انضمام رسمي لعائلة هيونداي - الانترا 2012
بسم الله الرحمن الرحيم,
الحمد الله اليوم بقيت عضو في عائة هيونداي معاكم, بسيارة الانترا 2012 GL ( اول فئة اوتوماتيك ) كحلي.
طبعا دي اول عربية سيدان ليا و اول عربية اوتوماتيك و اول عربية 1600 فماشي بحسس على الشارع, الحمد الله ماشاء الله نقلة نوعية من كل شيء مقارنة بالمحروسة القديمة.
طبعا انا مسوقتهاش 6 ساعات على بعض الى الان و ملاحظاتي المبدأية كالاتي :
الشكل الخراجي :
مزايا :
بصراحة شكلها هي الخلاني اتنازل عن مبدائي (هاتشباك) و عن نظريتي في شراء سيارة في 2012 بدون Active Security Measures (ِبدون ABS و AIRBAGS)
طبعا انا عارف انه ده لايغني عن الامان .. لكن برده ارجع واقول اني كنت حقفل ال AIRBAGS كدة كدة :) و كلها سنة ولا اتنين واركب انا ال ABS في الحرفيين LOL:)
عيوب الشكل الخارجي :
-به اماكن كثير جدا حتلم تراب (لمت بالفعل) و حتبقى صعبة في التنظيف
- لا قدر الله السمكري الي حيشتغل فيها حتبقى امه داعية عليه من كتر السوك و الكرفات
الشكل الداخلي :
بالنسبة لسيارة اول فئة و من غبور كمان فانا معجب بيها جدا ... فيها خامات ممتازة و خامات متوسطة لم الحظ خامات فقيرة او حاجات مش متقفلة كويس.
القيادة :
السيارة سهلة جدا و سلسة جدا اعتقد الباور خفيف زيادة على اللزوم بس في ناس ممكن تحبه كدة, الدركسيون بيتعدل في اتجاهين في هذه الفئة و عامة الجلوس مريح جدا و الكرسي ساند الظهر و حتى المسند الراس وضعه ممتاز .
العزل :
عزل السيارة ممتاز بصرحاة باسثناء الكاوتس علما بان نوعه هانكوك و مقاسه 15 بص بصراحة صوته في الطرق الي للسة لم ترصف جيدا بيوصل للكابينة .
صوت المحرك بيبان فقط عند الحرق KICKDOWN ولم اصل لسرعة اكثر من 100 للحكم على صوتع بعد كدة بس لحد 100 صوته هادئء ومريح
النقلات, بصراحة مش بحس بيها نهائي و الفتيس سهل جدا و ممتع رغم اني لم استعمل المانوال لسة.
الرؤية :
بسبب شكل السيارة الرؤية الخلفية صغيرة جدا (الزجاج الخلفي صغير ) و الكابود غير مرئي بالمرة
و طبعا بالنسة لي الشنطة عاملالي مشكلة نفسية :)
احلى حاجة في السيارة المريايات الجانبية والي في المنتصف . الجانبية كبيرة جدا جدا جدا و مقعرة بزاوية ممتازة تكشفلك الحارات كلها بصراحة بطريقة (مطمئنة جدا)
المحرك:
مجربتش اقسى عليه طبعا بس في القيادة العادية لم اشعر بوجوده من هدوئه, و المرتين 3 الي حرقت فيهم كدة في وسط الطريق ... اقتنعني عن جدارة انه ممتاز بس برده انا جاي من سيارة 1200 سي سي يعني لو المحرك تعبان برده حيبقى قوي بالنسبة لي.
ده كدة ملخص سريع لانطباعات عنها و الحمد الله مفيش اي عيوب ظهرت غير حاجة واحدة غايطاني ! الساعة كل ماظبطها .. و انزل واقفل العربية و اركب تاني بترجع زي ماكانت هي و تظبيطات الكاسيت ..وبالنسبة لكاسيت عربية stock الصوت جيد جدا من راي بالمناسب,
يارب تبقى فتحة خير و يكفيني شرها, و عقبال كل الي نفسه في عربية يجيبها ان شاء الله :)