تحذير للاسكندرانية بخصوص سرقة العربيات

اولا السلام عليكم و رحمة الله و بركاته

الموضوع ده عشان احكى فيه موقف لسه حاصل قدامى من ساعتين بالضبط يعنى حوالى الساعة 2

المكان : الكورنيش بعد مكتبة الاسكندرية مباشرة امام المستشفى قبل شارع قناة السويس

طبعا احنا شايفين ان فيه لجان كتير منتشرة اليومين دول بس من الواضح ان الحرامية عندهم بجاحة غير عادية و شغالين برضه بدون اى مشاكل

نحكى بقى اللى حصل .... عربية مرسيدس E-Class الشكل الجديد يعنى 2010 او 2011 راكنه أمام بوابة المستشفى على الكورنيش بعد المكتبة و قبل شارع قناة السويس و المنطقة فيها نور

العربية راكب فيها واحد شاب و معاه اخته او واحده قريبته .... المهم عربية لانوس وقفت و نزل منها 3 رجالة و فتحوا باب المرسيدس و معاهم مطاوى و اسلحة و نزلوا البنت فطلعت تجرى و نزلوا الولد من العربية و حاطين المطواة على رقبته و بيزقوه بعيد و واحد منهم ركب عشان يسوق

و من حسن حظ صاحب العربية ان واحد شافهم فراح موقف عربيته بالعرض قدام المرسيدس كانه بيركن و قفلها على نفسه عشان ميقدروش يمشوا بالعربية

أول ما صاحب المرسيدس شافه راح قايل حرامى و نط بسرعة على اللى كان هيسوق العربية راحوا زاقينه و جريوا على العربية اللى معاهم و ركبوا و جرو و طبعا ناس كتير اتلمت بس الحرامية طلعوا يجروا و العربية كانت من غير نمر و محدش طلع يجرى وراهم و كله وقف يشوف ايه اللى حصل


المهم نصيحة لكل واحد فاكر ان الحرامية بيخافوا او يختشوا .. انسى الكلام ده و و اوعى تقف لأى حد على الطريق و لما تقف بعربيتك فى اى مكان حتى لو على الكورنيش اقفل كل الابوب من جوه

و يا ريت الشرطه تركز على الحرامية و البلطجية بدل ما هما مش بيدوروا غير على الفاميه و خلاص

الموضوع حصل قدام عينيا و انا مروح بس الحرامية كانوا هربوا يعنى انا شفت بعينى محدش حكالى قصص

يلا بينا :( بجد انا مقهور ! يعني هما عمالين عاملين لجان مباحث في كل الامكان المستحيلة و بيتلككوا على الفاميه و الاستيكر و اللمض و سايب الحراميه ؟!

ده اول امبارح او امبارح كان في لجنة كبيرة عند كوبري المندرية الساعة 3.30 بليل ! مباحث و تفتيش و كان في بيكنتوا متفيمه نكتوها ! بس اعتقد دول طالعين على بلاغ ! لانوا الي حضرتك بتحكيه يخوف بجد :( ربنا يستر

لا حول ولا قوة إلا بالله
ربنا ينتقم من الحرامية ولاد الحرام
بس الله يكرمكوا بلاش تكسروا فى مقاديف الداخلية
يوميا ناس بتستشهد منهم فى مواجهات مع بلطجيه وحرامية

الكلاب الحرامية بقى عندهم جرأة شديدة ولا مبالاة
بعد انكسار هيبه الشرطة

واضح ان الوضع في اسكندرية صعب قوي ، في فيديو تاني للقتيل مرضيتش احطه علشان صعب قوي

‫موقع الشرطة المصرية أحداث بلطجة فى سابا باشا 26 12 2011‬‎ - YouTube

بس والله كويس ان الراجل اللى وقف عربيتة بالعرض عمل كدة والا كان زمانهم طايرين بالمرسيدس

وواحدة واحدة ربنا يسهلها والامن يرجع تانى ربنا معانا ويعينا على المجرمين دول وربنا ياخدهم بقى

قتيل ايه يا ابو رقية ؟

اقتباس:

---

المشاركة الأصلية كتبت بواسطة Elawany13

لا حول ولا قوة إلا بالله
ربنا ينتقم من الحرامية ولاد الحرام
بس الله يكرمكوا بلاش تكسروا فى مقاديف الداخلية
يوميا ناس بتستشهد منهم فى مواجهات مع بلطجيه وحرامية

الكلاب الحرامية بقى عندهم جرأة شديدة ولا مبالاة
بعد انكسار هيبه الشرطة

---

مجهولون يصيبون ضابطا و3 أفراد شرطة بالرصاص فى القليوبية

الخميس، 29 ديسمبر 2011 - 04:11
http://img.youm7.com/images/NewsPics...2011303138.jpg
صورة أرشيفية

اقتحمت سيارة مجهولة سوداء اللون، فجر اليوم الخميس، كمين شرطة أمام مرور مدينة "قها" بمحافظة القليوبية، وأطلق منها مجهولون مسلحون وابلا من الأعيرة النارية، فأصيب الرائد محمد سعيد رئيس مباحث طوخ، كما أصيب 3 أفراد شرطة آخرون هم أحمد عبد الجواد، أمين شرطة، والرقيبان مجدى محمد عبد الموجود وعبد المنعم إبراهيم، أحدهم حالته خطيرة.

تم نقل المصابين إلى مستشفى الشرطة بالعجوزة، وجارٍ تقديم الإسعافات اللازمة لهم.

استشهاد "رقيب شرطة قها" بعد ساعات من إصابته بأعيرة نارية

الخميس، 29 ديسمبر 2011 - 05:27
http://img.youm7.com/images/NewsPics...0083171251.jpg

أكدت مصادر طبية وشرطية استشهاد الرقيب عبد المنعم إبراهيم، متأثرا بإصابته بعيار نارى اخترق بطنه، بعد أن تعرض وثلاثة شرطيين آخرون لهجوم من مجهولين أمام مرور قها بالقليوبية.

وأضافت المصادر أن الرقيب الشهيد لفظ أنفاسه الأخير فور وصوله مستشفى الشرطة بالعجوزة، فيما يتلقى كل من الرائد محمد سعيد رئيس مباحث طوخ، وأمين الشرطة أحمد عبد الجواد، والرقيب مجدى محمد عبد الموجود العلاج بنفس المستشفى.

يذكر أن سيارة مجهولة سوداء اللون اقتحمت كمين شرطة، أمام مرور مدينة "قها" بمحافظة القليوبية، فجر اليوم الخميس، وأطلق منها مجهولون مسلحون وابلا من الأعيرة النارية.

إصابة رئيس مباحث وعسكرى فى مطاردة مع تجار مخدرات بالشرقية

الجمعة، 30 ديسمبر 2011 - 17:32
http://img.youm7.com/images/NewsPics...0111142527.jpg
اللواء محمد ناصر العنترى مساعد الوزير مدير أمن الشرقية
أصيب اليوم، الجمعة، النقيب هانى خريبة رئيس مباحث قسم ثانى العاشر من رمضان بمحافظة الشرقية بطلق نارى بالرقبة من الخلف والعسكرى أحمد النمر بطلقتين بالبطن وحالته متدهورة، وتم نقلهما لمستشفى المركز الطبى العالمى بطريق القاهرة العاشر بعد قيام تجار مخدرات بإطلاق النار عليهما.

تلقى اللواء محمد ناصر العنترى مساعد الوزير مدير أمن الشرقية إخطارا من مأمور قسم ثانى العاشر بالواقعة أفاد أنه أثناء قيام النقيب هانى خريبة رئيس مباحث قسم ثانى العاشر وبرفقته قوة من القسم بمطاردة سيارة مجهولة عصر اليوم بطريق بلبيس العاشر، بعد أن وردت معلومات سرية عن تواجد تجار مخدرات بها قام مجهولون بإطلاق وابل من الأعيرة النارية تجاه الشرطة، أسفر عن إصابة رئيس المباحث وعسكرى وتم نقلهما للمركز العالمى. ومن جانبه تكثف مباحث الشرقية جهودها لضبط المتهمين.

سائق يسحل أمين شرطة بميدان طلعت حرب للهروب منه

السبت، 31 ديسمبر 2011 - 09:29
http://img.youm7.com/images/NewsPics...0915101744.jpg
ميدان طلعت حرب

لم يجد سائق سيارة ملاكى أمامه طريقة للهروب من قوة أمنية، نظرا لعدم حمله تراخيص القيادة أو السيارة، سوى أن يقود السيارة مسرعا، إلا أن أحد أمناء الشرطة تعلق بالسيارة، واستمر السائق فى السير وسحل أمين الشرطة، حتى اصطدم قائدها بسيارة متوقفة، ومع محاولته الهروب مجددا أطلق الأمين رصاصتين فى الهواء إلا أنه لم يتوقف، فأطلق رصاصتين أخريين فى الإطارات الخلفية وأجبره على الوقوف، وتم ضبطهما وتحرير محضر بالواقعة، وإحالتهما للنيابة لمباشرة التحقيق.

البداية كانت أثناء تفقد قوة أمنية من قسم شرطة قصر النيل، الحالة الأمنية بميدان طلعت حرب، وأثناء ذلك تلاحظ لهم قيام قائد سيارة ملاكى القاهرة وبصحبته سيدة بالدوارن حول تمثال طلعت حرب عدة مرات متتالية، وهو الأمر الذى أثار انتباههم، فتوجه أمين شرطة لإيقاف السيارة وفحصها.

ومع محاولة أمين الشرطة إيقاف السيارة، فوجئ بقائد السيارة يحاول الهروب، فأسرع أمين الشرطة بالإمساك بقائد السيارة، إلا أنه أستمر فى محاولات هروبه، فأمسك الأمين بشباك السيارة واستمر السائق فى السير وسحل أمين الشرطة، حتى أصطدم قائد السيارة بأخرى متوقفة بشارع محمد فريد، ليسقط أمين الشرطة أرضا، وحاول القائد الهرب مجددا، إلا أن الأمين أخرج سلاحه وأطلق عيارين فى الهواء ولكن السائق لم يتوقف، الأمر الذى دفعه لإطلاق عيارين فى الإطارين الخلفيين للسيارة حتى أجبر قائد السيارة على التوقف.

أسرعت القوة الأمنية تجاه السيارة، وتم ضبط قائد السيارة والسيدة التى كانت بصحبته، وأمكن التوصل أنهما "المصري.ح.ح" (45 سنة)، سائق، سبق ضبطه فى قضايا متنوعة، وتبين أنه لا يحمل تراخيص قيادة أو تراخيص السيارة، و"مروة.ز.ح" (28 سنة)، فتم اقتيادهما قسم قصر النيل لاتخاذ اللازم تجاههما وتم إسعاف أمين الشرطة.

وبمواجهتهما أعترف قائد السيارة أمام العميد هانى جرجس مأمور القسم بارتكابه الواقعة، ومحاولته الهروب من القوة الأمنية بسبب عدم حمله رخصة السيارة ورخصة القيادة، موضحا أنه اصطحب السيدة التى كانت بصحبته من موقف الترجمان بقصد توصيلها لأحد الفنادق بمنطقة وسط البلد، وأضاف بأن السيارة ملكه وأنه كان قد اشتراها من أحد المعارض ببولاق ولم يسدد باقى أقساطها، فتم تحرير محضر بالواقعة، وإحالتهما للنيابة لتولى التحقيق.

لا حول ولا قوة إلا بالله
اللهم ارحمهم وتقبلهم عندك من الشهداء

على الكورنيش عيني عينك كدا !!
امبارح كان فية لجنة عند المنتزة و كانت بتفتش و شاديين جامد بس محدش وقفني الحمد لله
انا من اول ما الثورة قامت و انا بقفل السنتر اول ما اتحرك .. و لو هرد على الموبيل بقفل الازاز خالص

اقتباس:

---

المشاركة الأصلية كتبت بواسطة deshahcoka

يلا بينا :( بجد انا مقهور ! يعني هما عمالين عاملين لجان مباحث في كل الامكان المستحيلة و بيتلككوا على الفاميه و الاستيكر و اللمض و سايب الحراميه ؟!

ده اول امبارح او امبارح كان في لجنة كبيرة عند كوبري المندرية الساعة 3.30 بليل ! مباحث و تفتيش و كان في بيكنتوا متفيمه نكتوها ! بس اعتقد دول طالعين على بلاغ ! لانوا الي حضرتك بتحكيه يخوف بجد :( ربنا يستر

---

هما معظم الوقت بيعملوا اللجنة اللى بعد الكوبرى مباشرة او عند المنتزه عند نقطة الشرطة عشان يقابلوك بعد الدوران مباشرة و بجد ربنا يسترها لان الحرامية افتروا و الشرطة عارفه معظمهم و رغم كده مش بتمسكهم
المفروض انهم يشدوا على الحاجات المهمة الاول و بعد كده يدوروا على الحاجات الثانوية و كلنا عارفين انهم عارفين البلطجية و اماكنهم و عارفين حرامية العربيات و هما لسه ماسكين كام عصابة بس يا ريت يمسكوا الكل مش يمسكوا شوية عشان يعرفونا انهم شغالين و خلاص و يسيبوا الباقى

اقتباس:

---

المشاركة الأصلية كتبت بواسطة elawany13

لا حول ولا قوة إلا بالله
ربنا ينتقم من الحرامية ولاد الحرام
بس الله يكرمكوا بلاش تكسروا فى مقاديف الداخلية
يوميا ناس بتستشهد منهم فى مواجهات مع بلطجيه وحرامية

الكلاب الحرامية بقى عندهم جرأة شديدة ولا مبالاة
بعد انكسار هيبه الشرطة

---

ربنا ينتقم منهم لانهم افتروا و مش بيهمهم الحكومة و احنا مش بنكسر فى مقاديف الحكومة و الله و عايزينها ترجع قوية بس عشان ترجع قوية لازم يشتغلوا بجد و يشتغلوا على الحاجات المهمة يعنى مش اجى على شجرة و كل يوم اكسرلها فرع ما هى كده كده هتطلع غيره لكن لو شلتها من جذرها هتموت و مش هنشوفها تانى و هما عارفين البلطجية كويس و فعلا هما شغالين احسن من الاول لكن فى معظم الوقت بتلاقى مركزين على تفاهات و سايبين الحرامية و البؤر بتاعتهم شغالة زى الفل طب ما الافل انهم يروحوا يهاجموا البلطجية و لا حضرتك ايه رأيك ؟
انا نادرا لما بشارك فى مواضيع و مش بحب انقل مواضيع لان الناس بتفتكر انها تكسير فى الحكومة و امبارح بعد ما رجعت من بره قعدت اقول اكتب ولا لا بس فى الاخر قلت لازم اكتبه لانى شفت بعينى و ممكن حد يحصله نفس الموقف و يتأذى بسببه و من حسن الحظ امبارح ان ربنا وقف جنب صاحب العربية و متأذاش فلازم كلنا ناخد بالنا كويس و على فكره انا فى كلية طب و كنت بستغرب من الناس اللى بتقول بلطجية بيهاجموا حد فى اماكن عامة بس مكنتش متخيل ابدا انها توصل بيهم الجرأة على الكورنيش فى منطقة منورة و أمان زى دى

اقتباس:

---

المشاركة الأصلية كتبت بواسطة osama.m

على الكورنيش عيني عينك كدا !!
امبارح كان فية لجنة عند المنتزة و كانت بتفتش و شاديين جامد بس محدش وقفني الحمد لله
انا من اول ما الثورة قامت و انا بقفل السنتر اول ما اتحرك .. و لو هرد على الموبيل بقفل الازاز خالص

---

ده اللى بجد مجننى انهم على الكورنيش و المنطقة فيها نور و انا بعدها مباشرة ركبت عربيتى و رحت ضاغط على زرار قفل الابواب كلها مباشرة لان محدش يضمن حاجة خالص و مش همشى بعد كده الا و انا قافلهم

اقتباس:

---

المشاركة الأصلية كتبت بواسطة semsem kane

بس والله كويس ان الراجل اللى وقف عربيتة بالعرض عمل كدة والا كان زمانهم طايرين بالمرسيدس

وواحدة واحدة ربنا يسهلها والامن يرجع تانى ربنا معانا ويعينا على المجرمين دول وربنا ياخدهم بقى

---

فعلا و الله الراجل ده حظه من السماء ان ربنا بعتله واحد يعمل كده و الراجل اول ما ركن قدامهم راح قافل عربيته على نفسه عشان خاف حد يتعرضله و صاحب العربية قلبه جمد لما شاف الراجل ده فقال حرامى و نط على اللى كان على الطارة لكن غير كده كان زمانهم طاروا بيها

الواحد كلة يوم بيسمع عن حادثة سرقة وكل مرة بحس ان الحرامية بقت اكتر جرائة عن الاول
بس دة ميمنعش ان اللجان عاملة شغل فى الاسكندرية الواحد بدء يحس ان الشارع بقى امان عن الاول
واحد جرنا معاة عربية جيب لاند كروزر بس موديل قديم اتسرقت من الشارع عندنا
بعدها بفترة لقاها راكنة على الكورنيش عند بير مسعود على الرصيف وانت طالع على المنتزة
الظاهر ان كان فية لجنة فاركنوها وخلعوا بس الغريب بقى انهم صلحولوا المتور كان مفوت شكلهم عملو عمرة للمتور ومركبين جنوط اسبور بكاوتش غير اللى كان فيها والنمر حطين عليهم استيكر بنمر القليوبية
يعنى لولا ان كان فية لجنة بتقف على البحر مكنش الراجل دة شاف عربيتة

لا حول ولا قوة الا بالله
ربنا يستر

ألقت مباحث الغربية القبض على تاجر بمدينة طنطا تخصص في السطو على السيارات الملاكي في أثناء وقوعها بالشوارع والميادين المختلفة وسرقتها وتفكيكها وبيعها كأجزاء.

كانت البلاغات قد تعددت أمام مدير أمن الغربية، حول هذه الظاهرة. على الفور تم تشكيل فريق بحث.

وأسفرت التحريات أن مرتكب هذه الوقائع "محمد خ" (37سنة – تاجر)، وبعد تقنيين الإجراءات تم ضبطه في أثناء استقلاله السيارة (5027 ملاكي الغربية) والمبلغ بسرقتها.

وبمواجهته اعترف بقيامه بارتكاب نحو 4 وقائع سرقة سيارات ملاكي أخرى بمدينة طنطا والمبلغ بسرقتها وقيامه بتفكيك السيارات المسروقة وبيعها كأجزاء وتم تحرير محضر وأخطرت النيابة التي أمرت بحبسه 4 أيام على ذمة التحقيق.

في أول حوادث العام الجديد،
تمكن النقيب / هيثم عباس الضباط بمديرية أمن القاهرة، ...من إنقاذ شاب وفتاة علي طريق السويس الصحراوى ، بعدما حاول 4 أشقياء قتل الشاب واختطاف الفتاة.

حيث لاحظ ضابط الشرطة في أثناء توجهه إلى طريق القاهرة السويس الصحراوي ، وجود سيارة ملاكي يستقلها شاب وفتاة في العقد الثالث من العمر، ويحاول بعض الأشخاص استيقافهم عنوة، ثم أشهروا أسلحة بيضاء في مواجهة قائد السيارة ، التي حاولوا فتحها لاختطاف الفتاة ، فهرع ضابط الشرطة إلى المجني عليهما وأطلق أعيرة نارية في الهواء ، وتمكن من ضبط أحد الأشقياء ، ولاذ الباقين بالفرار .

اللهم لا حول ولا قوة إلا بك و حسبنا الله و نعم الوكيل