اكشف على العربيه عند مكانيكى ولافى بنزينه

ان شاء الله عاوز اشترى تمبرالمااكشف على العربيه عند مكانيكى ولافى بنزينه على الموتور ياترى ايهم احسن وشكر

البنزينة ثم البنزينة ثم البنزينة

الف شكر على الاهتمام

خليك فى البنزينة

اختار بنزينة عندها اجهزة كشف للموتور والشاسيه

اى ورشه معتمده افضل من البنزينه " عن تجربه مع بنزينه شل الهرم " ولا بيفهموا اى حااااااااااااااااااااجه
كانت عربيتى وانا بكشف عليها رشاشاتها بايظه
بيقولى الماتور بايظ

[اى ورشه معتمده افضل من البنزينه " عن تجربه مع بنزينه شل الهرم " ولا بيفهموا اى حااااااااااااااااااااجه
كانت عربيتى وانا بكشف عليها رشاشاتها بايظه
بيقولى الماتور بايظ

الكلام ده صح انا كشفت عندهم عن عربيتي السيينا وقالوا ميه ميه و في الاخر اكتشفت انها كانت عمله حادثه من قدام:banzai:

لو معاك ورق الكشف تقدر توديهم فى 60 داهيه وتاخد منهم تعويض
لانهم مدينك تقرير فنى رسمى بحاله العربيه

عن تجربه شخصيه ابعد عن بنزينة موبيل الهرم

شوية بهايم ولا بيففهموا اى حاجه

كشفت على عربيه وقالى الموتور زى الفل

والله العظيم مكملتش شهر واحد وغيرت موتور العربيه كله والميكانيكى قالى ده حالته بالكتير كانت 20%

اسمع ياعسل اولا ودة الاهم تروح عن سمكرى شاطر يكون معرفة وتاخدة من ايدة زى الشاطر وتروحو على البنزينة تمام والكلام دة يكون بالنهار والبنزينة يكون عندهم كوريك رفع البنزينة بتاخد 5 جنية لرفع السيارة والسمكرى بياخد 50 جنية

وبعدين تروح للميكانيكى الجميل بتاعك والعربية واقفة يبص ليك على كبس الموتور ويقيمة خفيف او سليم والحالة حوالى اد اية

ولو العربية مش عجباك اوى خلى الميكانيكى الاول بس الاهم من الميكانيكى حالة الصاج والشاسية
وبالتوفيق وربنا يكرمك بحاجة كويسة

الميكانيكي يكشف عن حالة الاجزاء الميكانيكية لكن كشف كبس الموتور يتعمل فالبنزينة عندك شل شارع دمشق مصرالجديدة ب25 جنيه ومتقلش نسبة الكبس عن 75 % كده الموتور يبقي حالته متوسطة وبرضه مركز الصفا عندنا اعلانه فالمنتدي بيعمل كشف كبس الموتور ,ملحوظة وانت بتعمل الاختبار للكبس تكون دايس علي دواسه البنزين للاخر,,,ايهاب

بص يا باشا الموضوع بسيط جدا
زى ما بيقولوا الجواب بيبان من عنوانه بمعنى انك تروح لوحدك الاول و تبص على العربية و هتلاقى حاجات تبين اذا كان صاحب العربية مهتم بيها و لا مطلع عينها زى الصالون و الكاوتش و التكييف لو فيها تكييف و تشوف اذا كان فيه سلوك طالعة منها و لا لاء لما تفتح الكبوت و الانوار بتاعتها شغالة و لا محروقة و كمان تشوف حالة البوية كويسة و لا مسترخص فى تمنها .
و بعدين تطلب تجرب العربية بنفسك و تشوف النقلات بتاعتها و التسارع و كمان تاخد مطب صغير (و متنساش تعتذر لصاحبها طبعا على اساس انك مكنتش شايف المطب) عشان تطمن على العفشة.
بعد كده زى ما تفضل الاستاذ Mina-Magdy و تاخد سمكرى تعرفه كويس و تطلع بيه على البنزينه (انا عن نفسى مجرب بنزينة شيل اللى جنب نادى مدينة نصر على طريق النصر & و بنزينة موبيل على طريق المطار FBI ).
و نصيحة ليك قبل ما تشترى لو لقيت حاجة بايظة فى العربية اسال على تمنها الاول عشان متدبس نفسك فى تصليح يتعبك و يزود عليك تمن العربيه
و بالتوفيق ان شاء الله.