زيت المحرك m11

**ahmedmoh** · 29-12-2011 10:12 AM

السلام عليكم اعضاء المنتدى الكرام

امبارح رحت أعمل الصيانة الدورية لعربيتي m11 في مركز الصفوة في اسكندرية عندنا
الصيانة طبعاً ماشية كل 3 شهور عشان انا استخدامي للعربية مش كتير و مشاويري معظمها قريبة
المهم انا لما عملت صيانة الألف في تكنو سيرفيس حطيت زيت 10000 كيلو و المهندس هناك قاللي 10000 أو سنة أيهما يحين أولاً
امبارح كانت صيانة 6 شهور بعد الألف
و انا عند موظفة الاستقبال بتقوللي الصيانة فيها تغيير زيت
قلتلها ازاي ده زيت 10000 و العربية لسة ماحصلتش ال 4000
قالت بس مر عليه 6 شهور قلتلها قالولي في تكنو بيتغير على سنة
قالت لأ ست شهور
قلتلها اعملي الصيانة من غير تغيير الزيت

فياريت حضراتكم تفيدوني في الموضوع ده
هو كل 6 شهور وللا سنة ؟

**ahmedmoh** · 29-12-2011 10:19 AM

كنت رايح الصيانة عندي مشاكل في العفشة
تزييق بشكل بشع جاي من ورا مع الحفر و ما أكثرها عندنا مع اني باخدها زي السلحفة
و صوت غريب جاي من العجلة اللي قدام شمال طول ما هي ماشية
انا ماعرفتش الاقي وصف الصراحة للصوت فقالولي هناك هنختبر العربية على الطريق و نشوف ايه الحكاية
بعد الصيانة صوت العجلة اللي قدام راح الحمد لله
لكن التزييق اللي ورا ماراحش لكن حدته خفت

**katoba** · 29-12-2011 11:30 AM

هما 6 شهور مش سنة

**ahmedmoh** · 29-12-2011 01:57 PM

طيب هو من شروط الضمان اني اغير زيت عندهم ؟
وللا عادي ؟

**kimocyc** · 29-12-2011 04:45 PM

انت صح.. الموظفة غلط.. (مركز الصفوة .. مركز خدمة)

الزيت يا 10 آلاف يا اما سنة.. كلام مؤكد من تكنو سيرفيس (المركز الرسمي التابع للوكيل)

**ahmedmoh** · 29-12-2011 05:26 PM

المشاركة الأصلية كتبت بواسطة kimocyc

انت صح.. الموظفة غلط.. (مركز الصفوة .. مركز خدمة)

الزيت يا 10 آلاف يا اما سنة.. كلام مؤكد من تكنو سيرفيس (المركز الرسمي التابع للوكيل)

انا فعلاً كلمت تكنو النهاردة و قالولي سنة

شكراً يا رجالة
انا اساسا كنت في تنكو امبارح بحاول أقدم الحجز عشان انا حجزي كان يوم 4 بس مش هبقى فاضي شهر 1 كله
فقالولي اطلع على الصفوة
العجيب ان في راجل كان واقف هناك سمع المنهدس و هو بيقوللي اطلع على الصفوة قام الراجل قاعد يشتم في الصفوة قلتله ليه حضرتك عملوا معاك ايه ؟ قاللي دول حرامية و بوظولي العربية
انا قلت بيني و بين نفسي ماهو ممكن يكون سوء استخدام او حالة فردية مش أمر يعني
انا هروح و أمري لله
و رحت هناك الميزة بس هناك انهم عندهم ساحة كبيرة للعربيات اللي جاية
بعكس تكنو سيرفيس لازم تقف في طابور العربيات صف تاني برا في الشارع و الشارع اصلا ضيق خلقة وخناقات مع الناس بقى و السواقين
و يا سلام بقى لو جه اتوبيس يعدي .. طابور العربيات ده كله بيمشي يلف من السلطان حسين و يرجع تاني من بداية الشارع عشان هو اتجاه واحد
و صدق الرجل في نصف ما قال :)
و النصف الآخر ربما أيضاً يكون صادق فيه

**khaled_Saga** · 29-12-2011 09:36 PM

حسب كلام المهندس ابو بكر فى مركز ابو رواش .. يا 10,000 يا 9 شهور !!
انا كنت مغير زيت فى صيانة الالف الاولى فى شهر مايو ولما روحت صيانة ال 10 الاف كنت عامل بالعربية 6 الاف لسه فقالى حرام نغيره دلوقتى خليه فى صيانة ال 10 الاف (اللى هى ميعادها شهر يناير اللى جاى) لان الزيت بيتغير يا كل 10 الاف او 9 شهور

هذا والله اعلم

**ahmedmoh** · 29-12-2011 10:06 PM

المشاركة الأصلية كتبت بواسطة khaled_saga

حسب كلام المهندس ابو بكر فى مركز ابو رواش .. يا 10,000 يا 9 شهور !!
انا كنت مغير زيت فى صيانة الالف الاولى فى شهر مايو ولما روحت صيانة ال 10 الاف كنت عامل بالعربية 6 الاف لسه فقالى حرام نغيره دلوقتى خليه فى صيانة ال 10 الاف (اللى هى ميعادها شهر يناير اللى جاى) لان الزيت بيتغير يا كل 10 الاف او 9 شهور

هذا والله اعلم

خالد باشا
هو شيء غريب فعلاً ان كل مركز بيقول كلمة
يبدو كدة ان كل مركز له سياسة خاصة في المسألة دي

**khaled_Saga** · 29-12-2011 10:44 PM

المشاركة الأصلية كتبت بواسطة ahmedmoh

خالد باشا
هو شيء غريب فعلاً ان كل مركز بيقول كلمة
يبدو كدة ان كل مركز له سياسة خاصة في المسألة دي

فعلا يا احمد واضح ان الموضوع كده

كمان نسيت ارد عليك فى تانى سؤال وهو ان حسب كلامهم لازم اغير الزيت عندهم والا العربية تخرج من الضمان بردو مش عارف هل ده كلام اكيد ولا كل مركز بكلمة!!