سي سي انجيكشن وقليل القليل النادر نوعا ما الي نزل مصر 1400 انجيكشن
مانزلش منها كوبيه
نزل منها تكييف وباور فقط في موديلات 99 وبردو نادرة نوعا ما الكامل منها وبتكون كمالياته كالتالي
1- تكييف
2- باور
3- 4 زجاج كهرباء
4- مرايات بالكهرباء
5- مفتاح مشفر بالريموت والأنذار
6- سنتر لوك هوا مش كهرباء شامل الأبواب والشنطة وغطاء تنك البنزين
7- نور في الشنطة وديلاي لنور الصالون
8- 4 مساند رأس
9- فرش قطيفة بلون فرش الأبواب
10 دريكسيون متحرك قابل للتعديل
بالنسبة للأسعار
الجيل الأول منها بيتراوح سعره من 16 لحد 24 علي حسب الحالة ومفيش فيه كماليات تذكر سوي الزجاج الكهربائي
الجيل التاني من 93 لحد 96 بيتراوح سعره من 24 لحد 32 علي حسب الحالة والكماليات ونزل منها 2 زجاج (تقريبا كان مجهز فقط الدفيرة بتاعتها للكوبيه) وسنتر وباور
الجيل الثاني من 97 لحد 99 بيتراوح سعره من 28 لحد 37 علي حسب الحالة والكماليات ونزل منها الكاملة بالكماليات المذكورة سابقا ونزل منها الفاضي تماما في موديلين 97 و98 ونزل منها المنتشر جدا 2 زجاج وباور ومرايات وسنتر
اتمني اكون قدرت افيدك بمعلومات قليلة وبشرح بسيط
ولو احتاجت اي حاجة عينينا الأتنين ليك
والله المستعان
،
،
شكرا شكرا شكرا كثير علي المعلومات القيمة دية
طيب أنا معايا 30 ألف ممكن أجيب أية أيهم أفضلهم
والسؤال المهم إية مشكلة العربية دية علشان بسمع ديمن يقولوي اهم حاجة العربية تكون سليمة هو في مشكلة في الشاسية علشان كدة ولا اية وأنا لما ادور أبص في أية بالظبط ولو كان فيها تكييف راكب دة يعمل مشكلة علشان مش نازلة كدة ولا إية وأسف لكثرة الاسئلة
ولك مني كل شكر وتقدير
والله ال30 دوول ممكن يجيبوا 94 او 95 بحالة جيدة وفيها كماليات وجنوط
وممكن يجيبوا 98 بحالة جيدة فاضية او بالعافية 2 زجاج وباور
بالنسبة للتكييف المتركب مش هيعمل حاجة لو متركب صح ومتغير طقم التبريد بتاعها - طقم التبريد بتاعها بيكون الردياتير والسربنتينة مع بعض وب2 مروحة علي سير واحد بيدوروا مع بعض وبيسموه الردياتير الكبير (لأن في ناس بتركب سربنتينة ورا التكييف بمروحتها )
بالنسبة للشاسيه هو زي الفل وكويس ولكن الخوف انها تكون عاملة حادثة وراشة حوض او شنطة
بالنسبة للعيوب فهي لا تذكر مفيش بس غير الطابلوه دايما الكونسول بتاعه بيكسر
وقطع غيارها شوية غالية واحيانا مش بتلاقي بعض الأشياء غير استيراد
واسال فأي حاجة مايهمكش
والله المستعان
،
،
جزاك الله كل خير
مش قادر أقلك أنت طمنتني قد إية
بأذن الله هبدأ البحث علي أبيزا من 94 الي 98 وربنا معايا
ربنا معاك ويوفقكاقتباس:
المشاركة الأصلية كتبت بواسطة kokmedo
وماتخافش من الأبيزا
عربيات جميلة جدا وعملية جدا جدا
وقطع غيارها معمرة جدا
انت بس حاول تجيب حالة كويسة عشان ماتتعبش معاها وتكرها
والله المستعان
،
،