الموضوع: تقرير عن صيانه 60000 الف باتو ايجـيبت (يوم بدا بنكد وانتهي زي العسل)

بسم الله الرحمن الرحيم

يوم بدا بنكد وبعدين قلب زي العسل
اسف عالعنوان بس فعلا اليوم بدا معايه بشويت احداث غريبه
اول حاجه اصحي من النوم 5:30 وانام تاني وصحي 7 فااااصل
الحمدلله ربنا كرمني بصديقي محمد عطيه ووافق يجي معايه يونسني طول السكه
حوادث تقشعر لها الابدان طول السكه لما الواحد بقي ماشي مرعوب
وصلنا المركز بدون توهان الحمد لله 9:30 نزلنا كان في استقبالنا الدكتور ايهاب وسلمت العربيه للولد اللي واقف وهو لوحده بيستلم ويحط الدواسه والكيس عالكرسي ودخلت عالاستقبال اداني رقم وبعدين جالي المهندس محمد رفاعي واخد مني الرخصه وشويت بيانات عن العربيه
وهنا المفاجاه الكهربه قاطعه
الساعه 10:30 الناس زهقت وبدات تسال هي الكهربه هتيجي متي
الساعه 11:00 بدا المهندسين في المركز يلفوا علينا وعالناس كلها يخيرونا ياما نستني للساعه 1 لما الكهربه تيجي او ناخد عربياتنا ونمشي
وهنا معظم الناس بدات تمشي ماعدا الصقور اللي ثبتوا
وهنا قررنا نشد علي كارفور
في الطريق قلت لعم حسام زكي اتصل علي احمد يشرحله الموقف عشان لو كان جاي ميتخضش اننا مش موجودين في المركز وقد كان
وهنا كانت نقطة التحول
انا كنت متصور ان احمد ممكن يضغط لنا في خصم او في وقت او في خدمه
لكن انه يضغط عالكهربه انها تيجي ديه جديده
الراجل ده سره باتع بركاتك ياعم احمد
وجاء الاتصال من المهندس ان الكهربه جت
تاني اتصال من المهندس العربيه محتاجه تيل امامي وطناااابير
انا رديت طيب انتوا خلصتوا كل حاجه قلي الموضوع ده بس هو اللي فاضل قلتله استناني لما ارجع
ورجعنا بعد لما بعتولنا الميكروبص عالمول ورحت للمهندس وقلي ان الطنابير فيها ريجه والتيل محتاج تغير قلتله ماشي اشوفها قلي استني لما العربيه تدخل تاني بقي واستنيت كتير
ودخلت العربيه ورحت اشوف لقيت التيل فعلا محتاج يتغير والطنابير فيها ريجه
واقترح عليه احمد امام المهندس اني امسح الطنابير بالجهاز الجديد ووجدت ان الفرق بين المرتفعات والمنخفضات في الطنبوره ممكن تروح بمسحه بسيطه مش خراطه يعني
والحمد لله الطنابير رجعت زيرو
السؤال بقي كانوا فين بتوع السبع لما التيل بدأ ياكل في الطنابير ؟؟؟؟؟؟؟؟؟؟
نبدا من الاول
1-تغير زيت موبيل 1
2-تغير فلتر الزيت مجانا
3-تغير البوجهات
4-تغير زيت الباور ستيرنج وده موضوع معقد مش هعرف اشرحه عشان هم غيره من غير مايفضي الخزنه واخدوا من اللتر اللي كنت جايبه 300 ملي فقط ومدير الصيانه احمد الرزاز وده راجل قمه في الاحترام والذوق شرحلي ان ماينفعش نفضي الخزنه لاسباب معقده
5-تغير كوتشة تراب 150 بالمصنعيه
6-تغير التيل الامامي 300 جندي
7-مسح الطنابير ب105 جندي
8-طبعا التربيط عالعفشه بصراحه العفشه اتحسنت كتير مع ملاحظت ان مستوي المقصات عندي في رايهم متوسط وحالة الكوتش سيئه غير كده العربيه حالتها جيده
نيجي بقي للمشكله اللي ماتحلتشي
كنت جايب معايه زيت تروس علاشن اغير زيت الفتيس المانوال
المهندس فاجاني انه مش هاينفع طب ليه قلي عاشان في احتمال ان لو فكانا الطبه دي مانعرفشي نربطها تاني علشان ممكن تفوت والطبه مش موجوده حاليا في قطع الغيار ولا المخرطه موجوده لو في عيب في الكرتيره نفسها
المهم قلنا ناجل للصيانه القادمه تكون الحجات توفرت
الانطباع العام عن المركز جيد جدا
الانطباع العام عن الصيانه جيد جدا
نيجي بقي للصقور اللي كانوا محتلين المركز ومنورين ابو رواش كلها
والله اني احببتكم في الله
د/يوسف حبيب الملاين شكرا لذقك وحسن ادبك
د/ايهاب اللي يعرفك لايمكن ينساك بس اهدي شويه في السواقه
عمي حسام زكي داحنا طلعنا بلديات في انتظار زيارتك
ا/ ايمن الهادئ المبتسم
ا/ سامح وtogo واحمد عمر
ا/ احمد رحيم اللي جه مخصوص علشان يشوفنا ويقعد معانا وراح معانا كارفور
وطبعا الكبير قوي عمنا احمد مصطفي اللي يصراحه اشفق عليه من المجهود الجباراللي بيعملهلنا لله مهما قلنا مش هنوفيك حقك
طبعا ياجماعه احنا اتعملنا خصم 100%علي مصنعيات الصيانه الدوريه وعلي فلتر الزيت واخدنا خصمات 15%علي قطع الغيار و10% علي مصنعيات الصيانات الزياده زي مسح الطنابير
المهم الفاتوره كانت في الاخر 642 يمكن انا اكتر واحد دفع في الصيانه دي
انا عارف ان التقرير ممل وطويل بس اتمني اكون افدت اي حد بيه وكون وفيت كل واحد حقه
والحمدلله رب العالمين