الموضوع: تقريرين : عن صيانة 30 الف فى توكيل اوتو ايجـيبت .. وعن انطباعى عن تركيب عازل الكابوت

تقرير الصيانة و تركيب عازل الكابوت توكيل اوتوايجيبت

طبعا كعادتي في الصيانات بقوم بكتابة ورقة علي الكمبيوتر من نسختين بحيث واحدة تبقي معايا وواحدة اسلمها لمهندس الاستقبال و كانت ملاحظاتي كالآتي :

1- عمل صيانة 30000 كيلو
2- ريحة بنزين رهيبة داخل العربية بعد التفويل
3- ترصيص الكاوتشات
4- تركيب عازل الكابوت
5- تظبيط انوار الكشافات
6- سماع دربكة في المطبات من الناحية الشمال امامي

------------------------------------------------

- وصلت توكيل اوتوايجيبت في تمام الساعة 10 صباحا ً و كنت حاجز علي ميعاد 11 صباحا ً و لما وصلت قام التوكيل باستلام العربية

- اخدت رقم من الرسيبشن و عدد 2 كوبون كل كوبون فيه 2 مشروب و عدد 1 باتيه و علي فكرة اللي مش عايز الباتيه ممكن ياخد بداله مشروب برده عادي و انتظرت حتي ظهر رقمي علي الشاشة في الرسيبشن و ذهبت الي مهندس الاستقبال اللي الابتسامة مش بتسيب وجهه و دي كانت حاجه بسطاني بصراحة

- استلم مني العربية ووضحت له النقاط اللي عايز يتكشف عنها في العربية و اخذ نسخة من الورقة طبعا اللي فيها الملاحظات و قال لي اني هستلم العربية الساعة 3 الظهر .. قولتله مفيش مشكلة و بعدين لاقيته هيقول لي علي التكاليف .. قولتله تكلف مفيش مشكلة المهم استلم العربية بدون اي مشاكل .. فابتسم و قال لي كده اتقفنا

- جه اخويا الحبيب احمد مصطفي اللي الواحد مهما عمل مش هيوفيه حقه ابدا و محبته الغالية لما عرف اني رايح التوكيل اصر انه يجيي و يكون معايا في التوكيل اليوم ده رغم تعبه الغير عادي يوم المقابلة و انا عارف اد ايه مشغول .. ربنا يخليك يا احمد ..
طبعا احمد جه و معاه المدام و طبعا انا كمان كنت واخد المدام معايا بس التوكيل كان مليان فمنفعش نقعد في صالة الانتظار اللي قدام الورشة فالمدامات بقي قعدوا في الرسيبشن و انا و احمد لفينا بقي في التوكيل و احمد كان بيعرفني علي التوكيل و العاملين المحترمين اللي فيه و طبعا التقينا بأعضاء من نايل موتورز و اتكلمنا كتير مع بعض و كنا سعداء بالمقابلة الجميلة ديه

التوكيل بجد تحفة و منسق و مترتب و الناس هناك كلها ماشية علي خطوات مرتبة يعني مفيش بهرجة .. من الحاجات اللي شوفتها في التوكيل و عجبتني اوي هي طريقة تخزين قطع الغيار في المخزن بصراحة حاجه روعة و اول مرة اشوفها في حياتي و طبعا احمد سارد كل ده في تقريره

http://www.nilemotors.net/Nile/262833-a.html

بعد اللفة الكبيرة اللي لفيناها في التوكيل التقينا بالمهندس راجي العضو المنتدب لأوتوايجيبت راجل في قمة الاحترام بصراحة و اتكلمنا كتير عن العربية الصني و عن العربيات الموديلات الاخري

نيجي بقي اللي حصل في العربية :

1- عمل صيانة 30000 كيلو : طبعا انا كنت عملت صيانة الـ 30000 في توكيل السبع من قبل لكن كان نفسي اربط العفشة بالعزم بتاع المصنع الحقيقي فعلا فعملت الصيانة طبعا بدون تغيير الزيت لأني كنت مغيره و فعلا يا جماعه اول مرة في حياتي من يوم ما اشتريت العربية الاقي ان رجلاش صالمولة الدركسيون تتظبط صح بنسبة 100% و الدركسيون طالع من التوكيل مش تقيل ولا حاجه

2- ريحة بنزين رهيبة داخل العربية بعد التفويل : و ديه كنت بشمها اول ما افول البنزين لغاية زور التانك و بالفعل لاقوا ان جوان طرمبة البنزين مكانتش متركبة مظبوط فطبعا ظبطوها و بعدين روحنا محطة امارات مصر و فولنا العربية و زجاج العربية مغلق تماما و فعلا مبقاش في ريحة بنزين بعد التفويل نهائيا ً

3- ترصيص الكاوتشات : العربية كانت لما بتيجي علي 120 كيلو بلاقي الدركسيون في خبط كده المهم قلت لهم نرصص 4 كوتشات و فعلا بعد الترصييص لا يوجد اي خبط عند الـ 120 و علي فكرة هما بيرصصوا الكاوتشين الاماميين في مصنعية صيانة الـ 30000 كيلو طبيعي

4- تركيب عازل الكابوت : بصوا يا جماعة انا ملاحظتش اي تغيير في صوت الماتور بعد تركيب العازل و لا في اي حاجه و انا كنت عارف كده من قبل ما اركب بس بصراحة يكفي المحافظة علي كابوت العربية من البطارية و كمان العازل كويس عشان لو حصل ماس لاقدر الله يبقي كده الماس يبقي بعيد عن جسم العربية لأنه اقرب حاجه ليه الكابوت و عشان كد بنصح فعلا بتركيبه.

5- تظبيط انوار الكشافات : كنت عايز اظبط الانوار في التوكيل بس مكانش في عدة لتظبيط كشافات الشكل القديم من الصني لكن وعدوني بالاتصال بي اول ما تكون العدة موجودة و العدة عبارة عن مفك عادة بس يكون طويل :))) طبعا مستغربين ان في التوكيل مفيش مفك طويل بس مش مشكلة يعني مش حاجه جوهرية بالنسبة لي و انا ظبطها فعلا عند واحد كهربائي .

6- سماع دربكة في المطبات من الناحية الشمال امامي : طبعا الموضوع ده اتظبط جدا و العربية بقت تمام مع تربيط العفشة بالعزم الصحيح زي المصنع

التكلفة الاجمالية = فقط 276 جنيه
صيانة الـ 30000 مجانية حتي اخر شهر ديسمبر و دفعت 15 جنيه اسبراي و تركيب العازل حوالي 265 جنيه

ده كان تقريري و ملحوظاتي في زيارة توكيل اوتوايجيبت و من هنا بشكر كل العاملين بتوكيل اوتوايجيبت و بخص الشكر للمهندس راجي و و المهندس هاني و المهندس سامح و الاستاذه امنيه و جميع العاملين

معلش اعذروني تقرير طويل شوية لكن كنت حابب اذكر كل حاجه بالتفصيل

اخوكم
بيشوي PEACEMAN