الموضوع: حدش ..... عندة كوريك يا ولاد الحلال ...

مشهد داخلى : جرس الموبايل الخلوى الصينى بيرن بجانب سماعات الكمبيوتر اللى هى بتخبط قبل ما هو يرن و الشاشه كمان عماله تقطع و بتشارك فى التنبيه و تخرج منه نغمه مبحوحه توحى بأن المتصل من احدى الاقارب ... انظر لأرى على شاشه المحمول اسم احدى اخواتى المعروف عنها كثرة الخلافات بينها و بين زوجها .....
اضغط على الزر الاخضر المرسوم عليه سماعه و انا بقول يا ساتر يا رب ........ مهم ما وراهمش غيرى .... انا حلال المشاكل كلها بتاعت العيله و الجيران و المنطقه كلها ...........
انا : ايوة..... السلام عليكم .... خير يا بنتى .... جوزك عملك ايه ؟؟؟؟ اجيب امك و اجيلك امتى ؟؟
هى : فال الله و لا فالك يا شيخ ... احنا كويسين ... مفيش مشاكل خالص ... انا : الحمد لله يارب دايما ... ربنا يهديلكم الحال ....
انا : طيب الحمد لله ... و انتى كويسه و العيال ....
هى : شوف بقى يا سيدى ... انا كنت فى سيرتك امبارح انا و جوزى ... و الراجل بصراحه قالى احنا الراجل ده كل شويه ممرمطينه معانا فى المشاكل ما تيجى نعزمه مرة علشان ميبقاش فى الوحشه بس معانا ........... فى احدى المطاعم ( اللى هو شغال محاسب فيها فى القاهرة الجديدة )
ها قولت ايه .... انهاردة بليل ... هات العيال و مراتك ونقضى رأس السنه هناك و اهى فرصه نقعد مع بعض شوية فى جو بعيد عن البيت ...
انا : اوكييييييييه ماشى ... بس انا هرجع على 7 بليل كده ... قالتلى ماشى عدى عليه فى القطاميه و خدنى و نطلع على المطعم ..........
انا بقى عمال اضرب اخماس فى اسداس ... عزومه ايه بس ده؟؟ الجو ساقعه ؟؟ و العيال هتبرد منى ؟؟ و صابح عليه شغل الصبح ؟؟ و المشوار بعيد علية؟؟ طيب سيبها لظرفها ...
تقوم الهانم تقفل من هنا .... و تتصل من هنا بمراتى ... و تشبطها اكتر ......... و تشبط العيال و انا زى المغفل مش درايان بحاجه ....
تقول الست زوجتى تتصل بيا و تدحلب عليا ( اياكش انا مش فاهم ) و تقولى : ها يا سمسم ... هتفسحنا فين انهارده ... كل سنه و انت طيب انهارده راس السنه ؟؟ زى ما يكون انا مغيب علقيا و مش عارف و كنت ساقط تاريخ مثلا ...
انا : يا ستى الجو برد ... و العيال مزكمه ... ايه رايك نجيب تورته كده و ناكلها قدام التليفزيون فى الدفا ...
هى : تغير النبرة ... لا ازاى و ده برضه ينفع ... ده كل الناس خارجه انهاردة ... و فلانه رايحه هنا و علانه جايه من هنا و قامت جايبه سيرة الست كزرونه و لاستاذ براد برضه ....
انا : فى عقل بالى ( بما اننا فى اخر الشهر و انا مقبضتش و اخر فلوس معايا فولت بيها العربية و ممعيش الا شويه فكه ) فقولت اقبل بالعزومه و امرى لله .... بصى بقى اختى انهارده عزمانا و هنروح ناكل فى المطعم الامريكاني ........ يلا بقى جهزى العيال و ارجع اخدك و نطلع عليها .......علشان جوزها مش هيكون فى البيت ... هو عندة جرد فى المطعم هناك ...
المهم روحت و اخدتها و طلعنا على القطاميه و اخذت معايا شومه كبيرة حطيتها تحت الكرسى علشان الطريق صعب جدا فعلا عقبال ما رحت تحت البيت كانت العربيه جالها تسلخات من كتر المطبات ......
بيرن عليها لاقيت حاجه رزعت فى الباب بتاعى من برة .... ببص كده لاقيت ابنها بيقولى ... ازيك يا خالو ... ماما جاية ورايه .. كمان ثانيتين لاقيت حاجه تانيه رزعت برضه فى الباب اللى وراه ... لاقيت ابنها التانى جاى و بيقولى يلا علشان نروح ناكل فى المطعم بتاع بابا ....
جت هى و جرة فى ايدها اخرة العنقود لابسه جاكت عامل زى اللحاف و راسها مش باينه منه خالص ... نزلت مراتى من العربية و عملوا مراسم التحيه و لسه هيرغوا الاتنين و بتعازموا مين اللى تركب جنبى ... و البهوات الاطفال هيشتبكوا مع بعض بسبب زعبوط ولا طرطور كل واحد ينشه من التانى
فقومت شاخط فيهم و انا بعطس .... خليها هى تركب جنبى علشان تقولى على الطريق علشان انا مش عارفة .......
بعد ما قطعت شوط محترم .... فى مجاهل القاهرة الجديدة .. و خلصت تقريبا ربع التانك ... تقولى بقى الهانم ايه اختى : بص يا حسام انا نسيت الطريق و الله .... اقولك ... امشى ورا المينى باز ده ... هو رايح هناك ...... شوفتوا الخيبه الاويه....
المهم كل ما يقى سى المينى مخروب ده فى محطه اقف وراة ... كانى قطرنى ... و لف المديرية كلها ... لغايه ما شافت الشارع و قالتلى اه هو ده .... ايوة .... هو ده المطعم .... اركن هنا بقى ........ المهم ركنت و بفتح باب العربية ... ..لاقيت صواريخ هوا ضاربه فى ضهري .. ايه التلج ده
رنت على جوزها لاقيته طالع على الباب بترحاب .. اتفضل يا اهلا ... و جرنى انا و اللكشه اللى معايا على الترابيزة و قعدنا و انا عمال اعطى تعليمات للعيال انهم يكونوا مؤدبين ... كانوا خمسه فى وش العدو ...... كلهم غفاريت.....
هو بيقولى : ها شاى ولا حاجه ساقعه ؟؟؟
انا ببص لاختى كده و مستغرب : هى انتى يا بنتى مش قولتى عشاء؟؟
هو بيضحك و يقولى : انا طبعا انا خلاض عملت الشيك بس قولت حاجه بس لغاية الاكل ما يتعمل .....
المهم الاكل وصل : و كلنا و طبعا ده تعزم على ده و التانيه تعزم على ده و يحلفوا بالطلاق على بعض و .....و كل واحدة فيهم تأكل عيالها
و انا عاوز اروح انام ...... و بس و فى وسط الكلام ده ييجى واحد لابس ميكى ماوس و مركب راس قد قدرة الفول و يسلم على العيال و كلهم ينطوا من على الترابيزة و يتلموا حواليه و يضحكوا .... الا المفعوصه الصغيرة بنت اختى ..... اول ما شافته قامت فاتحه الجاعورة و فرجت علينا المطعم كله و كل ما احاول اسكتها يروحى اخوها الرخم يجيب الراجل ده تاني و تفتح الجاعورة تاني .... و طبعا جوز اختى استأذن يروح يكمل شغله و سابنى بقى انا ادير الازمه .... المهم انا قولتهم بقى يلا نروح علشان الجو برد و عندى شغل الصبح و فين و فين لما لمتهم و خرجت ... جه جوز اختى و اخد عياله فى عربيته و انا عيالى فى عربيتى و خليته يمشى قدامى علشان يطلعنى على الدائرى ..... علشان اروح ...
المهم قعد يوصفلى و قالى امشى وراة الميكروباص ده ... هو رايح السيدة عيشه .....المهم فى نفق كده دخلته و وحاولت اقف اسأل قمت حاكك فى الرصيف بالفرده اليمين .... اتارى العجله هوت شويه ... و المفاجأة انا مكانش معايا كوريك ... المهم مشيت عليها لغايه ما قربت من البيت الا و الاقى كمين شرطه موقف الناس كلها ثوانى ولا قيت الفرده على الارض .... و الساعه حوالى 1 بعد منتصف الليل .......
نزلت لفيت على كل الناس بتوع الكاوتش لاقيتهم قافلين ..... و العيال نايمه ورا على الكنبه ....... و الهانم جنبى بتتاوب .......
احاول اوقف تاكسى اخد منه كوريك مفيش .... اللى يشوحلى .... و اللى يقولى ممعيش...... و اللى يعمل نفسه مش واخد باله ........
و انا طبعا شكلى بيه لابس البدله ... قمت داخل على ظابط الكمين ..... و قولتله على الوضع قالى .... طيب شوف فى البوكس .....
المهم سالت امين الشرطه ادانى واحد كده خربان ميرفعش موتوسكل .... المهم جبت الصليبه و بقك الصواميل ... و3 اتفكوا و بتعافى على رابع صموله قامت الصليبه مقطومه .... اه و الله .... فقولت بركاتك ... يا ست ..... ده اكله جامده اوى ...
المهم صعبت على سواق تاكسى ... شكله كده ممعهوش رخص و خايف من الكمين و نزلت فك الصموله و جاب كوريك من عندة و ركبت الاستبن بعد ما البدله بقى كلها تراب و شحم ..... و دورت العربية و ماشى و جيت جنب الظابط و اديتله الكوريك و انا بشكرة و قالى بالحرف الواحد ......
شوف بقى احنا عملنا معاك وااااااااجب .... بص بنتين فى العربية اللى قدامك ده .... احنا مشتبهين فيهم .... ممكن تخلى المدام تفتشهم و تشوف معاهم ايه ؟؟؟
شوفتوا الهبل : انا بقى قولتله لالالالا هى متعرفش ده ممكن تموت فيها ........ مينفعش انا ؟؟؟؟
قالى طيب بالسلامه و مراتى عماله تبصلى و تزخر ........... و ده بقى اول ذكرى ليه فى العام الجديد ...........

ههههههههه
ده انت مشكلة