الموضوع: رايح مرور السلام ...... دعوااااتكم و مطلوب ذوي الخبرة :))

المشاركة الأصلية كتبت بواسطة heshhesh

طيب ياريت ياحسين تقلنا الخطوات بقى وجبت ايه من البنك ومن شركه التأمين عايز الخطوات بالضبط لانى قدامى شهر وارخص فى نفس المرور وربنا يسترها

بسم الله ..... صلي علي النبي عليه الصلاة والسلام
اولا انا رحت شركة التأمين وجددت الوثيقة ...... بس خلي بالك في حاجة جديدة اتعملت علي كل شركات التأمين
ان الوثيقة يكون فيها 25% يتحملها المؤمن في حالة سرقة السيارة لا قدر الله
او لو مش عايز البند ده نسبة التجديد بتزيد 50%
البنك عندي مكانش موافق علش موضوع 25% فكنت هالبس في زيادة 50% وانا شاحتهم اصلا هههههههههههه
بس الحمد لله الراجل اللي بتعامل معاه فعلا محترم بمعني الكلمة و كان بيدورلي علي مكان تاني اجيب نمه الوثيقة بس ربنا ييسر والحمد لله وافقوا
المهم لو انت محتاجه في حاجة قلي

ثانيا ... خدت الوثيقة وطلعت علي البنك وسلمتهالهم وقالولي هانكلمك لما الجواب يجي (ده جواب بيفوضوك انك ترخص وانك دافع اللي عليك تقريبا) مش فاكر النص بتاعه

ثالثا ..... بتاخد الجواب ده وصورة الرخصة و صورة البطاقة وتطلع علي المرور
اول ما تحش مرور السلام تسمي الله كده وتروح علي الكشك اللي علي الشمال وتاخد بيان صرف لوحات
وتطلع الرخصة والبيان وتروح علي شباك اللوحات المعندنية وتديهاله
هايقولك روح اقعد تحت التندة ....... هاينادوا عليك يدوك الورقة مختومة ومتدبس فيها الرخصة
هاتاخدها وتطلع علي المخالفات تديها الرخصة والورقة وتقولك مخالفاتك كام و تستني تدفعها وتاخد الورقة بتاعتها
كده فل ؟ ؟؟؟؟؟؟؟
بعد كده تاخد كل ده وتروح تجيب ملف من نفس الكشك وتحط فيه كل اللي معاك
1- جواب البنك
2- الرخصة والمخالفات
3- صورة البطاقة والرخصة
ولو عايز تجيب نموذج تجديد هاته لو استني لما يقلك هو مش فارقة .
لما تجيب النموذج هتملاه وتديهوله ويتدبس الورق ويقولك استني تحت التندة
ومباااااااااااارك عليك الرخصة ان شاء الله

نصيحتي ليك
1- تصلي استخارة
2- روح علي 9 ...... مش هاتفرق كتير انا فضلت واقف قدام المخالفات وطلع لازم اجيب الورق ده والساعتين راحو علي الفلاضي اللي كنت رايخكم الصبح

وربنا ييسرلك كل خير يارب العالمين