الموضوع: رحلة سعيدة مابين مرور فيصل وبين السرايات وعربية الظابط الانسر ! !

السلام عليكم ورحمة الله وبركاته

النهادره كان اجازة من الكلية عندي مافيش امتحانات وحتى تلسيمات مشروع التخرج واقفة عشان الامتحانات فقلت فرصة اروح المرور اخلص موضوع الرخصة بنفسي بدل مايتعمل عليا شغل وبدل مانا ماشي مخالف

امبارح بليل عديت على الراجل اللى عملت عنده الاستيكرات وشلت الفاميه والملصقات وكنت غاية في الحزن مش عشان الفلوس اللى ادفعت فيه عشان المجهود والتعب حاجة والله تحزن لما تشوف كل الشغل والتعب اللى عملته بيتشال قدامك

المهم قلت مش مشكلة وخليت استيكر الجمب قلت احاول اثبته لون تاني على الرخصة في الفحص لو مانفعش اشيله وامري لله

توجهت اليوم صباحا لمرور فيصل فضلت واقف في طابور محترم وبعد وقفة طووووووووووووووويلة اكتشفت اني واقف في طابور غلط

المهم سالت هنا وهنا لحد ماعرفت ان المخالفات مش بتدفع في مرور فيصل اصلا

قالي لازم تروح النيابة في مرور بين السرايات وبعدها ترجع مرور فيصل تفحص وتستلم الرخص

طبعا انا كنت عارف ان مشوار مرور بين السرايات مرورا بشارع بين السرايات والجيزة وجامعة القاهرة في يوم زي الخميس ده رايح جاي عايزله بتاع تلت ساعات

لكن قلت اروح مرور بين السرايات على الاقل ادفع المخالفات وابقى اروح يوم السبت الصبح مرور فيصل افحص علطول

وفي اثناء مانا في طريقي لمرور بين السرايات والبهدلة في الشمس والزحمة ! ! فعلا الفاميه كان رحمة

شفت عربية لانسر بومة

فاميه سوبر دارك وشايل النمر وقمة في الافتزاز حرقتلي دمي

انا هسيبكم مع الصورة واي حد في موقفي وفي الظروف والبهدلة مابين مرور والتاني والفحص والغرامات عشان شوية استيكرات هيبقى شعوره ايه لو شاف عربية زي دي قدامه



طبعا انا كان هاين عليا اوقفه اضربه بس الغلط مش عليه لان واحد زي ده لو مش مسنود سندة حلوة او ظابط او لواء ماكنش هيقدر يمشي بالمنظر ده نهائيا ! !

اكيد مش شرط يكون ظابط والفاميه مش مبين نهائيا هيئة اللى قاعد جوة لكن مش عارف ليه احساسي بيقولي انه ظابط

دي كانت مجرد بداية حرقة الدم في اليوم السعيد اللى انا قضيته مابين مرور فيصل ومرور بين السريات

كملت في طريقي مش هتكلم عن الزحمة والمكروباصات اللى ماشية عكس اتجاه قدام جامعة القاهرة والناس اللى بتقطع الاشارة والظباط وامناء الشرطة عاملين من بنها

لان الحجات دي كلها مفروغ منها ومعروفة

وصلت لمرور بين السريات ركنت وطلعت النيابة

ماكنتش مصدق نفسي اول مالقيت الشباك بتاع الرخص المسحوبة مافيش عليه طوابير ولا حتى طوابير على الخزنة والمرور فاضي ولكن ده شئ طبيعي لاني علما وصلت هناك كانت الساعة دخلت في 1

وقفت في الشباك واحدة قاعدة بتاكل ساندوتش وعمال انادي عليها لو سمحتي

يا استاذة

يا فندم

وهي بتاكل الساندوتش واكن مافيش بني ادم واقف قدامها

وفي الاخر بتشاورلي على الشباك اللى جمبها حتى مش هاين عليها ترد << مش عايزة تضيع ثانية من غير الاكل ماهي مش فاضية

قلتلها حضرتك هو مش الشباك التاني ده مكتوب عليه الرخص المسحوبة على الطرق السريعة

مش بترد وبتشاور وهي مكملة اكل على نفس الشباك

رحت وقفت في الشباك الراجل عمال يكتب ومش فاضي

رحت راجع للست اللى بتاكل الساندوتش لقيت واحد جيه قعد جمبها رحت مديله الايصال بص فيه

قالي تعالى بكرة

قلتله ليه ؟ قالي عشان انت الرخص بتاعتك لازم عشان نحدد المخالفة نبص على التقرير اللى كتبه الظابط والتقرير مش موجود والتقرير هيجي بكرة قلتله هو مش مكتوب بند المخالفة في الايصال وعلى اساسه هيتم تحديد المخالفة ؟

قالي لاء لازم نشوف التقرير

طبعا اول ماقالي الكلمة دي افتكرت كلمة الراجل لما قالي الظابط كاتب فيك تقرير هيدفعك مش اقل من 400-500 جنيه مخالفات ! ! !

سمعت الكلمتين دول ودمي اتحرق بزيادة ورحت خارج من المرور وبعد ماخرجت بقول طب انا هجي بكرة ازاي وبكرة الجمعة ؟ ؟

وبكدة تبقى انتهى اليوم السعيد اللى هيتكرر بإذن الله يوم السبت مرة تانية

واشوفكم بعد ماعرف مخالفة التقرير يوم السبت ان شاء الله