انا محتار

**mohamed el hussien** · 25-05-2008 05:12 PM

هو يا جماعة احنا كدابين وكذبنا علي احمد صيام واقنعناة بعربية وحشة ؟
ولا احنا بنداري عيوب العربية عن الناس زي الاسبيرانزا كدة ؟
ولا احمد هو اللي حظة وحش اوووي اوووي اوووي ؟
ولا عادي بس هو مكبر الموضوع شوية ؟
ولا العربيات البروتون دي زبالة ؟
ولا فعلا عربيات فوق الممتازة ؟
ولا صاجها قوي ؟
ولا ضعيفة زي ما هنا ناس قالت كدة ؟
ولا الماليزي دة حاجة زفت والياباني الخفيفة زي اللانسر والياريس يكسب ؟
ولا اية ولا اية ؟؟؟؟؟؟؟؟؟؟؟؟؟؟؟

مظلومة يا بروتون (جين 2 )

عموما انا غن نفسي

واللة العظيم واللة العظيم

لو رجع بيا الزمن تاني ومعايا نفس الفلوس لحد 100 الف
واللة هيا الجين 2

مفيش بعدها

يا جماعة انا خلاص داخل في 60 الف كيلو واول واحد جاب جين 2 في المنتدي كلة
وكنت اول دفعة في مصر اصلا
وفعلا تحفة تحفة تحفة
وانا كمان موديل 2006
اللي كان فية مشاكل اكتر

وقصاد كل دة انا مهبدلها اووي اووي اووي

اكتر واحد بيبهدل عربيتة ومش بيحافظ عليها
وهيا مش بتقول لا

خبطات وصاج حلو
جري وبلاقي ئبات خيالي
صوت عالي وكاسيت تحفة
تكييف مش بطال

فعلا كل حاجة فعلا علي قد تمنها واكتر واللة

**mazagnge** · 26-05-2008 05:12 PM

العيب : من أبو صــــــــــــــيـام :)

**sss** · 26-05-2008 07:05 PM

العربيات البروتون اصبح ليها مصداقية توازي مصداقية العربيات الكوري و بتقرب كل يوم من الياباني وده شئ يتفق عليه غالبية اصحابها و منهم حضرتك
غير كده في نقطة خاصة بيا وكانت برضه وجهة نظر الاستاذ توت و هي ان دي اول عربيات اسلامية خالصة 100% و عشان النقطة دي بس انا ممكن اضحي بحاجات كتير تشجيعا ليها و مساهمة في تطويرها و دي نقطة بتقرب العربيات دي من قلوبنا بشكل كبير فما بالك لو بتاخد بشرائك ليها امكانيات في الاداء والثبات و الكماليات و الاعتمادية بتزيد عن اي عربية في الفئة السعرية بتاعتها ويمكن في الفئات الاعلى
انا شايف ان الاغلبية الساحقة من اصحاب العربيات البروتون راضيين جدا عنها و يمكن سعيدين جدا بيها و بعض الللي اعرفهم طايرين بيها خاصة الجين تو
لكن نرجع و نقول ان مفيش عربية من غير عيوب لكن في بعض الاحيان مبتكونش العيوب دي من العربية نفسها ممكن تكون من اصحاب العربية و ممكن تكون من التوكيل وده اللي انا برجحه في موضوع الاستاذ صيام و بتون عيوب في عربية بذاتها مش في كل العربيات اللي نفس الموديل
العيوب اللي ظهرت في العربية دي مدياني احساس انها كانت مركونة لفترة طويلة و ان التوكيل كان عارف انها فيها مشاكل لكن حب يتخلص منها قبل الدفعة الجديدة "تقريبا الوقت اللي اتباعت فيه العربية كان اخرالقديم بدليل ان الناس اللي استلموا بعده عربياتهم فيها تغييرات بسيطة عن الموديلات اللي هم شافوها"
عشان كده انا شايف ان ده كان من سوء حظ الاستاذ صيام و لازم ياخد اجراءات ضد التوكيل لحد ميرجع حقه لكن العربية نفسها بريئة الى حد كبير من العيوب دي كلها

**total_n76** · 26-05-2008 08:04 PM

انا معاكم فى الكلام ده ويمكن انا قعدك ادرس انى اشتريها لمدة سنة كاملة وجبتها عن اقتناع تام
وحتى العيوب اللى بتظهر فيها مراتى كل يوم تقولى مش عارف ايه وزار الازاز ومش عارف ايه اقولها عادى مش مشكلة عادى
لانى عارف مقتنع جدا تقوم تقولى اصل مراية الحب عميا
لكن هى مشكلة استهلاك الوقود اللى عندى دى هى اللى مجننانى وخصوصا 10 لتر \ 100 كم
وبقول لكل الى بيفكر اشترى وتوكل على الله وهتلاقيها بتديك قد ما بتحبها وهتتغاضى عن حاجات كتير لانك بتحبها

**ahmedsiyam** · 27-05-2008 11:51 AM

يا باشمهندس محمد انت محسسنى انى بالومك فى العربية انما ابدا و الله انت قولت على رايك و انت مجرب فعلا و ده ماحدش يسالك فيه خالص و انا برضه قولت على رايى و انا راكب و مجرب برضه
يا سيدى الفاضل انا كنت مقتنع جدا بالعربية و لو رجع بيا الزمن هاشتريها برضه بس بعد فحص دقيق و غير عادى
وانا لما باحكى موضوعى ده لافادة الناس لان زيى مافى ناس بتشكر فى العربية و مابتشتكيش منها فى ناس برضه قابلتها مشاكل فيها و هو ده فكرة الحوار
انما لو انا فى اول الموضوع كنت ثائر جدا و متغاظ من اللى حصلى فانا على حق لانى ماكنتش خلصت لسه صيانة الـ 1000 و بدأت المشاكل تظهر
و صبرت عليها لحد لما ظهر موضوع الدهان ده نرفزنى جدا و برضه تقبلت الكلام انها تترش كلها فى صيانة الـ 15000 انما لما استلمت العربية اسؤ من الاول و ماتعملش فيها حاجة و خرجت بخسائر فى الصالون كانها عربية مستعملة خلاص بقى انفجرت
ومعلش تغور بروتون اللى بتعمل عربيات بدون ماتتاكد من الجودة بتاعتها و يغور توكيل عز العرب اللى العربية تدخل سليمة تطلع معيوبة
بس هى العربية محترمة فعلا لا شك و لا خلاف بس انا حقى ابقى مضايق انا دافع 90000 جنيه فى عربية من اول 1000 كلم بتطلع فيها عيوب و التوكيل موش عارف يحل فيها حاجة

انا ياسيدى الفاضل موش بالومك و باشكرك على مجهوداتك فى افادتى و افادة الاخوة الاخرين بتجربتك مع العربية و دعواتك ربنا يفرجها عن قريب

**M.Nasr** · 29-05-2008 03:21 PM

والله يا استاذ صيام كلنا زعلانين عشانك وحاسين بيك وبندعيلك ربنا يعوضك عنها ويقدم لك اللى فيه الخير وافتكر الاية الكريمة (وعسى ان تكرهو شيئا وهو خير لكم)
ماحدش عارف الخير فين واعتبر دا ابتلاء من ربنا ولازم تصبر وتتحمل عسى يكون دا فى ميزان حسناتك
ويارب يكرمك ان شاء الله وتحل المشكلة على خير وفى انتظار خبر يفرحك ويفرحنا كلنا ان شاء الله

**M.Nasr** · 29-05-2008 03:27 PM

المشاركة الأصلية كتبت بواسطة mohamed el hussien

هو يا جماعة احنا كدابين وكذبنا علي احمد صيام واقنعناة بعربية وحشة ؟
ولا احنا بنداري عيوب العربية عن الناس زي الاسبيرانزا كدة ؟
ولا احمد هو اللي حظة وحش اوووي اوووي اوووي ؟
ولا عادي بس هو مكبر الموضوع شوية ؟
ولا العربيات البروتون دي زبالة ؟
ولا فعلا عربيات فوق الممتازة ؟
ولا صاجها قوي ؟
ولا ضعيفة زي ما هنا ناس قالت كدة ؟
ولا الماليزي دة حاجة زفت والياباني الخفيفة زي اللانسر والياريس يكسب ؟
ولا اية ولا اية ؟؟؟؟؟؟؟؟؟؟؟؟؟؟؟

يا اخى الكريم انت مالكش ذنب فى اللى حصل خالص الحكاية كلها نصيب
ونصيب الاستاذ صيام كدا دى حاجة بتاعة ربنا مالناش يد فيها
انت قولت رأيك الشخصى وعن تجربة عملية كمان يعنى ماكنش كلام عالفاضى وكانت نيتك سليمة طبعا وهى الافادة فمتحملش على نفسك ذنب
كل اللى ممكن تعمله انك تدعى للاستاذ صيام ربنا يوفقه وياخد حقه من التوكيل