سؤال في تنظيف صدأ دورة التبريد بوضع جاز مع المياه؟

**tarreq** · 31-12-2011 05:38 PM

السلام عليكم

بعد تغيير طبة مياة للموتور .. الميكانيكي قاللي نحط شوية جاز مع مياة الرادياتير وامشي بيها يومين لتنظيف الصدأ المترسب فى دورة التبريد .. ثم تغيير المياة بمياة نظيفة

هل ده صح ؟ ولا له تأثير ضار ؟

شكرا

**heshamzaky** · 31-12-2011 05:41 PM

أنا شخصيا بعملها و جربتها كذا مرة و مرة حطيت صابون سائل كمان بس فضيتة فى وقتها غسلت بية فقط علشان اضيع ريحة الجاز
لو غسلت الدورة بالجاز ما تكترتش الجاز و دة انا عملتة لان الدورة دخل فيها زيت من الموتور و عمل طحينة

**seko700** · 31-12-2011 05:49 PM

بس ممكن الجاز ده يكون مضؤر للخراطيم

**ahmed_h_g** · 31-12-2011 06:12 PM

الجاز بيسخن دورة التبريد جامد
فى ماده بتتباع ب10ج علبه صفره صناعه أمريكى مخصوصه للغسيل وتنضيف الصدأ ومانع صدأ فى نفس الوقت أنا مجربها
وممكن تغسل بخل زى ما بتغسل غلاية الشاى بالظبط

**heshamzaky** · 31-12-2011 06:27 PM

لو عايز تبقى فى الامان و مش عاوز اى مخاطرة
اعمل دورة تنظيف للدورة فى محطة البنزين ب 20 جنية
بس صدقنى التنظيف بالطريقة العادية البلدى مفيهوش مخاطرة
و القربة بتاعت المية بيفكها و بيحط جواها رملة و بنزين و بينظفها

**ahmed_h_g** · 31-12-2011 06:32 PM

الماده بتضاف على المياه الموجوده فى الردياتير وبتقفل الغطاء وتدور العربيه
تسيبها دايره من 10 الى 20 دقيقه على ما أعتقد بيبقى مكتوب على العلبه بدون تحريك السياره
بعد كده تفضى مية الردياتر ويستحسن تفتح الخرطوم الخارج من الموتور و تسيب خرطوم مياه نضيف مفتوح فى فتحة الردياتر والعربيه دايره شويه لحد ما تشوف المياه الخارجه بنفس صفاء ونضافة المياه الداخله من الخرطوم
بعد كده تبطل العربيه و تفتح الطبه الموجوده فى أسفل الردياتير علشان تفضى مياه الردياتر وتملى الردياتير ميه خضره وتفضى الهواء من الدايره وكده يبقى كله تمام

**Elawany13** · 01-01-2012 08:52 AM

أول ما اشتريت العربية من حوالى سنة كان فيها صدأ رهيب فى القربة والراداتير

غسلت دورة التبريد 3 مرات فى خلال السنة الماضية مرة عند بتاع راداتير عنده ماكينة غسل راداتير ومرتين عند الميكانيكى ... وكل مرة أحط مياه خضراء وفكيت الراداتير واتسلك من جوه ومفيش فايده .....بعد شهر ألاقى الصدأ ظهر فى القربة والراداتير تانى ... من حوالى اسبوع الميكانيكى فك ماسورة علشان تركيب تريموستات الكوعه ببص فى الماسورة لاقيت الصدأ ماسك فيها من جوه وعامل زى حبوب الشباب كده من جوه ... اعتقد ان من المستحيل تنظيف هذا الصدأ تماماً ... المهم بقاء الوضع على ما هو عليه وعدم زيادة الصدأ ... انما القضاء عليه مستحيل

بالنسبة للتبريد عندى الحمد لله مثالى والعربية مش بتسخن ومفيش اى مشاكل حتى قبل اجراء اى عملية تنظيف

**ahmed_h_g** · 02-01-2012 09:24 PM

والله يا جماعه الماده ديه

عملت مفعول جامد معايا فى الصدأ
أنا نضفت الدوره بالخل و مسحوق الغسيل علشان يشيل الأملاح وبعد كده بالماده اللى موجوده فى الصوره
الحمد لله بقالى سنتين مفيش صدأ وبملأ الردياتير بالعبوه اللى بتضاف على مياه الحنفيه العاديه مع 6 زجاجات ما مقطر بتاع البطاريات بدل مياه الحنفيه علشان خالى من الأملاح

يعنى تجيب جركن فاضى 5 لتر وتفضى فيه 5 أو 6 عبوات ماء مقطر مضمون من بنزينه أو محل مضمون
خد بالك ماء مقطر مش أحماض
بعد ما تملى نصف الجركن بالماء المقطر تضيف العبوه اللى بتضاف على الماء

وتكمل باقى الجركن ما مقطر لغاية مايتملى
بكده أنت عملت جركن ماء ردياتير مضمون